ભાજપના સ્નેહમિલનમાં આયાતીઓને માન-મોભો, મૂળ કાર્યકરો નારાજ
રોહન ગુપ્તાને CM, પ્રદેશ પ્રમુખની બાજુમાં સ્થાન મળ્યું, કોંગ્રેસમાંથી ભાજપમાં આવેલા આઠ નેતાઓને પહેલી હરોળમાં બેસાડાયા : ૨૦૨૭ ચૂંટણી પહેલા સખળ-ડખળની ચર્ચાએ જોર પકડયું
અગ્ર ગુજરાત, ગાંધીનગર
ગુજરાત ભાજપમાં ફરી એકવાર પક્ષના મૂળ કાર્યકરો અને કોંગ્રેસમાંથી આયાત થયેલા નેતાઓને મળતા સ્થાનને લઈને ચર્ચા જાગી છે. રાજકીય મંચ પર જોવા મળેલું એક દૃશ્ય ભાજપના સંગઠન માટે અસહજ સવાલો ઊભા કરી રહ્યું છે. કોંગ્રેસમાંથી ભાજપમાં આવેલા રોહન ગુપ્તા મંચ પર સ્થાન ધરાવતા જોવા મળ્યા, જ્યારે કોંગ્રેસમાંથી જ ભાજપમાં આવેલા આઠ દિગ્ગજ નેતાઓ મંચની સામે બેઠેલા જોવા મળ્યા.
ખાસ વાત તો એ છે કે રોહન ગુપ્તાને લઈને પૂર્વ નાયબ મુખ્યમંત્રી નીતિન પટેલે પણ અગાઉ સવાલ ઉઠાવ્યો હતો. નીતિન પટેલે કટાક્ષ કરતાં કહ્યું હતું કે, “કોણ રોહન ગુપ્તા? જેને મેં કમલમમાં ક્યારેય જોયા નથી!” પરંતુ આજે રાજકીય સમીકરણો એવા બદલાયા છે કે એ જ રોહન ગુપ્તા કમલમના મંચ પર મુખ્યમંત્રી ભૂપેન્દ્ર પટેલ, પ્રદેશ પ્રમુખ જગદીશ વિશ્વકર્મા અને ગુજરાત ભાજપના પ્રભારી તરુણ ચુઘની બાજુમાં ઊભેલા જોવા મળી રહ્યા છે. આ દૃશ્ય ભાજપના વર્ષો જૂના કાર્યકરો માટે ચોક્કસ ચર્ચાનો વિષય બન્યું છે.મંચની સામે બેઠેલા આ આઠ નેતાઓમાં બળવંતસિંહ રાજપૂત, નરહરિ અમીન, રાઘવજી પટેલ, કુંવરજી બાવળિયા, અર્જુન મોઢવાડિયા, અરવિંદ લાડાણી, બ્રિજેશ મેરજા અને જયરાજસિંહ પરમારનો સમાવેશ થાય છે.
અહીં સવાલ માત્ર મંચ પર કોણ બેઠું અને મંચની નીચે કોણ બેઠું તેનો નથી. પરંતુ સવાલ ભાજપની વર્ષો જૂની વિચારધારા અને સંગઠનમાં કામ કરતા મૂળ કાર્યકરોના માન-સન્માનનો છે. જે કાર્યકરો વર્ષોથી પક્ષ માટે પરસેવો પાડે છે, ચૂંટણીમાં મહેનત કરે છે અને સંગઠનને મજબૂત બનાવે છે, તેમને ઘણીવાર યોગ્ય સ્થાન મળતું નથી તેવી ફરિયાદો ઊઠતી રહી છે. બીજી તરફ, કોંગ્રેસમાંથી ભાજપમાં પ્રવેશેલા નેતાઓને પક્ષમાં મહત્વપૂર્ણ સ્થાન અને સન્માન મળતું હોવાની ચર્ચા કાર્યકરોમાં અસંતોષ વધારી રહી છે.
શું ભાજપમાં વર્ષો સુધી નિષ્ઠાથી કામ કરનારા કાર્યકરો કરતાં પક્ષપલટો કરીને આવેલા નેતાઓનું રાજકીય વજન વધારે છે? શું ભાજપમાં સ્થાન મેળવવા માટે વર્ષોની સંગઠનાત્મક મહેનત કરતાં રાજકીય પક્ષપલટો વધુ અસરકારક સાબિત થઈ રહ્યો છે?
આ દૃશ્યે ભાજપના આંતરિક વર્તુળોમાં ચર્ચાને વધુ તેજ બનાવી છે. પક્ષના નેતૃત્વ માટે પણ આ એક વિચારવા જેવો મુદ્દો છે કે જો મૂળ કાર્યકરોને જ યોગ્ય સન્માન અને સ્થાન નહીં મળે તો સંગઠન પ્રત્યેની તેમની નિષ્ઠા અને ઉત્સાહ કેવી રીતે જળવાઈ રહેશે?ભાજપમાં સત્તા અને સંગઠનના મંચ પર કોને સ્થાન મળે છે તે હવે માત્ર વ્યવસ્થાનો વિષય નથી રહ્યો, પરંતુ પક્ષના મૂળ કાર્યકરોના માન-સન્માન અને રાજકીય ભવિષ્ય સાથે જોડાયેલો મોટો સવાલ બની રહ્યો છે.
12 જેટલા જિલ્લા પ્રમુખો ગેરહાજર
દિવાળી સ્નેહમિલનના કાર્યક્રમમાં જિલ્લા સ્તરના સંગઠનની હાજરી અને સક્રિયતા પણ ચર્ચાનો વિષય બની હતી. અખબારી અહેવાલ મુજબ, કાર્યક્રમમાં 12 જેટલા જિલ્લા પ્રમુખો ગેરહાજર રહ્યા હતા. પ્રદેશ સ્તરે યોજાયેલી મહત્ત્વપૂર્ણ બેઠક અને સ્નેહમિલન હોવા છતાં જિલ્લા પ્રમુખોની આટલી સંખ્યામાં ગેરહાજરીને ગંભીરતાથી લેવામાં આવી હતી. ભાજપ જેવા શિસ્તબદ્ધ અને સંગઠન આધારિત પક્ષમાં જિલ્લા પ્રમુખોની ભૂમિકા મહત્ત્વપૂર્ણ હોય છે. સ્થાનિક કાર્યકરો સાથે સંપર્ક જાળવવો, પક્ષના કાર્યક્રમોનું આયોજન કરવું, લોકોની સમસ્યાઓ પ્રદેશ નેતૃત્વ સુધી પહોંચાડવી અને સંગઠનને સતત સક્રિય રાખવાની જવાબદારી જિલ્લા પ્રમુખોની હોય છે. આવી સ્થિતિમાં પ્રદેશ કક્ષાના કાર્યક્રમમાં તેમની ગેરહાજરીને માત્ર સામાન્ય ગેરહાજરી તરીકે જોવાને બદલે સંગઠનાત્મક જવાબદારીના દૃષ્ટિકોણથી પણ જોવામાં આવી રહી છે. આગામી દિવસોમાં આ અંગે પ્રદેશ નેતૃત્વ શું પગલાં લે છે તેના પર પણ નજર રહેશે.
‘માત્ર ઝભ્ભા પહેરીને ફરવાથી સંગઠન મજબૂત નહીં બને’ : પ્રદેશ પ્રમુખ
કમલમ ખાતે યુવા મોરચાના આગેવાનો અને હોદ્દેદારોની બેઠકમાં પ્રદેશ પ્રમુખ જગદીશ વિશ્વકર્માએ યુવા નેતાઓની કામગીરી અંગે સ્પષ્ટ નારાજગી વ્યક્ત કરી હતી. માત્ર ઝભ્ભા પહેરીને ફરવાથી કે નેતાનો દેખાવ કરવાથી સંગઠન મજબૂત બનતું નથી, પરંતુ લોકો વચ્ચે જઈને તેમની સાથે જોડાવાથી સાચું સંગઠન ઊભું થાય છે તેવો સ્પષ્ટ સંદેશ આપવામાં આવ્યો હતો. યુવા નેતાઓને સોશિયલ મીડિયા પૂરતી કામગીરી સીમિત ન રાખવા અને વાસ્તવિક રાજકીય મેદાનમાં ઉતરીને લોકો સાથે સંપર્ક વધારવા હાંકલ કરવામાં આવી હતી. લોકોની વચ્ચે જઈને તેમની સમસ્યાઓ સમજવી, યુવાનો સાથે સંવાદ કરવો અને પક્ષની કામગીરી વિશે વિશ્વાસ ઊભો કરવો એ યુવા કાર્યકરોની જવાબદારી હોવાનું ભારપૂર્વક સમજાવવામાં આવ્યું હતું.
મનદુ:ખ ભૂલી સ્નેહ જાળવી રાખવો : CM
મુખ્યમંત્રી ભૂપેન્દ્ર પટેલે જણાવ્યું હતું કે, વર્ષ દરમિયાન કોઈનામાં વધઘટ કે મનદુઃખ થયાં હોય તો ફરી એકસાથે મળીને સ્નેહ જાળવવાનો આ અવસર છે. ભાજપ પર પ્રજાએ જે વિશ્વાસ અને સ્નેહ મૂક્યો છે તેને વધુ મજબૂત બનાવવાનો સંકલ્પ આ સ્નેહમિલનમાં લેવાનો છે. જ્યાં હજુ અંધારું હોય ત્યાં આપણા વિકાસનો દીપક પ્રગટાવીએ અને વધુમાં વધુ લોકોનો પ્રેમ કેવી રીતે જીતી શકાય તે દિશામાં કામ કરીએ.તેમણે વધુમાં જણાવ્યું હતું કે, જે કોઈ અસંતુષ્ટ હોય તેને સંતુષ્ટ કેવી રીતે કરી શકાય તેવો સંકલ્પ પણ લેવો જોઈએ. સરકારની તમામ યોજનાઓ કાર્યકરોએ ઘર-ઘર સુધી પહોંચાડવાનું કામ કર્યું છે. વિકસિત ભારતના સંકલ્પને સાકાર કરવા માટે વિકસિત ગુજરાતનું નિર્માણ કરવાનો સંકલ્પ લઈએ અને દરેક વ્યક્તિનો પ્રેમ જીતવા માટે પ્રયત્ન કરીએ.


