કેર એન્ડ ક્યોર ફાઉન્ડેશનની કેન્સર દર્દીઓ માટે નિઃશુલ્ક ઘરઆંગણે ડ્રેસિંગ સેવા
કેન્સરના ઓપરેશન બાદ રખાતી કાળજી અંગે જનજાગૃતિ અભિયાન
અગ્ર ગુજરાત, રાજકોટ
રાજકોટ સ્થિત કેર એન્ડ ક્યોર ફાઉન્ડેશન દ્વારા સમગ્ર ગુજરાતમાં કેન્સર દર્દીઓ માટે માનવતાભરી નિઃશુલ્ક સેવાઓ સતત આપવામાં આવી રહી છે. ફાઉન્ડેશનની ટીમ દ્વારા કેન્સરના દર્દીઓના ઘરે જઈને સંપૂર્ણપણે નિઃશુલ્ક ડ્રેસિંગ સેવા તેમજ જરૂરી ડ્રેસિંગ કિટ ઉપલબ્ધ કરાવવામાં આવે છે, જેથી દર્દીઓને વારંવાર હોસ્પિટલના ધક્કા ન ખાવા પડે અને યોગ્ય સારવાર સાથે આરામદાયક રીતે ઘરે જ સંભાળ મળી રહે.
આ ઉપરાંત ફાઉન્ડેશન દ્વારા સમગ્ર ગુજરાતમાં કેન્સર જાગૃતિ અભિયાન પણ ચલાવવામાં આવી રહ્યું છે. જેમાં લોકોને કેન્સરથી બચવાના ઉપાયો, સમયસર તપાસનું મહત્વ તેમજ વહેલા નિદાન અંગે માર્ગદર્શન આપવામાં આવે છે.
સાથે જ કેન્સરના ઓપરેશન બાદ દર્દીએ કેવી રીતે કાળજી રાખવી, ઘા (વાઉન્ડ)ની યોગ્ય સંભાળ કેવી રીતે લેવી, ઇન્ફેક્શનથી કેવી રીતે બચવું અને ડોકટરની સલાહ મુજબ સારવાર ચાલુ રાખવી જેવી મહત્વપૂર્ણ બાબતો અંગે પણ લોકોમાં જાગૃતિ લાવવામાં આવે છે. આવી આરોગ્ય જાગૃતિ દર્દીઓના ઝડપી સ્વાસ્થ્યલાભમાં મદદરૂપ બને છે.
કેર એન્ડ ક્યોર ફાઉન્ડેશનના ટ્રસ્ટી નરેશભાઈ બારડના માર્ગદર્શન હેઠળ આ સેવાઓ સમગ્ર ગુજરાતમાં ઉપલબ્ધ છે. જો તમારા પરિવારમાં, સગા-સંબંધીઓમાં અથવા આસપાસ કોઈ કેન્સરનો દર્દી હોય અને તેને નિઃશુલ્ક ઘરઆંગણે ડ્રેસિંગ સેવા અથવા માર્ગદર્શનની જરૂર હોય, તો નરેશભાઈ બારડ મો. 92740 82636 પર સંપર્ક કરવા યાદીમાં જણાવ્યું છે.
