પોલીસ ભરતી બોર્ડ દ્વારા તા.૨૧ જૂનની PSI, HC, વાયરલેસની પરીક્ષા મોકુફ
રદ કરાયેલી નીટની પરીક્ષાનું આયોજન કરેલું હોવાથી બોર્ડનો વિરોધ
અગ્ર ગુજરાત, રાજકોટ
ગુજરાત પોલીસ ભરતી બોર્ડ (GPRB) દ્વારા રાજ્યના ગૃહ વિભાગ અને ભરતી બોર્ડના સંકલનથી એક મહત્વપૂર્ણ નિર્ણય લેવામાં આવ્યો છે. આગામી ૨૧ જૂન ૨૦૨૬ (રવિવાર) ના રોજ યોજાનારી વિવિધ ટેકનિકલ સંવર્ગની લેખિત પરીક્ષાઓને હાલ પૂરતી મોકૂફ રાખવાની સત્તાવાર જાહેરાત કરવામાં આવી છે. આ અંગે ભરતી બોર્ડ દ્વારા ૨૦ મે ૨૦૨૬ના રોજ એક સત્તાવાર પરિપત્ર જાહેર કરીને ઉમેદવારોને માહિતગાર કરવામાં આવ્યા છે.
ભરતી બોર્ડ દ્વારા જારી કરાયેલા અહેવાલ અનુસાર, અગાઉ જે જાહેરાત ક્રમાંક અંતર્ગત લેખિત પરીક્ષા ૨૧.૦૬.૨૦૨૬ના રોજ આયોજિત થવાની હતી, તે જ દિવસે રાષ્ટ્રીય સ્તરની NEET (નેશનલ એલિજિબિલિટી કમ એન્ટ્રન્સ ટેસ્ટ) ની પરીક્ષા પણ યોજાવા જઈ રહી છે. બંને મહત્વની પરીક્ષાઓ એક જ દિવસે હોવાના કારણે ઉમેદવારોને કેન્દ્રો પર પહોંચવામાં વહીવટી અને વ્યવહારિક મુશ્કેલીઓ ન પડે તે માટે લોકહિતમાં આ નિર્ણય લેવાયો છે.
ગુજરાત પોલીસ ભરતી બોર્ડ દ્વારા સ્પષ્ટતા કરવામાં આવી છે કે, આ ૨૧.૦૬.૨૦૨૬ની લેખિત પરીક્ષા મોકૂફ રાખ્યા બાદ હવે પરીક્ષાની નવી તારીખ આગામી દિવસોમાં સત્તાવાર રીતે જાહેર કરવામાં આવશે. ઉમેદવારોને કોઈપણ પ્રકારની અફવાઓ પર ધ્યાન ન આપવા અને નવીનતમ અપડેટ્સ માટે ભરતી બોર્ડની સત્તાવાર વેબસાઇટ સતત જોતા રહેવા વિનંતી કરવામાં આવી છે. પરીક્ષા પાછળ ઠેલાતા ઉમેદવારોને હવે તૈયારી માટે થોડો વધુ સમય મળી રહેશે.
મોકુફ રાખેલ વિવિધ પરીક્ષા
પરિપત્ર મુજબ ત્રણ મુખ્ય ભરતીઓની લેખિત પરીક્ષા સ્થગિત કરવામાં આવી છે જેમાં જાહેરાત ક્રમાંક: GPRB/202526/2 – પોલીસ સબ ઇન્સ્પેક્ટર (વાયરલેસ) તથા ટેકનિકલ ઓપરેટર, જાહેરાત ક્રમાંક: GPRB/202526/3 – પોલીસ સબ ઇન્સ્પેક્ટર (મોટર ટ્રાન્સપોર્ટ) જાહેરાત ક્રમાંક: GPRB/202526/4 – હેડ કોન્સ્ટેબલ ડ્રાઇવર મિકેનિક (ગ્રેડ-૧)
