રાજકોટ નગર રચના યોજના નં.૧ની પ્રારંભિક યોજના જાહેર
માહિતી, નકશા તથા નિર્ણયોની નકલ કચેરી ખાતે ખુલ્લી મુકાઈ
અગ્ર ગુજરાત, રાજકોટ
રાજકોટ નગર રચના અધિકારી દ્વારા નગર રચના યોજના નં. ૧ (રાજકોટ) (ત્રીજો ફેરફાર)ની પ્રારંભિક યોજના અંગેના નિર્ણયો ગત તા. ૨૩/૧૦/૨૦૨૬ ને શુક્રવારના રોજ જાહેર કરવામાં આવ્યા છે. જે અન્વયે પ્રારંભિક યોજના સરકારમાં મંજૂરી માટે સાદર કરવામાં આવી રહેલી છે. તેમજ જે તે પ્લોટ માટે લેવાયેલા નિર્ણયોના ઉતારા નમૂના -‘ઠ’ની નકલ યોજનામાં સમાવિષ્ટ દરેક જમીન માલિકોને તેમજ તેમાં હિત ધરાવનાર વ્યક્તિઓને પહોંચાડવાની તજવીજ કરવામાં આવી રહેલી છે.
તૈયાર કરવામાં આવેલી ઉપરોક્ત પ્રારંભિક યોજનાની સંપૂર્ણ માહિતી, નકશા તેમજ નિર્ણયોની એક નકલ નગર રચના અધિકારીની કચેરી, પ્રવર નગર નિયોજકની કચેરી, રૂડા બિલ્ડીંગ, છઠ્ઠો માળ, ચીમનભાઈ પટેલ વિકાસ ભવન, જામનગર રોડ, રાજકોટ ખાતે રજાના દિવસો સિવાય કચેરી સમય દરમિયાન નિરીક્ષણ માટે ખુલ્લા રાખવામાં આવેલા છે. આ યોજનાની સમજ આપવા માટે કચેરીમાં યોગ્ય વ્યવસ્થા કરવામાં આવેલી છે, તેમ પ્રવર નગર નિયોજકની કચેરીની યાદીમાં જણાવાયું છે.
