શ્રાવણમાં જુગારનો જુવાળ : રાજકોટ ગ્રામ્યમાં 10 દરોડા, 55 પત્તાપ્રેમીઓ પોલીસની ઝપટે
સ્ટ્રીટ લાઇટથી વાડીની સીમ અને મકાન સુધી જુગારના અડ્ડા ધમધમ્યા; રોકડ, મોબાઈલ અને વાહનો સહિત લાખોનો મુદ્દામાલ જપ્ત
અગ્ર ગુજરાત, રાજકોટ
શ્રાવણ માસ દરમિયાન રાજકોટ ગ્રામ્ય વિસ્તારમાં જુગારની પ્રવૃત્તિ સામે પોલીસે એકસાથે કડક કાર્યવાહી કરતાં જુગારના દસ અલગ-અલગ દરોડામાં કુલ 55 શખ્સ પોલીસની ઝપટે ચડ્યા હતા. સડકપીપળીયા, સાંગણવા, વાદીપરા, સમઢીયાળા, શાપર, અમરનગર, જેતપુર, દેરડી ધાર, વાસાવડ અને અરણી સહિતના વિસ્તારોમાં પોલીસે પત્તા રમતા શખ્સોને ઝડપી લઈ રોકડ રકમ, મોબાઈલ ફોન તથા વાહનો સહિતનો મુદ્દામાલ કબજે કર્યો હતો.
ગોંડલ તાલુકા પોલીસે સડકપીપળીયા ગામે લિયોન સ્ટીલ કંપની નજીક જાહેરમાં જુગાર રમતા વિરેન્દ્ર રાજભર, ધર્મેન્દ્ર ભારતી, સુનીલ રાજભર, બિરજુ બીંદ અને અશ્વિન ભીલને ઝડપી રૂ.4,060 કબજે કર્યા હતા.
લોધિકા પોલીસે સાંગણવા ગામની છેવાડાની શેરીમાં સ્ટ્રીટ લાઇટના અજવાળે પત્તા રમતા મનોજ દાફડા, કિશોર બગડા, જયદીપ રાખૈયા, કાનજી મકવાણા, ખોડા ખીમસુરીયા અને રવિ રાખૈયાને પકડી રોકડ તથા મોબાઈલ સહિત રૂ.1.05 લાખનો મુદ્દામાલ જપ્ત કર્યો હતો.
કોટડા સાંગાણી પોલીસની ટીમે વાદીપરા ગામે માયાણીના મઢ પાસે દરોડો પાડી પ્રકાશ મકવાણા, પરબત માયાણી, મુકેશ વાઘેલા, વિપુલ માયાણી અને મનસુખ બારૈયાને ઝડપી રૂ.30,320નો મુદ્દામાલ કબજે કર્યો હતો.
વિંછિયા પોલીસે સમઢીયાળા ગામની સીમમાં વાડી નજીક જુગારના અડ્ડા પર દરોડો પાડતાં અલ્પેશ જાદવભાઈ મીઠાપરા ઝડપાયો હતો, જ્યારે અન્ય પાંચ શખ્સો નાસી છૂટ્યા હતા. પોલીસે અહીંથી રોકડ અને બે વાહનો સહિત રૂ.35,450નો મુદ્દામાલ કબજે કર્યો હતો.
શાપર પોલીસે ગંગા ફોર્જી ગેટની અંદર તળાવ પાછળના ઇન્ડસ્ટ્રીયલ વિસ્તારમાં સ્ટ્રીટ લાઇટ નીચે જુગાર રમતા કાસીમ બિહના, અભિષેક અહેરવાલ, ધર્મેન્દ્ર લોધી, સંતોષકુમાર પ્રસાદ, રામશંકર લોધી અને અરુણ જાદવને ઝડપી રોકડ તથા મોબાઈલ સહિત રૂ.46,460નો મુદ્દામાલ કબજે કર્યો હતો.
જેતપુર તાલુકા પોલીસે અમરનગરમાં પ્રાથમિક આરોગ્ય કેન્દ્ર પાસે શેરીમાં જુગાર રમતા ધર્મેશ આલાણી, રવજી સાવલિયા, સાગર વાઘમસિંહ અને પાર્થ ખુટને ઝડપી રૂ.2,050 રોકડ કબજે કરી હતી.
જેતપુર સિટી પોલીસે દેસાઈવાડી શેરી નં.5માં રવજી ઉર્ફે ચીનો મોતીભાઈ સોલંકીના મકાનમાં દરોડો પાડી રવજી સહિત દિનેશ રાવલ, વિજય ચાવડા, અશ્વિન સાવલિયા, સંજય સુબા અને વિપુલ ભૂતને ઝડપી રૂ.23,940નો મુદ્દામાલ કબજે કર્યો હતો.
જેતપુર ઉદ્યોગનગર પોલીસે દેરડી ધાર આવાસ યોજના નજીક સ્ટ્રીટ લાઇટના અજવાળે જુગાર રમતા ભાવિક પરમાર, અયાઝ ઠાસરીયા, નઈમ મારફતિયા, વસીમ ગાંધી, એજાજ લાખાણી, વત્સલ સુચર, આયુષ ગોસાઈ, તુફેલ ખેડા અને અફઝલ શાહમદાર સહિત નવ શખ્સોને ઝડપી કાર્યવાહી કરી હતી.
સુલતાનપુર પોલીસે વાસાવડ ગામે ખાટવાડા શેરી પાસે દરોડો પાડી વિજય મૂળિયા, લાલજી ભાખોત્રા, ચેતન પરમાર, ગોપાલ સરવૈયા, અરવિંદ સરવૈયા, ભરત સરવૈયા, ગોપાલ ભાખોત્રા અને કિશન બાવળિયા સહિતના શખ્સોને ઝડપી લીધા હતા. અહીંથી રૂ.55,350 રોકડ તથા આઠ મોબાઈલ સહિત કુલ રૂ.95,350નો મુદ્દામાલ મળ્યો હતો.
અંતિમ કાર્યવાહીમાં ભાયાવદર પોલીસની ટીમે અરણી ગામે પ્લોટ વિસ્તારમાં નારણ કાંધા ખાંભલાના માલઢોર બાંધવાના વાડા પાસે દરોડો પાડી નારણ કાંધા ખાંભલા, આમદ ઉર્ફે કવો કાસમ નોઈડા, પંકજ ગાગજી સખીયા અને ઉમેશ અમરશીગ લખતરિયાને ઝડપી લીધા હતા. પોલીસે રોકડ, મોબાઈલ અને બાઈક સહિત રૂ.1,57,470નો મુદ્દામાલ કબજે કરી કાયદેસરની કાર્યવાહી હાથ ધરી હતી. શ્રાવણ માસમાં જુગારની પ્રવૃત્તિ પર બ્રેક લગાવવા ગ્રામ્ય પોલીસે અલગ-અલગ વિસ્તારોમાં હાથ ધરેલી આ કાર્યવાહીએ પત્તાના અડ્ડાઓ ચલાવતા તથા જાહેરમાં જુગાર રમતા તત્વોમાં ફફડાટ ફેલાવ્યો છે.
