ક્રિકેટ રમતા રમતા એન્જિનિયરિંગનો વિદ્યાર્થી ઢળી પડ્યો , 20 વર્ષીય યુવકનું કરુણ મોત
કણકોટ સ્થિત સરકારી એન્જિનિયરિંગ કોલેજના મેદાનમાં બનેલો બનાવ ; સારવાર દરમિયાન તબીબોના પ્રયાસો છતાં જીવ બચી ન શક્યો
અગ્ર ગુજરાત, રાજકોટ
રાજકોટના કણકોટ નજીક આવેલી સરકારી એન્જિનિયરિંગ કોલેજમાં અભ્યાસ કરતા 20 વર્ષીય વિદ્યાર્થીનું ક્રિકેટ રમતી વખતે અચાનક મૃત્યુ થતાં શૈક્ષણિક વર્તુળો અને પરિવારજનોમાં શોકની લાગણી વ્યાપી ગઈ છે. અમરેલી જિલ્લાના બગસરા તાલુકાના નાના મુંજીયાસર ગામના રહેવાસી સુમિત વિપુલભાઈ ગોંડલિયા કોલેજના હોસ્ટેલમાં રહી અભ્યાસ કરતો હતો.
માહિતી મુજબ, રવિવારે સવારે સુમિત પોતાના મિત્રો સાથે કોલેજના ગ્રાઉન્ડ પર ક્રિકેટ રમવા પહોંચ્યો હતો. રમતની શરૂઆત થાય તે પહેલાં જ તેને ચક્કર આવતાં તે મેદાનમાં જ ઢળી પડ્યો હતો. મિત્રોએ તાત્કાલિક તેની મદદ કરી હતી, પરંતુ તેની સ્થિતિ ગંભીર બનતી જતાં સમય ગુમાવ્યા વગર નજીકની ખાનગી હોસ્પિટલમાં ખસેડવામાં આવ્યો હતો.
હોસ્પિટલ પહોંચ્યા બાદ સુમિત બેભાન થઈ ગયો હતો અને તેના હૃદયના ધબકારા પણ બંધ થઈ ગયા હોવાનું જાણવા મળ્યું હતું. તબીબોએ તાત્કાલિક સીપીઆર સહિતની સારવાર શરૂ કરી હતી, જેના કારણે થોડા સમય માટે હૃદયના ધબકારા ફરી શરૂ થયા હતા. જોકે સારવાર દરમિયાન આશરે એક કલાક બાદ તેણે અંતિમ શ્વાસ લીધા હતા.
સુમિતના મૃત્યુનું ચોક્કસ કારણ પોસ્ટમોર્ટમ રિપોર્ટ બાદ જ જાણી શકાશે. પ્રાથમિક રીતે હૃદય સંબંધિત સમસ્યાની શક્યતા વ્યક્ત કરવામાં આવી રહી છે, પરંતુ તબીબી તપાસ પૂર્ણ થયા બાદ જ હકીકત સામે આવશે.
રાજકોટ તાલુકા પોલીસે જરૂરી કાર્યવાહી હાથ ધરી મૃતદેહને પોસ્ટમોર્ટમ માટે સિવિલ હોસ્પિટલ ખાતે ખસેડ્યો હતો. ખેતીકામ કરતા પિતાનો આશાસ્પદ પુત્ર અને પરિવારનો લાડકો દીકરો અચાનક છીનવાઈ જતાં પરિવારજનો પર દુઃખનો પહાડ તૂટી પડ્યો છે. બહેને પોતાના એકના એક ભાઈને ગુમાવતા ગામમાં પણ શોકનું મોજું ફરી વળ્યું છે.
