અમરેલીમાં ‘ગે ડેટિંગ એપ્લિકેશનના’ બહાને યુવકને બ્લેકમેઇલ કરી લૂંટ ચલાવતી ગેંગ પકડાઈ
પોલીસે ૬ આરોપીઓને ઝડપી પાડ્યા, બે દિવસના રિમાન્ડ મંજૂર
અગ્ર ગુજરાત, રાજુલા
અમરેલી જિલ્લામાં સોશિયલ મીડિયા અને ગે ડેટિંગ એપ્લિકેશનના માધ્યમથી લોકોને જાળમાં ફસાવી બ્લેકમેઇલ કરતી ગેંગ સક્રિય થઈ હોવાનો ચોંકાવનારો કિસ્સો પ્રકાશમાં આવ્યો છે. ગે ડેટિંગ એપ્લિકેશનના બહાને એક યુવકને આંતરી તેનું અપહરણ કરી, નિર્વસ્ત્ર કરીને વિડીયો વાયરલ કરવાની ધમકી આપી લૂંટ ચલાવનાર ગેંગના ૬ શખ્સોને અમરેલી તાલુકા પોલીસે ગણતરીના કલાકોમાં પર્દાફાશ કરી તમામની ધરપકડ કરી લીધી છે. આ ઘટનાને પગલે સમગ્ર પંથકમાં ભારે ચકચાર મચી ગઈ છે. પોલીસ સૂત્રો પાસેથી મળતી વિગત મુજબ બાબરા તાલુકાના વાડલીયા ગામે રહેતા અજયભાઈ નામના યુવક પોતાનો ટ્રક લઈને અમરેલી તરફ આવી રહ્યા હતા. અને તે દરમિયાન લાઠી બાયપાસ ચોકડી પાસે ચા-પાણી પીવા ઉભા રહ્યા ત્યારે તેઓ ઇન્સ્ટાગ્રામ જોઈ રહ્યા હતા. એ જ વખતે તેમના મોબાઈલમાં ‘ગ્રીનર’ નામની ગે ડેટિંગ એપ્લિકેશનમાંથી એક મેસેજ આવ્યો હતો. ભૂલથી તેના પર ક્લિક થતાં એપ્લિકેશન ઓપન થઈ હતી, જેમાં ‘જાન’ નામના આઈડી પરથી “હું તમારી નજીક જ છું” તેમ કહી રૂબરૂ મળવા બોલાવવામાં આવ્યા હતા. આ મેસેજ બાદ અજયભાઈ પોતાનો ટ્રક લઈને પરત બાબરા તરફ જઈ રહ્યા હતા ત્યારે રસ્તામાં જ હરકિશન ખસિયા અને અરમાન ભીમાણી નામના બે શખ્સોએ પોતાનું એક્ટિવા આડું રાખીને ટ્રકને રોક્યો હતો. બન્ને અજયભાઇને ટ્રકમાંથી નીચે ઉતારી ધોલધપાટ કરી બળજબરીથી એક્ટિવા પર બેસાડી દીધા હતા અને રેલવે પાટા નજીક પુલ નીચે લઈ ગયા હતા. ત્યાં અગાઉથી હાજર અન્ય ચાર શખ્સો સહિત કુલ ૬ શખ્સોએ અજયભાઈ સાથે ઝપાઝપી કરી ઢીકાપાટુનો માર માર્યો હતો. ત્યારબાદ તોફીક અને રોનક નામના શખ્સોએ છરી બતાવી ગળા પર રાખી અજયભાઇના કપડાં કઢાવી નાખ્યા હતા અને મોબાઈલની ફ્લેશ ચાલુ કરી તેનો નિવસ્ત્ર વિડીયો ઉતારી લીધો હતો. આરોપીઓએ વિડીયો વાયરલ કરવાની ધમકી આપી અજયભાઈના પાકીટમાંથી રૂ. ૧,૦૦૦ ની રોકડ લૂંટી લીધી હતી. ત્યારબાદ વધુ પૈસાની માંગણી કરતા ડરી ગયેલા અજયભાઈએ ફતેપુરમાં બાયોકોલવાળા ભાવેશભાઈને ફોન કરી ઉછીના પૈસા મંગાવ્યા હતા. એટલું જ નહીં આરોપીઓએ છરીની અણીએ અજયભાઈ પાસે તેમના શેઠ ઘોઘાભાઈને ફોન કરાવી “કાકાના દીકરાને દવાખાને પૈસાની જરૂર છે” તેવું જૂઠું બોલાવી હરકિશન નામના આરોપીના મોબાઈલમાં ગુગલ પે દ્વારા રૂ. ૫,૦૦૦ ટ્રાન્સફર કરાવ્યા હતાં. તોફીકે ગળા પર છરી રાખી બીજા ૪૫,૦૦૦ રૂપિયા કાલ સુધીમાં આપી દેવાની ધમકી આપી હતી. આ દરમિયાન કોઈ રોડ પર આવતું હોવાની આશંકા જતા આરોપીઓ મોબાઈલ, પાકીટ અને ગાડીની ચાવી ફેંકીને ભાગી ગયા હતાં. પોલીસે ગણતરીના કલાકોમાં તમામ ૬ આરોપીઓને દબોચી લીધા હતાં.
ભોગ બનનાર યુવકે ૨૬ તારીખે પોતાના શેઠને આપવીતી જણાવતા સમગ્ર મામલો અમરેલી તાલુકા પોલીસ સ્ટેશને પહોંચ્યો હતો. તાલુકા પોલીસ સ્ટેશનના પી.આઈ. ઓમદેવસિંહ જાડેજાએ ગુનો નોંધી તુરંત ચક્રો ગતિમાન કર્યા હતાં અને ગણતરીના કલાકોમાં જ હરકિશન, અરમાન, તોફીક, રોનક સહિત તમામ છ આરોપીઓને ઝડપી લીધા છે. હાલ પોલીસે કોર્ટમાંથી આરોપીઓનિ બે દિવસના રિમાન્ડ મેળવી આ ગેંગે અન્ય કેટલા લોકોને શિકાર બનાવ્યા છે તે દિશામાં ઊંડાણપૂર્વક તપાસ શરૂ કરી છે. આ ચકચારી ઘટનાને પગલે અમરેલી પોલીસ દ્વારા લોકોને ખાસ અપીલ કરવામાં આવી છે કે, અજાણી વ્યક્તિઓ કે શંકાસ્પદ ગે ડેટિંગ કે અન્ય સોશિયલ મીડિયા એપ્લિકેશનના માધ્યમથી અજાણ્યા લોકોના સંપર્કમાં આવવું નહીં અને આવી કોઈ લોભામણી કે શંકાસ્પદ એપ્લિકેશનનો ઉપયોગ કરવો નહીં જેથી ડિજિટલ હનીટ્રેપ કે લૂંટનો શિકાર થતાં બચી શકાય છે. સમગ્ર મામલે ડીવાયએસપી ચિરાગ દેસાઇ પ્રતિક્રિયા આપી હતી.
