ભાદર કિનારે ખનિજ ચોરીનો પર્દાફાશ: સીસક ગામની સીમમાં રૂરલ SOGનો દરોડો
ગેરકાયદે રેતી ખનન અને વહન કરતી ટોળકી સામે કાર્યવાહી, ટ્રેક્ટર સહિતનો મુદામાલ જપ્ત; સતાપરના શખ્સની ધરપકડ
અગ્ર ગુજરાત, રાજકોટ
રાજકોટ ગ્રામ્ય વિસ્તારમાં ગેરકાયદે ખનિજ ખનન સામે પોલીસ દ્વારા હાથ ધરાયેલા અભિયાન દરમિયાન વધુ એક મહત્વપૂર્ણ સફળતા મળી છે. કોટડાસાંગાણી તાલુકાના સીસક ગામની સીમમાં ભાદર નદીના કિનારે ચાલી રહેલા ગેરકાયદે રેતી ખનનના કૌભાંડનો ગ્રામ્ય એસઓજીની ટીમે ભંડાફોડ કર્યો છે. દરોડાની કાર્યવાહીમાં એક આરોપીને ઝડપી પાડી ટ્રેક્ટર સહિતનો મુદામાલ કબજે કરવામાં આવ્યો હતો.
મળતી માહિતી મુજબ રાજકોટ રેન્જના આઈજી નિર્લિપ્ત રાયના માર્ગદર્શન હેઠળ જિલ્લામાં ચાલી રહેલી ગેરકાયદે પ્રવૃત્તિઓ સામે કડક કાર્યવાહી કરવા માટે ખાસ સૂચનાઓ આપવામાં આવી છે. જેના અનુસંધાને જિલ્લા પોલીસ વડા વિજયસિંહ ગુર્જરે ખનિજ ચોરી અને ગેરકાયદે રેતી વહન કરતા તત્વો સામે અસરકારક કાર્યવાહી કરવા માટે વિવિધ પોલીસ ટીમોને સક્રિય કરી છે.
આ સૂચનાઓના ભાગરૂપે ગ્રામ્ય એસઓજીના પીઆઈ એફ.એ. પારગીના માર્ગદર્શન હેઠળની ટીમ કોટડાસાંગાણી વિસ્તારમાં પેટ્રોલિંગ અને વોચમાં હતી. તે દરમિયાન બાતમીદાર પાસેથી મળેલી ચોક્કસ માહિતીના આધારે સીસક ગામની સીમમાં આવેલ ભાદર નદીના પટ્ટામાં દરોડો ગોઠવવામાં આવ્યો હતો. પોલીસ ટીમ સ્થળ પર પહોંચી ત્યારે નદી કિનારે ગેરકાયદે રીતે રેતીનું ખોદકામ તેમજ તેના પરિવહનની કામગીરી ચાલી રહી હોવાનું સામે આવ્યું હતું. પોલીસે તાત્કાલિક કાર્યવાહી કરીને સ્થળ પરથી જનક બાવા ડવ (ઉં.વ. 32), રહે. સતાપર (કોટડાસાંગાણી)ને ઝડપી લીધો હતો. આરોપી પાસેથી રેતીના ગેરકાયદે વહનમાં ઉપયોગમાં લેવાતું ટ્રેક્ટર પણ જપ્ત કરવામાં આવ્યું હતું.
પોલીસે આરોપી વિરુદ્ધ ખનિજ ચોરી અને સંબંધિત કાયદાકીય જોગવાઈઓ હેઠળ કાર્યવાહી હાથ ધરી છે. ગ્રામ્ય વિસ્તારમાં કુદરતી સંપત્તિના ગેરકાયદે શોષણ સામે પોલીસ દ્વારા સતત નજર રાખવામાં આવી રહી હોવાનું અધિકારીઓએ જણાવ્યું હતું.
ખનિજ ચોરીના આવા કિસ્સાઓ સામે આગામી દિવસોમાં પણ સઘન ચેકિંગ અને દરોડાની કામગીરી યથાવત રાખવામાં આવશે તેવી પોલીસ સૂત્રોમાંથી માહિતી મળી છે.
