ડ્રગ્સ સામે રાજકોટ પોલીસનો કડક સંકલ્પ, અવેરનેસ મેરેથોનથી યુવાધનને અપાયો જાગૃતિનો સંદેશ
ઇન્ટરનેશનલ ડે અગેઇન્સ્ટ ડ્રગ એબ્યુઝ નિમિત્તે બહુમાળી ચોક-રેસકોર્સ ખાતે મેરેથોન યોજાઈ; માનસ હેલ્પલાઇન 1933 પર સંપર્ક કરવાની અપીલ, ડ્રગ્સ પેડલર્સ સામે કડક કાર્યવાહીનો સંદેશ
અગ્ર ગુજરાત, રાજકોટ
ડ્રગ્સના વધતા દૂષણ સામે જનજાગૃતિ લાવવા અને ખાસ કરીને યુવાધનને નશાના ચુંગાલમાંથી દૂર રાખવાના ઉદ્દેશ્ય સાથે રાજકોટ શહેર પોલીસ દ્વારા ઇન્ટરનેશનલ ડે અગેઇન્સ્ટ ડ્રગ એબ્યુઝ એન્ડ ઇલિસિટ ટ્રાફિકિંગ નિમિત્તે વિશેષ અવેરનેસ મેરેથોનનું આયોજન કરવામાં આવ્યું હતું. પોલીસ કમિશનરના માર્ગદર્શન હેઠળ આજે વહેલી સવારે બહુમાળી ચોકથી રેસકોર્સ વિસ્તાર સુધી યોજાયેલી મેરેથોનમાં પોલીસ અધિકારીઓ, કર્મચારીઓ, વિદ્યાર્થીઓ, યુવાનો તેમજ મોટી સંખ્યામાં નાગરિકોએ ઉત્સાહભેર ભાગ લીધો હતો.
મેરેથોન દરમિયાન ડ્રગ્સ વિરોધી સૂત્રોચ્ચાર સાથે લોકોને નશાથી દૂર રહેવાનો અને સમાજને ડ્રગ્સ મુક્ત બનાવવા માટે સહયોગ આપવાનો સંદેશ આપવામાં આવ્યો હતો. કાર્યક્રમ દરમિયાન ડીસીપી ક્રાઈમ જગદીશ બાંગરવાએ ઉપસ્થિતોને સંબોધતા જણાવ્યું હતું કે ડ્રગ્સનું વ્યસન માત્ર વ્યક્તિને જ નહીં પરંતુ સમગ્ર પરિવાર અને સમાજને નુકસાન પહોંચાડે છે. યુવાધન દેશનું ભવિષ્ય છે અને તેને નશાના રવાડે ચઢવાથી બચાવવું સૌની સામૂહિક જવાબદારી છે.
તેમણે વધુમાં જણાવ્યું હતું કે રાજકોટ શહેર પોલીસ ડ્રગ્સના ગેરકાયદે વેપાર અને તેના નેટવર્કને સંપૂર્ણપણે નાબૂદ કરવા માટે સતત એક્શન મોડમાં કાર્ય કરી રહી છે. ડ્રગ્સ પેડલર્સ સામે કાયદેસરની કડક કાર્યવાહી કરવામાં આવી રહી છે અને ભવિષ્યમાં પણ આવા તત્વો સામે કોઈપણ પ્રકારની ઢીલ રાખવામાં આવશે નહીં. “ડ્રગ્સ પેડલર્સનું સાચું સ્થાન જેલ છે,” તેવો સ્પષ્ટ સંદેશ પણ પોલીસ દ્વારા આપવામાં આવ્યો હતો.
આ પ્રસંગે જો કોઈ વ્યક્તિ ડ્રગ્સની લતમાં ફસાઈ ગઈ હોય અથવા તેના પરિવારનો કોઈ સભ્ય આવા વ્યસનથી પીડાઈ રહ્યો હોય તો તેને સમાજથી દૂર ન ધકેલતા યોગ્ય માર્ગદર્શન અને સારવાર માટે આગળ આવવાની અપીલ કરવામાં આવી હતી. આવા લોકોને રાજ્ય સરકારની ‘માનસ’ હેલ્પલાઇન નંબર 1933 પર સંપર્ક કરવા જણાવાયું હતું, જ્યાં નિષ્ણાતો દ્વારા માર્ગદર્શન અને જરૂરી સહાય ઉપલબ્ધ કરાવવામાં આવે છે. પોલીસ અધિકારીઓએ નાગરિકોને પણ અપીલ કરી હતી કે જો તેમના ધ્યાનમાં ડ્રગ્સનું વેચાણ, હેરફેર અથવા શંકાસ્પદ પ્રવૃત્તિ આવે તો તાત્કાલિક પોલીસને જાણ કરે. સમાજના દરેક વર્ગના સહયોગ વિના ડ્રગ્સ સામેની લડાઈ સફળ બની શકે નહીં, તેથી દરેક નાગરિકે જવાબદાર બની આ અભિયાનમાં જોડાવું જોઈએ.
રાજકોટ પોલીસ દ્વારા આયોજિત આ અવેરનેસ મેરેથોનનો મુખ્ય હેતુ માત્ર દોડનું આયોજન કરવાનો નહોતો, પરંતુ સમાજમાં ખાસ કરીને યુવાનોમાં નશા વિરોધી જાગૃતિ ફેલાવવાનો હતો. “ડ્રગ્સ મુક્ત રાજકોટ” અને “ડ્રગ્સ મુક્ત ભારત”ના સંકલ્પ સાથે યોજાયેલા આ કાર્યક્રમને ઉપસ્થિત લોકોએ વ્યાપક સમર્થન આપ્યું હતું. પોલીસ દ્વારા સ્પષ્ટ કરવામાં આવ્યું હતું કે જાગૃતિ અને કડક કાયદાકીય કાર્યવાહી, બંનેના સમન્વયથી જ ડ્રગ્સના દૂષણને મૂળમાંથી નાબૂદ કરી શકાય છે.
