RTOની પોલ ખૂલી : AI ડ્રાઇવિંગ ટેસ્ટમાં ૫૭.૨૬ ટકા નાપાસ
નોર્મલ ટ્રેકમાં પાસીંગનો રેસીયો ૫૦ થી ૬૦ ટકા, AI આવતા લાઇસન્સ લેનાર અરજદારની યોગ્યતાની બરાબરની ચકાસણીમાં ચોંકાવનારા પરિણામો
સૌથી વધારે કાર ચાલકો સિગ્નલ અને પેરેરલ પાર્કિંગમાં થતા નાપાસ : પાસ થવાનો રેશિયો ઘટયો
અગ્ર ગુજરાત, રાજકોટ
રાજકોટ સહિત રાજયભરની આરટીઓ કચેરીમાં હાલમાં એઆઇ દ્વારા ડ્રાઇવિંગ ટેસ્ટ લેવામાં આવી રહી છે. જેમાં ચોંકાવનારા આંકડાઓ સામે આવી રહ્યાં છે. જેમાં ૭૭ ટકા ઉમેદવારો નાપાસ થઇ રહ્યાં છે. લોકોની ડ્રાઇવિંગ ક્ષમતાની તંત્રની મીઠી નજરની પોલ એઆઇએ ખોલી નાંખી છે.
રાજકોટ સહિત રાજ્યના 26 RTOમાં AI ટ્રેક શરૂ કરાયા છે. પરંતુ આ મશીનરી સામે માણસ લાચાર હોય તેવી પરિસ્થિતિનું નિર્માણ થયું છે. નોર્મલ ટ્રેકમાં ફોર વ્હીલર વાહનોમાં ટેસ્ટ ટ્રેક પર પાસીંગ રેશિયો 50થી 60 ટકા હતો. AI ટ્રેક શરૂ થતા તેમાં ધરખમ ઘટાડો જોવા મળી રહ્યો છે. હાલમાં ફોર વ્હીલર ટેસ્ટ આપતા અરજદારોમાં માત્ર 15થી 20 ટકા અરજદારો જ પાસ થઈ રહ્યા છે. ટુ-વ્હીલર અરજદારોમાં પણ આ જ સ્થિતિ જોવા મળે છે. અધિકારીઓની ટીમે આપેલી માહિતી અનુસાર સૌથી વધુ ફોર વ્હીલર ચાલકો સિગ્નલ અને પેરેરલ પાર્કિંગમાં ફેલ થતા જોવા મળ્યા હતા.
આ ટેસ્ટ માટે 130 સેકન્ડ હોય છે. જેમાં મોટા ભાગના અરજદારો ફેલ થઈ રહ્યા છે. સાથે સાથે કેટલાક અરજદારો સિગ્નલ અંગે જાગૃત ન હોવાથી અને સૂચનાઓનું પાલન ન કરવાના અભાવે નાપાસ થતા હોવાનું સામે આવ્યું છે. સિગ્નલ રેડ હોવા છતાં ફોર વ્હીલર ચાલકો ટેસ્ટ માટે આગળ વધે છે, અંતમાં પરિણામ ફેલ આવે છે.
રાજ્યના 26 RTO/ARTO ખાતે 1 મેથી 28 જૂન 2026 દરમિયાન લેવાયેલા AI આધારિત ટેસ્ટના પરિણામોએ ચોંકાવનારી તસવીર રજૂ કરી છે. કુલ 76,161 ઉમેદવારો ડ્રાઇવિંગ ટેસ્ટમાં હાજર રહ્યા હતા, જેમાંથી 43,611 ઉમેદવારો પાસ થયા જ્યારે 32,550 ઉમેદવારો નિષ્ફળ રહ્યા. આમ કુલ પાસ ટકાવારી 57.26 ટકા અને નિષ્ફળતા 42.73 ટકા નોંધાઈ છે. ખાસ કરીને LMV (ફોર વ્હીલર) ટેસ્ટમાં પરિણામ અત્યંત નબળું રહ્યું છે. ફોર વ્હીલરની પરીક્ષામાં 32,729 ઉમેદવારોમાંથી માત્ર 7,588 ઉમેદવારો પાસ થયા છે, એટલે કે પાસ ટકાવારી માત્ર 23.18 ટકા રહી છે, જ્યારે 25,141 ઉમેદવારો (76.81%) નિષ્ફળ રહ્યા છે.
બીજી તરફ ટુ-વ્હીલર ટેસ્ટમાં 43,432 ઉમેદવારોમાંથી 36,023 ઉમેદવારો પાસ થયા છે અને 82.94 ટકાની ઊંચી સફળતા નોંધાઈ છે, જ્યારે માત્ર 7,409 ઉમેદવારો (17.05%) નિષ્ફળ રહ્યા છે. રાજ્ય સરકારે ડ્રાઇવિંગ લાયસન્સ પ્રક્રિયામાં પારદર્શિતા અને માનવીય હસ્તક્ષેપ ઘટાડવા માટે AI આધારિત ઓટોમેટેડ ડ્રાઇવિંગ ટેસ્ટ ટ્રેક અમલમાં મૂક્યા છે, જેમાં સેન્સર અને કેમેરાની મદદથી ઉમેદવારની કામગીરીનું સ્વયંસંચાલિત મૂલ્યાંકન કરવામાં આવે છે. આ આંકડાઓ દર્શાવે છે કે AI સિસ્ટમમાં ફોર વ્હીલર ડ્રાઇવિંગ ટેસ્ટ વધુ કઠિન બન્યો છે અને નિયમોના સંપૂર્ણ પાલન કરનારા ઉમેદવારોને જ સફળતા મળી રહી છે.
ડિસ્પ્લેની સૂચનાને અવગણતા ફેઇલ
નવા ટ્રેકના ફેલ થવાના કેટલાક કારણો પણ સામે આવ્યા છે. જેમાં ખાસ કરીને સિગ્નલ ગ્રીન થયા બાદ આગળ વધવાનું હોય છે છતાં રેડ સિગ્નલ ટેસ્ટ માટે અરજદારો આગળ વધે છે. સાથે ઢાળ ચઢતા વાહન પરત આવે ત્યારે ફેલ થાય છે. સાથે મોટા ભાગના અંતિમ પેરેરલ પાર્કિંગમાં પ્રોપર પાર્ક કરી શકતા નથી અને સમય વધુ નીકળે છે જેથી ફેલ થઈ રહ્યા છે. સાથે આપેલ ડિસ્પ્લેની સૂચનાને અવગણવાથી ફેલ થઈ રહ્યા છે.
નિયમથી અજાણ હોવાથી નાપાસ
આ ટેસ્ટ ટ્રેક પર ફેલ થવાના મુખ્ય કારણોમાં અરજદારો ખાસ કરીને ટ્રાફિક રૂલ્સની અવેરનેસ હોવી ખુબજ જરૂરી હોય છે. સાથે વ્હીકલ પ્રોપર આવડવું જરૂરી છે, આ ટ્રેક માટે વીડિયોગ્રાફી જોઈ સમજીને ટેસ્ટ આપવો ખૂબ જરૂરી છે. તેને સમજ્યા કે જોયા વગર ટેસ્ટ આપનાર અરજદારો પેરેરલ પાર્કિંગ કે રિવર્સમાં ફેલ થતા હોય છે.
