જસદણ-સરધારમાં ભારે પવન સાથે વરસાદ ખાબકયો
ગરમીમાં શેકાતા લોકોને રાહત મળી, ખેડૂતોની ચિંતા વધી : હલેન્ડા, ખારચીયા સહિતના વિસ્તારમાં રસ્તા પર પાણી ભરાયા
અગ્ર ગુજરાત, રાજકોટ
ગુજરાતમાં કાળઝાળ ગરમીની સિઝન વચ્ચે હવામાનમાં અચાનક એક મોટો ઉલટફેર જોવા મળ્યો છે. રાજકોટ જિલ્લાના જસદણ અને સરધાર પંથકમાં સાંજના સમયે અચાનક વાતાવરણના મિજાજમાં પલટો આવ્યો હતો અને પવનના સુસવાટા સાથે કમોસમી વરસાદ ખાબક્યો હતો. ધોમધખતા ઉનાળાની વચ્ચે અચાનક આવેલા આ વરસાદને કારણે વાતાવરણમાં ઠંડક પ્રસરી ગઈ હતી.
રાજકોટ ગ્રામ્ય પંથકમાં આખો દિવસ અસહ્ય ગરમી અને અકળાવનારા બફારાને કારણે લોકો ત્રાહિમામ પોકારી ઉઠ્યા હતા. દિવસભર સૂર્યદેવે પ્રકોપ વરતાવ્યા બાદ સાંજના સમયે અચાનક આકાશમાં કાળાડિબાન વાદળો ઘેરાયા હતા. સરધાર નજીક આવેલા હલેન્ડા, ખારચિયા અને જસદણ પંથકના ગ્રામ્ય વિસ્તારોમાં તેજ પવન ફૂંકાવા સાથે વરસાદ તૂટી પડ્યો હતો.
અચાનક શરૂ થયેલા આ કમોસમી વરસાદની તીવ્રતા એટલી હતી કે, જોતજોતામાં ગામના માર્ગો ભીંજાઈ ગયા હતા અને રસ્તાઓ પરથી ચોમાસાની જેમ પાણી વહી નીકળ્યા હોવાના દ્રશ્યો સામે આવ્યા હતા. ઉનાળાની સિઝનમાં અચાનક વરસાદી માહોલ સર્જાતા સ્થાનિક લોકો પણ આશ્ચર્યમાં મુકાયા હતા.
આ માવઠાના કારણે લાંબા સમયથી ગરમીમાં શેકાતા લોકોને અકળામણમાંથી મોટી રાહત મળી હતી અને સમગ્ર પંથકમાં ઠંડક પ્રસરી ગઈ હતી. જોકે, બીજી તરફ સિઝન વગરના આ કમોસમી વરસાદને કારણે કેરીની ખેતી કરતા ખેડૂતોમાં ચિંતાના વાદળો ઘેરાયા છે, કારણ કે આ સમયે માવઠું પાકને મોટું નુકસાન પહોંચાડી શકે છે.
