લીંબુડીવાડી ઓફિસ ચોરીમાં હાઈ-પ્રોફાઈલ તસ્કરો ઝડપાયા, અમદાવાદથી ભાડાની કાર લાવી ઘડ્યો હતો પ્લાન
ફાયનાન્સરની ઓફિસમાં મોટી રકમ હોવાની ધારણાએ તિજોરી ઉઠાવી ફરાર થયા; ગાંધીગ્રામ પોલીસે કલાકોમાં ભેદ ઉકેલી રૂ.10.65 લાખનો મુદ્દામાલ કબ્જે કર્યો
રાજકોટ
લીંબુડીવાડી વિસ્તારમાં આવેલી જમીન-મકાનના વ્યવસાય સાથે સંકળાયેલી ઓફિસમાં થયેલી ચોરીનો ભેદ ગાંધીગ્રામ પોલીસે ગણતરીના કલાકોમાં ઉકેલી બે યુવાનોની ધરપકડ કરી છે. તપાસમાં સામે આવ્યું છે કે આરોપીઓએ અમદાવાદથી સેલ્ફ ડ્રાઈવમાં કાર ભાડે મેળવી રાજકોટ આવી ચોરીને અંજામ આપ્યો હતો. પોલીસે રોકડ, તિજોરી અને કાર સહિત કુલ રૂ.10.65 લાખનો મુદ્દામાલ કબ્જે કર્યો છે.
પોલીસના જણાવ્યા મુજબ કાલાવડ રોડ પર વિષ્ણુ વિહાર સોસાયટીમાં રહેતા શિવરાજસિંહ જનકસિંહ રાણાની લીંબુડીવાડી મેઈન રોડ પર આવેલી ઓફિસમાં 24મી તારીખે રાત્રે ચોરી થઈ હતી. બીજા દિવસે સવારે ઓફિસ ખોલવા પહોંચતાં મુખ્ય દરવાજાનું તાળું તૂટેલું જોવા મળ્યું હતું. અંદર તપાસ કરતાં રૂ.10 હજારની રોકડ રાખેલી તિજોરી ગાયબ હોવાનું સામે આવતાં ગાંધીગ્રામ પોલીસ મથકે ફરિયાદ નોંધાવવામાં આવી હતી.
ફરિયાદ બાદ પીઆઈ એચ.પી. ગઢવીના માર્ગદર્શન હેઠળ પીએસઆઈ એસ.વી. ગોહિલ અને તેમની ટીમે સીસીટીવી ફૂટેજ સહિત વિવિધ ટેક્નિકલ પુરાવાઓના આધારે તપાસ શરૂ કરી હતી. તપાસ દરમિયાન એક શંકાસ્પદ વર્ના કારના આધારે આરોપીઓ સુધી પહોંચવામાં સફળતા મળી હતી.
બાતમીના આધારે પોલીસે જામનગર રોડ પર એઈમ્સ તરફ જતાં માર્ગ પરથી ઋત્વિક ભરત ઉર્ફે શક્તિ દુધૈયા (ઉ.વ.26) અને રત્નદીપસિંહ ભરતસિંહ પરમાર (ઉ.વ.23)ની ધરપકડ કરી હતી. બંને પાસેથી ચોરીમાં વપરાયેલી વર્ના કાર, રોકડ રકમ અને તિજોરી મળી કુલ રૂ.10.65 લાખનો મુદ્દામાલ જપ્ત કરવામાં આવ્યો છે.
પૂછપરછ દરમિયાન રત્નદીપસિંહે અગાઉ ફરિયાદી પાસેથી રૂ.25 હજારની લોન લીધી હોવાનું સામે આવ્યું હતું. ફરિયાદી ફાયનાન્સર હોવાથી તેની ઓફિસમાં મોટી રકમ હોવાની ધારણાએ બંનેએ ચોરીનો પ્લાન બનાવ્યો હતો. આ માટે અમદાવાદથી સેલ્ફ ડ્રાઈવમાં કાર ભાડે લઈ રાજકોટ આવી તાળું તોડી તિજોરી ઉઠાવી ફરાર થયા હતા.
પ્રાથમિક પૂછપરછમાં આરોપીઓએ આર્થિક સંકડામણને કારણે ચોરી કરી હોવાનું જણાવ્યું છે. નોંધનીય છે કે જે ઓફિસમાં ચોરી થઈ હતી તે હાલ પોલીસ કમિશ્નર કચેરીમાં ફરજ બજાવતા એક પીએસઆઈના પુત્રની હોવાનું પણ તપાસમાં સામે આવ્યું છે.
