અમેરિકામાં ધાર્મિક સ્થળોની સુરક્ષાના કાયદાને સમર્થન આપતી BAPS સંસ્થા
મંદિરો, મસ્જિદો અને ચર્ચની આસપાસ ૧૦૦ ફૂટનો ‘બફર ઝોન’ બનશે; ભક્તોને ડરાવવા કે રોકવા ફેડરલ ગુનો ગણાશે
અગ્ર ગુજરાત, રાજકોટ
યુનાઇટેડ સ્ટેટ્સમાં તમામ ધર્મના લોકો સુરક્ષિત રીતે અને કોઈ પણ ડર વગર પોતાના ધાર્મિક સ્થળોએ જઈ શકે તે હેતુથી, કોંગ્રેસમેન ટોમ સુઓઝી (Tom Suozzi) અને કોંગ્રેસમેન મેક્સ મિલર (Max Miller) દ્વારા સંયુક્ત રીતે ‘SACRED Act’ નામનું એક નવું અને મહત્વપૂર્ણ દ્વિપક્ષીય (bipartisan) બિલ રજૂ કરવામાં આવ્યું છે.
છેલ્લા કેટલાક સમયથી અમેરિકાભરમાં હિન્દુ મંદિરો, સિનાગોગ, ચર્ચ, ગુરુદ્વારા અને મસ્જિદો જેવા ધાર્મિક સ્થળોની બહાર ભક્તોને ડરાવવા, ધમકાવવા અને હેરાનગતિ કરવાની ઘટનાઓમાં ચિંતાજનક વધારો જોવા મળ્યો છે. ઘણા કિસ્સાઓમાં, ઉગ્ર પ્રદર્શનકારીઓ દ્વારા ભક્તોને પ્રાર્થના કરવા જતા રોકવામાં આવે છે અથવા તેમની સાથે શાબ્દિક દુર્વ્યવહાર કરવામાં આવે છે. આ પ્રકારની અપ્રિય ઘટનાઓને કડકાઈથી રોકવા અને ભક્તોના ધાર્મિક સ્વાતંત્ર્યનું રક્ષણ કરવા માટે આ ઐતિહાસિક બિલ લાવવામાં આવ્યું છે.
આ બિલની સૌથી મહત્વની અને કડક જોગવાઈ ‘બફર ઝોન’ (Buffer Zone) ની છે. SACRED Act (Safeguarding Access to Congregations and Religious Establishments from Disruption) અંતર્ગત, કોઈપણ ધાર્મિક સ્થળની આસપાસ ૧૦૦ ફૂટના વિસ્તારને સુરક્ષિત જાહેર કરવામાં આવશે. જો કોઈ વ્યક્તિ આ ૧૦૦ ફૂટના વિસ્તારમાં કોઈ ભક્તને ઇરાદાપૂર્વક ડરાવે, ધમકાવે, શારીરિક રીતે તેમનો રસ્તો રોકે અથવા હેરાન કરવાના હેતુથી ૮ ફૂટની નજીક આવે, તો તેને ‘ફેડરલ ક્રાઈમ’ (ફેડરલ ગુનો) ગણવામાં આવશે અને તે મુજબ કડક સજા થશે. આ બિલને બીએપીએસ સંસ્થા દ્વારા સમર્થન આપવામાં આવ્યું હોવાનું સંસ્થાએ જણાવ્યું છે.
