સોલડી ટોલનાકા પાસેથી કારપેટની આડમાં લઇ જવાતો દારૂ ઝડપી પાડતી રાજકોટ રેન્જ
કારપેટ નીચે સંતાડેલી દારૂ-બિયરની 9,792 બોટલ જપ્ત, 28.14 લાખના મુદ્દામાલ સાથે બે શખ્સ ઝડપાયા : સ્થાનિક બુટલેગરોની શોધખોળ તેજ
અગ્ર ગુજરાત, રાજકોટ
ગુજરાતમાં દારૂની કડક અમલવારી વચ્ચે બુટલેગરો દારૂ ઘુસાડવા માટે અવનવા કીમિયા અપનાવતા હોય છે. આવો જ એક કીમિયો રાજકોટ રેન્જ પોલીસે નિષ્ફળ બનાવ્યો છે. સુરેન્દ્રનગર જિલ્લાના ધાંગધ્રા તાલુકામાંથી પસાર થઈ રહેલી એક ટ્રકમાંથી કારપેટના રોલની આડમાં છુપાવીને લઈ જવાતો વિદેશી દારૂ અને બીયરનો મોટો જથ્થો પોલીસે ઝડપી પાડ્યો છે. પોલીસે બે આરોપીઓની અટકાયત કરી કુલ રૂ.28,14,994 નો મુદ્દામાલ જપ્ત કરી કાર્યવાહી હાથ ધરી હતી.
દરોડાની વિગત મુજબ, રાજકોટ રેન્જ આઈજી નિર્લિપ્ત રાય દ્વારા રાજકોટ રેન્જ હેઠળ આવતા તમામ જિલ્લાઓમાં ગેરકાયદેસર દારૂ અને જુગારની પ્રવૃત્તિઓ આચરતા તત્વો સામે કડક કાર્યવાહી કરવાના અપાયેલ ખાસ આદેશથી પીઆઈ અપૂર્વ પટેલની રાહબરીમાં પીએસઆઇ પી.એન.મોરી, બી.સી.મીયાત્રા, સી.એમ.કાંટેલીયા અલગ અલગ ટીમ સાથે ટેકનિકલ એનાલિસિસ, અને હ્યુમન સોર્સના આધારે ગુનેગારોને શોધવા સતત પેટ્રોલિંગ અને વોચમાં હતી.
દરમિયાન પીએસઆઇ સી.એમ.કાંટેલીયા તેમજ તેમના સ્ટાફના ધર્મેન્દ્રસિંહ વાઘેલા, રાજદિપસિંહ ઝાલા, ફતેસંગ પરમાર, કાસમભાઈ બ્લોચ અને ધર્મેન્દ્રસિંહ જાડેજા સુરેન્દ્રનગર વિસ્તારમાં પેટ્રોલિંગ કરી રહ્યા હતા.
ત્યારે ધાંગધ્રાના સોલડી ટોલનાકા પાસે પહોંચતા જ સ્ટાફને હરિયાણા પાસિંગની એક ટ્રક નં. HR-67-A-8964 નો ડ્રાઈવર ગેરકાયદેસર વિદેશી દારૂનો મોટો જથ્થો ભરીને ત્યાંથી પસાર થવાનો છે તેવી મળેલ ચોક્કસ બાતમીના આધારે ટીમ વોચમાં હતી ત્યારે સોલડી ટોલનાકા પાસેથી ટ્રક પસાર થતા જ પોલીસ ટીમે તેને કોર્ડન કરીને રોકી લીધી હતી.
પ્રાથમિક તપાસમાં ટ્રકની અંદર કારપેટના મોટા રોલ ભરેલા દેખાતા હતા. પરંતુ પોલીસે જ્યારે ઊંડાણપૂર્વક ચેક કર્યું, ત્યારે કારપેટના રોલની આડમાં સંતાડેલી વિદેશી દારૂની બોટલો અને બીયરના ટીન મળી આવ્યા હતા. પોલીસે ગણતરી કરતા કુલ 9,792 નંગ વિદેશી દારૂ/બીયર રૂ.13.34 લાખનો જથ્થો મળી આવ્યો હતો.
પોલીસે આ ગેરકાયદેસર હેરફેરના મામલે ટ્રકમાં સવાર બે શખ્સો સંદિપકુમાર વિનોદકુમાર શાહુ (ડ્રાઈવર, રહે. ભોજાસર, હનુમાનગઢ, રાજસ્થાન), અને રણવીરસિંગ મહેન્દ્રસિંગ ઘાયલ (ડ્રાઈવર/ક્લીનર, રહે. ચીડીયાગાંધી, હનુમાનગઢ, રાજસ્થાન) ની ધરપકડ કરી દારૂ, ટ્રક, કારપેટના રોલ સહિત કુલ રૂ.28.24 લાખનો મુદામાલ કબ્જે કર્યો હતો.
જ્યારે ટ્રક સોંપનાર મહેશ (રહે. ભટ્ટ, ફતેહાબાદ, હરિયાણા), દારૂનો જથ્થો મંગાવનાર સ્થાનિક બુટલેગર, ટ્રકના મૂળ માલિક તેમજ સહિતના શખ્સો વિરૂદ્ધ ધાંગધ્રા તાલુકા પોલીસ સ્ટેશનમાં ગુનો દાખલ કરાવી આગળની કાયદેસરની તપાસ હાથ ધરી છે.
