મેટોડા GIDCમાં ફેક્ટરીની ઓરડીમાંથી 597 ગ્રામ ગાંજો ઝડપાયો, મધ્યપ્રદેશના બે શ્રમિકો સકંજામાં
રૂરલ એસઓજીની પ્રાથમિક પૂછપરછમાં વ્યક્તિગત નશા માટે વતનથી ગાંજો લાવ્યાની કબૂલાત, રૂ.39,850નો મુદ્દામાલ જપ્ત
અગ્ર ગુજરાત, રાજકોટ
રાજકોટ જિલ્લાના મેટોડા જીઆઈડીસી વિસ્તારમાં આવેલી એક ફેક્ટરીની ઓરડીમાં છુપાવી રાખવામાં આવેલ ગાંજાના જથ્થા સાથે રૂરલ એસઓજીએ બે પરપ્રાંતીય શ્રમિકોની ધરપકડ કરી છે. પોલીસે આશરે 597 ગ્રામ ગાંજો અને મોબાઈલ ફોન સહિત કુલ રૂ.39,850નો મુદ્દામાલ કબજે કરીને એનડીપીએસ એક્ટ હેઠળ આગળની કાર્યવાહી હાથ ધરી છે.
મળતી માહિતી મુજબ, જિલ્લા પોલીસ વડા વિજયસિંહ ગુર્જરના માર્ગદર્શન હેઠળ ગ્રામ્ય વિસ્તારમાં ચાલી રહેલા ‘સે નો ટુ ડ્રગ્સ મિશન’ અંતર્ગત માદક પદાર્થો સામે સઘન અભિયાન ચલાવવામાં આવી રહ્યું છે. તેના ભાગરૂપે રૂરલ એસઓજીના પીઆઈ એફ.એ. પારગીના માર્ગદર્શન હેઠળ પીએસઆઈ પી.બી. મિશ્રાની ટીમ મેટોડા જીઆઈડીસી વિસ્તારમાં પેટ્રોલિંગમાં હતી. તે દરમિયાન હેડ કોન્સ્ટેબલ મયુરભાઈ વિરડા અને કોન્સ્ટેબલ વિપુલભાઈ ગોહિલને ચોક્કસ બાતમી મળી હતી કે મેટોડા જીઆઈડીસીના ગેટ નંબર-2 અને 3 વચ્ચે આવેલી એડવિક હાઇટેક કંપનીની ઓરડીમાં ગાંજો છુપાવી રાખવામાં આવ્યો છે. બાતમીના આધારે પોલીસે તાત્કાલિક દરોડો પાડી તપાસ કરતાં ઓરડીમાંથી 597 ગ્રામ ગાંજો મળી આવ્યો હતો.
આ કાર્યવાહી દરમિયાન પોલીસે શિવા રાજુ બેલે અને અંકિત રામજી બેલે (મૂળ વતન બેતુલ, મધ્યપ્રદેશ, હાલ મેટોડા જીઆઈડીસીમાં રહેતા)ની ધરપકડ કરી હતી. આરોપીઓ પાસેથી ગાંજા ઉપરાંત મોબાઈલ ફોન પણ કબજે કરવામાં આવ્યો હતો. પ્રાથમિક પૂછપરછમાં બંને આરોપીઓએ પોતે ગાંજાના બંધાણી હોવાનું અને વ્યક્તિગત નશા માટે મધ્યપ્રદેશથી ગાંજો લઈને આવ્યા હોવાનું જણાવ્યું હોવાનું પોલીસ સૂત્રોએ જણાવ્યું છે. જોકે, પોલીસે આ દાવાની પણ ચકાસણી શરૂ કરી છે અને ગાંજાનો જથ્થો અન્ય કોઈને સપ્લાય કરવાનો ઈરાદો હતો કે નહીં તે દિશામાં વધુ તપાસ હાથ ધરી છે.
