જ્યોતિ સીએનસી ઇન્ટરનેશનલ ક્લાસિકલ ફિડે રેટિંગ ચેસ ટુર્નામેન્ટ-૨૦૨૬નું આયોજન
૩ લાખના રોકડ ઇનામો સાથે ભારતભરના ચેસ ખેલાડીઓ માટે સુવર્ણ તક
અગ્ર ગુજરાત, રાજકોટ
ઓલ ઈન્ડિયા ચેસ ફેડરેશન, ગુજરાત સ્ટેટ ચેસ એસોસિએશન (GSCA) તથા જ્યોતિ ફાઉન્ડેશન-રાજકોટ ના સંયુક્ત ઉપક્રમે પ્રથમ વખત “જ્યોતિ CNC ઇન્ટરનેશનલ ક્લાસિકલ 1800 ફિડે રેટિંગ ચેસ ટુર્નામેન્ટ-૨૦૨૬” નું આયોજન આગામી તા. ૧૦ થી ૧૨ જુલાઈ, ૨૦૨૬ દરમિયાન વડોદરા ખાતે કરવામાં આવ્યું છે. આ ત્રણ દિવસીય પ્રતિષ્ઠિત સ્પર્ધા વડોદરાના સામા ઇન્ડોર સ્પોર્ટ્સ કોમ્પ્લેક્સ ખાતે યોજાશે. તમામ ખેલાડીઓ તથા વાલીઓના આરામને ધ્યાનમાં રાખી સમગ્ર ટુર્નામેન્ટ સંપૂર્ણ સેન્ટ્રલાઇઝ્ડ એર-કન્ડીશન્ડ હોલમાં યોજાશે.
આ સ્પર્ધામાં કુલ ૯ રાઉન્ડ ક્લાસિકલ ફોર્મેટ મુજબ રમાશે. દરેક ખેલાડીને ૩૦ મિનિટ સાથે પ્રતિ ચાલ ૩૦ સેકન્ડનો વધારો (30+30 Increment) આપવામાં આવશે. આ ટુર્નામેન્ટ ફિડે રેટિંગ માટે માન્ય રહેશે. સ્પર્ધામાં કુલ રૂ. ૩,૦૦,૦૦૦ના રોકડ ઇનામો જાહેર કરવામાં આવ્યા છે. ઓપન કેટેગરીમાં પ્રથમ ક્રમે જીતનાર ખેલાડીને રૂ. ૩૨,૦૦૦, દ્વિતીય રૂ. ૨૩,૦૦૦, તૃતીય રૂ. ૧૧,૦૦૦, ચોથા ક્રમાંકને રૂ. ૭,000, પાંચમા રૂ. ૫,000, છઠ્ઠા રૂ. ૪,000, સાતમા રૂ. ૩,૫00, આઠમા રૂ. ૩,000 તેમજ નવમા અને દસમા ક્રમે જીતનાર ખેલાડીઓને રૂ. ૨,000-૨,000ના ઇનામો આપવામાં આવશે. ૧૧ થી ૧૫ મા ક્રમ સુધીના ખેલાડીઓને રૂ. ૧,૫00ના રોકડ ઇનામો એનાયત કરાશે.
આ ઉપરાંત વિવિધ વિશેષ શ્રેણીઓ જેવી કે ૧૪૦૦-૧૪૯૯ રેટિંગ, ૧૫૦૦-૧૫૯૯ રેટિંગ, ૧૬૦૦-૧૬૯૯ રેટિંગ, બેસ્ટ અનરેટેડ, બેસ્ટ વડોદરા પ્લેયર, શ્રેષ્ઠ અનુભવી ખેલાડી, બેસ્ટ અન્ડર-૧૧ તથા બેસ્ટ અન્ડર-૧૭ વયજુથમાં પ્રથમ પાંચ ક્રમે જીતનાર ખેલાડીઓને રૂ. ૧૦,૦૦૦ થી રૂ. ૨,000 સુધીના વિશેષ રોકડ ઇનામો આપવામાં આવશે. સ્પર્ધામાં ભાગ લેવા ઇચ્છુક ખેલાડીઓ માટે AICF સીઝન ૨૦૨૬-૨૭ ની નોંધણી ફરજિયાત રાખવામાં આવી છે. નોંધણી માટેની અંતિમ તારીખ તા. ૦૯ જુલાઈ, ૨૦૨૬ છે. પ્રારંભિક નોંધણી ફી ૩૦ જૂન સુધી રૂ. ૧,000, જુલાઈ ૦૧ થી રૂ. ૧૨૫૦ અને ૬ જુલાઈથી મોડી નોંધણી માટે રૂ. ૧૫૦૦ નક્કી કરવામાં આવી છે. સ્પર્ધામાં નોંધણી માટે ખેલાડીઓએ https://forms.gle/kKesEsCZzxToyNVk7 લિંક મારફતે ઓનલાઈન ફોર્મ ભરવું જરૂરી છે. જ્યોતિ CNC ઓટોમેશન લિમિટેડના ગ્રાહકો, કર્મચારીઓ તથા તેમના નજીકના પરિવારજનો માટે પ્રવેશ ફી સંપૂર્ણપણે માફ રાખવામાં આવી છે.
આ ચેસ સ્પર્ધાના ચીફ આર્બિટર તરીકે આંતરરાષ્ટ્રીય આર્બિટર (IA) નિતિન શેનવી, જ્યારે ડેપ્યુટી ચીફ આર્બિટર તરીકે આઈ.એ. અગમ આદિત્ય ઈ. તથા એફ.એ. નિકુંજકુમાર આઈ. દેસાઈ સેવાઓ આપશે. આ સ્પર્ધામાં ભાગ લેવા ગુજરાત સ્ટેટ ચેસ એસોસિએશનના પ્રમુખ તથા એ.આઈ.સી.એફ. (AICF) સચિવ દેવ પટેલ, જી.એસ.સી.એ. (GSCA) સચિવ કૃષ્ણા ગઢિયા, એ.આઈ.સી.એફ. (AICF)ના ભૂતપૂર્વ ઉપપ્રમુખ તથા જી.એસ.સી.એ. (GSCA)ના ભૂતપૂર્વ સચિવ ભાવેશ પટેલ, તથા જ્યોતિ ફાઉન્ડેશનના પ્રમુખ કૌશિક સોલંકીએ રાજ્યભરના ચેસ ખેલાડીઓને મોટી સંખ્યામાં ભાગ લેવા અનુરોધ કર્યો છે.
આ સ્પર્ધાના મુખ્ય ડોનર પરાક્રમસિંહજી જાડેજા, મે. જ્યોતિ સીએનસી ઓટોમેશન લિમિટેડ-રાજકોટ ના ચીફ મેનેજીંગ ડિરેક્ટર (CMD), પોતે પણ ચેસના ઉમદા ખેલાડી છે. આ ટુર્નામેંટને સફળ બનાવવા બરોડાના ચેસ લવર્સ શૈલેષ રાવલ, મૌલિક રાવલ, ધવલભાઈ ચૌહાણ તથા કૂ. કિરણબેન ગોસાઇ તેમજ જ્યોતિ સીએનસી ઓટોમેશન લિમિટેડ-રાજકોટ વતી કૂ. આરતીબેન અગ્રાવત, ફોરમબેન મેહતા અને અનિરુદ્ધસિંહ જાડેજા જહેમત ઉઠાવી રહ્યા છે. વધુ વિગત માટે મૌલિક રાવલ-બરોડા, મો. ૭૭૯૭૫ ૭૭૭૭૯ ઉપર સંપર્ક કરવો.
