કોઠારિયા ચોકડી પાસે કારમાંથી 7.82 લાખનું અફીણ ઝડપી લેતું SOG
સણોસરાનો ભરવાડ શખ્સ ઝડપાયો ; વાંકાનેરથી માલ લાવી રાજકોટમાં છૂટક વેચાણની તૈયારી હતી
અગ્ર ગુજરાત, રાજકોટ
રાજકોટ શહેરમાં નશીલા પદાર્થોના વધતા પ્રસાર સામે પોલીસ દ્વારા હાથ ધરાયેલા “સે નો ટુ ડ્રગ્સ” અભિયાન અંતર્ગત શહેર એસઓજીને વધુ એક મહત્વપૂર્ણ સફળતા મળી છે. કોઠારિયા ચોકડી નજીક એસઓજીની ટીમે સફેદ અલ્ટો કારમાંથી રૂ.7.82 લાખથી વધુ કિંમતનું અફીણ ઝડપી એક પેડલરની ધરપકડ કરી હતી. પોલીસે અફીણ ઉપરાંત કાર સહિત કુલ રૂ.9.42 લાખનો મુદ્દામાલ કબ્જે કર્યો છે. પ્રાથમિક પૂછપરછમાં આરોપી વાંકાનેર તરફથી અફીણ લઈને રાજકોટ શહેરમાં છૂટક પડીકીઓ બનાવી વેચાણ કરવા આવતો હોવાનું ખુલ્યું છે.
મળતી માહિતી મુજબ રાજકોટ શહેર પોલીસ કમિશ્નર બ્રજેશકુમાર ઝા, એડીશનલ પોલીસ કમિશ્નર ચૈતન્ય મંડલીક, ડીસીપી ક્રાઇમ જગદીશ બાંગરવા અને એસીપી ક્રાઇમ ભરત બસીયાના માર્ગદર્શન હેઠળ શહેરમાં નશીલા પદાર્થોના વેપાર સામે કડક અભિયાન ચાલી રહ્યું છે. તે અંતર્ગત એસઓજી પીઆઈ એન.બી. ચૌધરીની આગેવાની હેઠળ પીએસઆઇ વી.વી. ધ્રાંગુ અને તેમની ટીમ પેટ્રોલિંગમાં હતી. દરમિયાન પોલીસને ચોક્કસ બાતમી મળી હતી કે એક શખ્સ અલ્ટો કારમાં અફીણનો જથ્થો લઈને કોઠારિયા ચોકડી વિસ્તાર તરફ આવવાનો છે. બાતમીને આધારે એસઓજીની ટીમે તરત જ વોચ ગોઠવી હતી. કોઠારિયા ચોકડીથી આજીડેમ ચોકડી તરફ જતા સર્વિસ રોડ પર, ખોખડદળ નદીના પુલ પાસે એક સફેદ રંગની અલ્ટો કાર શંકાસ્પદ હાલતમાં ઉભી જોવા મળી હતી. પોલીસ ટીમે કારને ઘેરી લઈને ચાલકને કાબૂમાં લીધો હતો. પૂછપરછ દરમિયાન તેણે પોતાનું નામ ઇંદુ જીવાભાઈ ભુંડીયા હોવાનું જણાવ્યું હતું. આરોપી સણોસરા ગામમાં મેલડી માતાના મંદિર સામે રહેતો હોવાનું અને ડ્રાઇવિંગનો વ્યવસાય કરતો હોવાનું સામે આવ્યું હતું.
પોલીસે કારની સઘન તપાસ હાથ ધરતાં અંદરથી અફીણનો જથ્થો મળી આવ્યો હતો. વજન કરતાં કુલ 1.565 કિલોગ્રામ અફીણ હોવાનું સામે આવ્યું હતું, જેની બજાર કિંમત અંદાજે રૂ.7.82 લાખ થાય છે. ઉપરાંત પોલીસે આરોપીની અલ્ટો કાર પણ કબ્જે લીધી હતી. આ રીતે અફીણ અને વાહન સહિત કુલ રૂ.9.42 લાખનો મુદ્દામાલ જપ્ત કરવામાં આવ્યો હતો.
એસઓજીના સૂત્રોના જણાવ્યા અનુસાર આરોપી ઈંદુ ભરવાડ વાંકાનેરના એક સપ્લાયર પાસેથી અફીણ લઈ આવ્યો હતો. રાજકોટ શહેરમાં આ અફીણને નાની-નાની પડીકીઓ બનાવી છૂટક વેચાણ કરવાની તેની યોજના હતી. પરંતુ તે શહેરમાં માલ ઉતારે તે પહેલાં જ પોલીસના જાળમાં ફસાઈ ગયો હતો. આરોપી લાંબા સમયથી આ ગેરકાયદેસર પ્રવૃત્તિ સાથે સંકળાયેલો છે કે કેમ તે દિશામાં પણ તપાસ હાથ ધરવામાં આવી છે. આ કામગીરી દરમિયાન હેડ કોન્સ્ટેબલ હરદેવસિંહ, યોગરાજસિંહ અને અનોપસિંહ ઝાલાની મહત્વપૂર્ણ ભૂમિકા રહી હોવાનું પોલીસ વિભાગે જણાવ્યું હતું. બાતમીના આધારે ઝડપી કાર્યવાહી કરીને મોટી માત્રામાં નશીલા પદાર્થો પકડી પાડવામાં આવતા શહેર પોલીસની કામગીરીની પ્રશંસા થઈ રહી છે.
પકડાયેલા આરોપી વિરુદ્ધ એનડીપીએસ એક્ટ હેઠળ ગુનો નોંધવામાં આવ્યો છે. બાદમાં તેને અને મુદ્દામાલને આજીડેમ પોલીસ સ્ટેશનને સોંપવામાં આવ્યા હતા. હવે પોલીસ આરોપી પાસેથી વાંકાનેરના સપ્લાયર સહિત સમગ્ર નેટવર્ક વિશે માહિતી મેળવવા પ્રયાસ કરી રહી છે. અફીણનો જથ્થો ક્યાંથી આવ્યો, કોને પહોંચાડવાનો હતો અને રાજકોટમાં કોની મદદથી તેનું વેચાણ થવાનું હતું તે મુદ્દે પણ પૂછપરછ ચાલી રહી છે.
શહેર પોલીસ છેલ્લા કેટલાક સમયથી ડ્રગ્સ અને નશીલા પદાર્થોના વેપાર સામે સતત અભિયાન ચલાવી રહી છે. ખાસ કરીને યુવાધન નશાની લત તરફ ન વળે તે માટે પોલીસ દ્વારા વિવિધ ઝુંબેશ સાથે કડક કાર્યવાહી હાથ ધરવામાં આવી રહી છે. અનેક વખત શહેર અને ગ્રામ્ય વિસ્તારોમાં દરોડા પાડી ડ્રગ્સ, ચરસ, ગાંજો અને અફીણ જેવા પદાર્થો ઝડપાયા છે. આ કેસ પણ એ જ અભિયાનનો એક ભાગ હોવાનું પોલીસ અધિકારીઓએ જણાવ્યું હતું. પોલીસ માને છે કે રાજકોટ સહિત સૌરાષ્ટ્ર વિસ્તારમાં નશીલા પદાર્થોનો ગેરકાયદેસર વેપાર રોકવા માટે સતત વોચ અને ઇન્ટેલિજન્સ આધારિત કામગીરી જરૂરી બની છે. કારણ કે નાના-મોટા પેડલરો દ્વારા યુવાઓને ટાર્ગેટ બનાવી નફાખોરી કરવામાં આવી રહી છે. આવી પરિસ્થિતિમાં શહેર એસઓજીની આ કામગીરીને મહત્વપૂર્ણ ગણવામાં આવી રહી છે. હાલ પોલીસે આરોપી ઈંદુ ભરવાડના મોબાઇલ કોલ ડિટેઇલ્સ, સંપર્કો અને અગાઉના ગુનાહિત રેકોર્ડની પણ તપાસ શરૂ કરી છે. સાથે જ વાંકાનેર સુધી પહોંચતી ડ્રગ્સ સપ્લાય ચેઇનનો પર્દાફાશ કરવા માટે અલગ-અલગ ટીમો કામે લાગી હોવાનું જાણવા મળ્યું છે.
