કણસાગરા મહિલા કોલેજની નવી વિદ્યાર્થીનીઓ NSSના રાષ્ટ્રસેવા યજ્ઞમાં જોડાઈ
અગ્ર ગુજરાત, રાજકોટ
કે.એસ.એન. કણસાગરા મહિલા કોલેજ, રાજકોટના એન.એસ.એસ. (NSS) વિભાગ દ્વારા તાજેતરમાં જ કોલેજ કેમ્પસ ખાતે નવા જોડાયેલા સ્વયંસેવકો માટે ‘NSS ઓરિએન્ટેશન એન્ડ ઇન્ડક્શન પ્રોગ્રામ’નું ખૂબ જ સફળ આયોજન કરવામાં આવ્યું હતું. શૈક્ષણિક વર્ષના પ્રારંભે યોજાયેલા આ કાર્યક્રમનો મુખ્ય હેતુ પ્રથમ વર્ષની નવી વિદ્યાર્થીનીઓને રાષ્ટ્રીય સેવા યોજના (NSS)ના ઉદ્દેશ્યો, તેની વિવિધ સામાજિક પ્રવૃત્તિઓ અને યુવા વિકાસમાં તેના મહત્વથી વિસ્તૃત રીતે માહિતગાર કરવાનો હતો.
આ ઓરિએન્ટેશન પ્રોગ્રામનું સમગ્ર સંચાલન અને માર્ગદર્શન સંસ્થાના પ્રિન્સિપાલ ડૉ. સ્નેહલ કોટક તથા NSS પ્રોગ્રામ ઓફિસર ડૉ. રેણુકા બી. ચાવડા દ્વારા કરવામાં આવ્યું હતું. કાર્યક્રમ દરમિયાન વિદ્યાર્થીનીઓને NSSના મુખ્ય ધ્યેયસૂત્ર “Not Me But You” (હું નહીં પણ તમે) પાછળની ભાવના સમજાવવામાં આવી હતી, તેમજ વર્ષ દરમિયાન થનારા રક્તદાન કેમ્પ, આરોગ્ય જાગૃતિ અભિયાન, અને વિશેષ ગ્રામ્ય શિબિર (Special Camp) જેવી નિયમિત પ્રવૃત્તિઓની પાયાની માહિતી આપવામાં આવી હતી.
સત્રના અંતે ઉપસ્થિત મહાનુભાવો દ્વારા નવી સ્વયંસેવિકાઓને દેશ અને સમાજ પ્રત્યે પોતાની જવાબદારી નિભાવવા તથા NSSના માધ્યમથી પોતાના નેતૃત્વ ગુણો ખીલવવા માટે પ્રોત્સાહિત કરવામાં આવ્યા હતા. આ કાર્યક્રમમાં કોલેજની પ્રથમ વર્ષની બહેનોએ ખૂબ જ ઉત્સાહપૂર્વક ભાગ લઈ રાષ્ટ્રસેવાના આ કાર્યમાં જોડાવાનો સંકલ્પ કર્યો હતો.
