હાથમાં જર્મન પિસ્તોલ, લક્ઝરી કારમાં સીન સપાટા
ન્યારી ડેમે રીલ બનાવવા પહોંચેલા અમદાવાદના બે વિદ્યાર્થી SOG ની ઝપટે ચડી ગયા
ત્રીજો ઝડપાયેલ રાજકોટનો સગીર સંબંધીના ઘરેથી લાવ્યો હતો લાયસન્સવાળું હથિયાર
અમદાવાદનો ઝડપાયેલ બુટલેગર પુત્ર ફરી વિવાદમાં; અગાઉ પણ ગુજરાત યુનિવર્સિટી ખાતે ધમાલ મચાવી ગાડીઓમાં કરી હતી તોડફોડ
હથિયાર, કારતુસ, અને લક્ઝરી કાર સહિત રૂ.83.65 લાખનો મુદ્દામાલ જપ્ત
અગ્ર ગુજરાત, રાજકોટ
રાજકોટ શહેરમાં ગેરકાયદેસર હથિયારો અને નશીલા પદાર્થો સામે પોલીસે કડક ઝુંબેશ શરૂ કરી છે ત્યારે એસ.ઓ.જી. ટીમે ફિલ્મી અંદાજમાં ફરતા ત્રણ યુવકોને પિસ્તોલ સાથે ઝડપી પાડતા શહેરમાં ભારે ચર્ચા જાગી છે. લક્ઝરી કારમાં ફરવા નીકળેલા અમદાવાદ-ગાંધીનગરના બે વિદ્યાર્થી અને રાજકોટના એક સગીર પાસેેથી જર્મન બનાવટની પિસ્તોલ, જીવતું કાર્ટીસ, મોંઘીદાટ કાર અને મોબાઇલ ફોન મળી કુલ રૂ.83.65 લાખનો મુદ્દામાલ કબ્જે કરવામાં આવ્યો છે.
પોલીસ સૂત્રોના જણાવ્યા અનુસાર, ઝડપાયેલા યુવકો ન્યારી ડેમ વિસ્તારમાં હથિયાર સાથે ‘સીન સપાટા’, ફોટોશૂટ અને રીલ બનાવવા માટે પહોંચ્યા હતા. પરંતુ તેમના શોખ પર એસ.ઓ.જી.ની સતર્ક નજર પડી જતા આખો ખેલ ખુલ્લો પડી ગયો હતો.
રાજકોટ શહેરના પોલીસ કમિશ્નર બ્રજેશ કુમાર ઝા, અધિક પોલીસ કમિશ્નર ચૈતન્ય માંડલીક, નાયબ પોલીસ કમિશ્નર જગદીશ બાંગરવા તથા મદદનીશ પોલીસ કમિશ્નર ભરત બી. બસીયાના માર્ગદર્શન હેઠળ શહેરમાં ગેરકાયદેસર હથિયારો સામે ખાસ ડ્રાઈવ ચલાવવામાં આવી રહી છે. તેના ભાગરૂપે એસ.ઓ.જી. શાખાના પીઆઈ એન.બી. ચૌધરીની રાહબરી હેઠળ પીએસઆઈ વી.વી. ધ્રાંગુ અને નાર્કોટિક્સ સેલની ટીમ પેટ્રોલિંગમાં હતી. તે દરમિયાન ન્યારી ડેમ મેઇન રોડ પર સરલા કામદાર રોટરી પાર્ક પાસે શંકાસ્પદ હાલતમાં ઉભેલી નંબર GJ-01-KW-0007 વાળી લક્ઝરી કાર પર પોલીસની નજર ગઈ હતી. કારમાં બેઠેલા યુવકોની હિલચાલ શંકાસ્પદ લાગતા પોલીસે તપાસ હાથ ધરી હતી. તપાસ દરમિયાન કારમાંથી જર્મન બનાવટની પિસ્તોલ અને જીવતું કાર્ટીસ મળી આવતા પોલીસ પણ ચોંકી ઉઠી હતી.
પોલીસે અમદાવાદના ઘાટલોડિયા વિસ્તારમાં રહેતા 20 વર્ષીય ધ્રુમીલ અમીતભાઈ ઠાકોર તથા ગાંધીનગરના કુડાસણ વિસ્તારમાં રહેતા 18 વર્ષીય આદિત્યસિંહ દિલીપસિંહ રાઠોડને ઝડપી પાડ્યા હતા. ઉપરાંત રાજકોટના કાયદાના સંઘર્ષમાં આવેલ એક સગીરને પણ કસ્ટડીમાં લેવામાં આવ્યો હતો. ઝડપાયેલા આરોપીઓ પાસેથી રૂ.1.25 લાખ કિંમતની જર્મન બનાવટની પિસ્તોલ, જીવતું કાર્ટીસ, રૂ.80 લાખની લક્ઝરી કાર અને અંદાજે રૂ.2.40 લાખના 3 મોબાઇલ ફોન મળી કુલ રૂ.83,65,100નો મુદ્દામાલ જપ્ત કરવામાં આવ્યો હતો.
આ બનાવમાં સૌથી વધુ ચર્ચા ગાંધીનગરના કુડાસણના રહેવાસી આદિત્યસિંહ રાઠોડને લઈને થઈ રહી છે. પોલીસ સૂત્રોના જણાવ્યા મુજબ આદિત્યસિંહ એક નામચીન બુટલેગરના પુત્ર તરીકે ઓળખાય છે અને અગાઉથી જ ન્યુસન્સ સર્જવા માટે જાણીતો રહ્યો છે. પોલીસના રેકોર્ડ પ્રમાણે તેની સામે અગાઉ અમદાવાદ ટ્રાફિક પોલીસ સ્ટેશનમાં બે, નવરંગપુરા પોલીસ સ્ટેશનમાં એક તથા ગાંધીનગર ઇન્ફોસિટી પોલીસ સ્ટેશનમાં એક મળી કુલ ચાર ગુનાઓ નોંધાઈ ચૂક્યા છે.
સૂત્રોએ વધુમાં જણાવ્યું હતું કે, ચાર મહિના પહેલા ગુજરાત યુનિવર્સિટી ખાતે પણ આદિત્યસિંહે મિત્રો સાથે ભારે હોબાળો મચાવ્યો હતો. ગાડીઓમાં તોડફોડ અને ગેરવર્તણૂકના બનાવમાં પણ તેનું નામ સામે આવ્યું હતું. હવે ફરી એકવાર હથિયાર સાથે ઝડપાતા તેની રીલબાજ અને બેફામ જીવનશૈલી ચર્ચામાં આવી ગઈ છે.
પોલીસ તપાસ દરમિયાન મહત્વની માહિતી સામે આવી હતી કે, ઝડપાયેલ પિસ્તોલ લાયસન્સવાળી હોવાનું જાણવા મળ્યું છે. આ હથિયાર રાજકોટના સગીરે પોતાના સંબંધીના ઘરેથી લાવ્યું હોવાનું સામે આવ્યું છે. જોકે, હથિયાર લાયસન્સ હોવા છતાં તે અન્ય લોકો સુધી કેવી રીતે પહોંચ્યું અને જાહેર સ્થળે કેમ લાવવામાં આવ્યું તે મુદ્દે પોલીસે વધુ તપાસ શરૂ કરી છે.
પોલીસ અધિકારીઓએ જણાવ્યું હતું કે, હાલના સમયમાં સોશિયલ મીડિયા પર રીલ અને સ્ટેટસ માટે યુવાઓમાં જોખમી સ્ટંટ, હથિયાર સાથે ફોટોશૂટ અને દાદાગીરી દર્શાવવાની હોડ વધી રહી છે. આવી હરકતો ક્યારેક જીવલેણ પણ સાબિત થઈ શકે છે. માત્ર દેખાડા માટે હથિયાર સાથે ફરવું કે જાહેર સ્થળે તેનો પ્રદર્શન કરવું ગંભીર ગુનો બની શકે છે. સદભાગ્યે આ બનાવમાં કોઈ અનિચ્છનીય ઘટના બની નથી, પરંતુ સમયસર પોલીસે કાર્યવાહી ન કરી હોત તો મોટી દુર્ઘટના સર્જાઈ શકતી હતી.ફિલ્મી અંદાજમાં દબદબો ઉભો કરવાની કોશિશમાં નીકળેલા યુવકોને હવે કાયદાનો કડક પાઠ ભણવાનો વારો આવ્યો છે. રાજકોટ પોલીસની આ કાર્યવાહી શહેરના અન્ય યુવાઓ માટે પણ ચેતવણી સમાન માનવામાં આવી રહી છે.
આ સમગ્ર કાર્યવાહી દરમિયાન એસ.ઓ.જી. શાખાના પીઆઈ એન.બી. ચૌધરી, પીએસઆઈ વી.વી. ધ્રાંગુ, એએસઆઈ ઇન્દ્રસિંહ જાડેજા, ફિરોઝભાઈ રાઠોડ, હેડ કોન્સ્ટેબલ મૌલિકભાઈ સાવલિયા, દિગ્વિજયસિંહ ગોહિલ, હાર્દિકસિંહ પરમાર, યોગેન્દ્રસિંહ ઝાલા તેમજ ક્યુઆરટી ટીમના અશ્વીનભાઈ ડાંગર, જનકસિંહ ગોહિલ, ચાપરાજભાઈ દોરિલા, શક્તિસિંહ ગોહિલ અને ડ્રાઇવર રાહુલભાઈ મકવાણાએ મહત્વની ભૂમિકા ભજવી હતી.
