જેતપુરના પીઠડીયામાં વીજ ધાંધીયાથી ઢોલ, નગારા સાથે કચેરી બહાર સ્થાનિકોના ધરણા

અમુ સિંગલ જેતપુર

જેતપુરના પીઠડીયામાં વીજ ધાંધીયાથી ઢોલ, નગારા સાથે કચેરી બહાર સ્થાનિકોના ધરણા

PGVCLની બેદરકારી સાથે ગ્રામજનો દ્વારા વિરોધ પ્રદર્શન: યોગ્ય કરવા માંગણી

અગ્ર ગુજરાત, જેતપુર

રાજકોટ જિલ્લાના જેતપુર તાલુકાના પીઠડીયા ગામે વીજળીના ભારે અનિયમિત અને ખોરવાતા પ્રવાહથી પરેશાન થઈને ગ્રામજનો અને સ્થાનિક ખેડૂતો આક્રમક મૂડમાં જોવા મળ્યા છે. પીજીવીસીએલ (PGVCL) ની બેદરકારી અને નબળી વીજ પૂરવઠા વ્યવસ્થા સામે રોષે ભરાયેલા ગામલોકોએ આજે ઢોલ-નગારા વગાડીને અનોખી રીતે ધરણાં યોજી ઉગ્ર વિરોધ પ્રદર્શન કર્યું હતું.

સ્થાનિક લોકો અને ખેડૂતોના જણાવ્યા અનુસાર, પીઠડીયા ગામમાં છેલ્લા લાંબા સમયથી વીજળી પુરતી મળતી નથી. અઠવાડિયામાં ૪ થી ૫ વખત ગમે ત્યારે અચાનક વીજળી ગુલ થઈ જાય છે. જ્યોતિગ્રામ યોજના અંતર્ગત મળતી વીજળીમાં વારંવાર થતા ટ્રીપિંગ અને અસહ્ય પાવર કટના કારણે રોજિંદુ જીવન અસ્તવ્યસ્ત બન્યું છે. રાત્રે પણ અચાનક વીજળી વઈ જવાથી ત્રણથી ચાર કલાક સુધી અંધારપટ છવાયેલો રહે છે, જેના કારણે ઘરોમાં રહેતા નાના બાળકો અને વડીલોને આ ગરમીની સિઝનમાં ભારે મુશ્કેલીઓનો સામનો કરવો પડે છે.

આંદોલનકારીઓએ રોષ વ્યક્ત કરતા જણાવ્યું હતું કે, પીઠડીયાથી ધારેશ્વર સુધીની વીજ લાઈન અંદાજે ૨૫ વર્ષ જૂની છે. આ જૂની અને જર્જરિત એક જ લાઈન ઉપર જ્યોતિગ્રામનો પાવર, ઇન્ડસ્ટ્રીયલ (ઉદ્યોગ) પાવર તેમજ ખેતીવાડીના થ્રી-ફ્સે કનેક્શનોનો ભાર આપવામાં આવ્યો છે. આ લાઈનમાં અસંખ્ય આંધા (સાંધા) હોવાને કારણે જરાક પવન કે ભાર વધતા જ વીજ પુરવઠો ખોરવાઈ જાય છે. જો ખેતીવાડી, ઉદ્યોગ અને ગામની લાઈન અલગ અલગ કરી દેવામાં આવે, તો આ સમસ્યા કાયમી ધોરણે ઉકેલાઈ શકે તેમ છે.

ગ્રામજનોએ આક્ષેપ કર્યો છે કે વીજળી બાબતે અવારનવાર PGVCL તંત્રને રજૂઆતો કરવા છતાં કોઈ નક્કર કાર્યવાહી કરવામાં આવી નથી. લાઈટ વઈ ગયા બાદ વીજ કચેરીએ ફોન કરવાથી ફોન રિસીવ કરવામાં આવતા નથી, અને જો ફોન ઉપડે તો “અમારા માણસો લાઈન પર છે” તેવા ખાલી ખોટા ગોળગોળ જવાબ આપીને લોકોને કલાકો સુધી રાહ જોવડાવાય છે. બીજી બાજુ, વીજ બિલ ભરવામાં બે દિવસ પણ મોડું થાય તો વીજ કનેક્શન કાપી નાખવાની ધમકી આપતું તંત્ર સમયસર વીજળી આપવામાં કેમ નિષ્ફળ જાય છે તે મોટો સવાલ છે.

સમસ્યાનો વહેલી તકે ઉકેલ ન આવે તો ગ્રામજનોએ ચીમકી ઉચ્ચારી છે કે આ પ્રદર્શન માત્ર ગામ પૂરતું સીમિત નહીં રહે, પરંતુ આગામી દિવસોમાં પીજીવીસીએલની મુખ્ય કચેરીએ જઈને ઉગ્ર ધરણાં અને આંદોલન કરવામાં આવશે. તંત્ર દ્વારા કુંભકર્ણ નિંદ્રામાંથી જાગીને વહેલી તકે નવી લાઈન નાખવામાં આવે અને વીજ પુરવઠો નિયમિત કરવામાં આવે તેવી લોકમાં ઉગ્ર માંગ ઉઠી છે.