- દિલ્હીની હવામાં શ્વાસ લેવો મુશ્કેલ
- નોઈડા-ગાઝિયાબાદની સ્થિતિ ગંભીર
- આખો દિવસ માસ્ક પહેરવું પડે એવી સ્થિતિ
જેમ જેમ શિયાળો નજીક આવતો જાય છે એમ દિલ્હી સિટી ગેસ ચેમ્બર બનતું જાય છે. પ્રદૂષણને કારણે વહેલી સવારથી લઈને મોડી રાત સુધી ધૂમ્મસ જેવું હવામાન જોવા મળી રહ્યું છે. દિલ્હીમાં સતત પાંચમા દિવસે શ્વાસ લેવા માટે જોખમી એવી હવાનું સ્તર નોંધાયું હતું. તારીખ 01 નવેમ્બરના રોજ વહેલી સવારે દિલ્હી અને આસપાસના વિસ્તારોમાં હળવા ઝાકળ જોવા મળી હતી. દિલ્હીના મોટાભાગના વિસ્તારોમાં એર ક્વોલિટી ઈન્ડેક્સ ખૂબ જ ખરાબ શ્રેણીમાં પહોંચી ગયો છે. તારીખ 1 નવેમ્બરના રોજ દિલ્હીના આનંદ વિહાર વિસ્તારમાં AQI 400ને સ્પર્શી ગયો હતો. તેથી ગંભીર શ્રેણીમાં નોંધાયો હતો.
દિલ્હીમાં સ્થિતિ સૌથી ગંભીર
દિલ્હીના કેટલાક વિસ્તારોમાં AQI 400 થી વધુ નોંધવામાં આવ્યો હતો. જ્યારે મોટાભાગના વિસ્તારોમાં AQI 300 થી વધુ હતો. કેન્દ્રીય પ્રદૂષણ નિયંત્રણ બોર્ડ દ્વારા આપવામાં આવેલી માહિતી અનુસાર દિલ્હીના આનંદ વિહાર વિસ્તારમાં AQI 423 નોંધવામાં આવ્યો હતો. જે ગંભીર શ્રેણીમાં આવે છે. બવાનામાં પણ AQI 400 થી વધુ નોંધાયો હતો. નોઈડાના સેક્ટર 125 વિસ્તારમાં AQI 306 નોંધવામાં આવ્યો હતુો. સેક્ટર 62 વિસ્તારમાં AQI 382 નોંધાયો હતું. સેક્ટર 1 માં AQI 321, સેક્ટર 116 માં AQI 317 નોંધાયો હતું. ગાઝિયાબાદની વાત કરીએ તો ઈન્દિરાપુર વિસ્તારમાં AQI 243, લોનીમાં AQI 288, સંજય નગર વિસ્તારમાં AQI 325 અને વસુંધરામાં AQI 260 નોંધવામાં આવ્યો હતો.
એક્શન મોડ પર તંત્ર
માત્ર દિલ્હી જ નહીં દિલ્હીની આસપાસના વિસ્તારમાં પણ સ્થિતિ ગંભીર કહી શકાય એવી જોવા મળી છે. મોટાભાગના એવા વિસ્તારો જોવા મળ્યા હતા. જ્યાં AQI એ 400ને પાર થઈ ગયો હતો. નોઈડા અને ગાઝિયાબાદમાં પણ સ્થિતિ ગંભીર હોવાનું જાણવા મળ્યું હતું. આ સાથે તંત્રએ વોટરગનનો ઉપયોગ કરીને વાતાવરણને શુદ્ધ કરવા માટેના પ્રયાસ કર્યા હતા. જોકે, સુપ્રીમ અને હાઈકોર્ટે તંત્રનો ઉધડો લીધા બાદ તંત્ર એક્શનમોડ પર આવ્યું હતું.
