- ગુજરાતની જેલો હાઉસફૂલ : કેપેસિટી 14 હજાર, કેદી 16,611
- ધો.10થી ઓછું ભણેલા 5703, ગ્રેજ્યુએશનથી ઓછું ભણેલા 2647
- ગુજરાતની વિવિધ જેલોમાં કેદીઓની ક્ષમતા કરતાં વધુ કેદીઓ રખાયા છે
એનસીઆરબીએ વર્ષ 2022નો જેલના કેદીઓને લગતો રિપોર્ટ જાહેર કર્યો છે, આ રિપોર્ટ પ્રમાણે 31મી ડિસેમ્બર 2022ની સ્થિતિએ ગુજરાતમાં ચાર સેન્ટ્રલ જેલ, 11 ડિસ્ટ્રિક્ટ જેલ, 2 મહિલા જેલ સહિત કુલ 32 જેલ છે. ગુજરાતની વિવિધ જેલોમાં કેદીઓની ક્ષમતા કરતાં વધુ કેદીઓ રખાયા છે એટલે કે ઠાંસી ઠાંસીને ભરાયા છે, જેલમાં 14,065 કેદીઓને રાખી શકાય તેટલી ક્ષમતા છે, જોકે 16,611 કેદીઓ હાલમાં જેલમાં સબડી રહ્યા છે, આમ કુલ ક્ષમતા સામે 118 ટકા કેદી છે. ક્ષમતા સામે પુરુષ કેદીઓ 124 ટકા વધારે છે જ્યારે મહિલાઓ માટેની જેલ 49 ટકા ભરાયેલી છે. ગુજરાતની જેલોમાં 12,766 હિન્દુ, 3361 મુસ્લિમ, 74 શીખ અને 56 ખ્રિસ્તી કેદી છે.
ગુજરાતની જેલોમાં 4,936 પુરુષ અને 208 મહિલા અને 4 ટ્રાન્સજેન્ડર એમ કુલ 5148 સજા પામેલા જ્યારે 10,770 પુરુષ અને 359 મહિલા એમ કુલ 11,129 અન્ડર ટ્રાયલ કેદીઓ છે. ગુજરાતમાં 31 ટકા સજા પામેલા અને 67 ટકા અન્ડરટ્રાયલ કેદી છે. એનસીઆરબીના આ રિપોર્ટ પ્રમાણે, સજા પામેલા 5,148 કેદીઓમાં 984 અશિક્ષિત, ધોરણ 10થી ઓછું ભણેલા 2981, 858 કેદી ધો.10થી ઓછું ભણેલા 858, 196 ડિપ્લોમા કે ડિગ્રી ધરાવતા 42 જ્યારે 87 પોસ્ટ ગ્રેજ્યુએટ કેદી છે.
અન્ડર ટ્રાયલ કેદીઓમાં અશિક્ષિત 1863, ધો.10થી ઓછું ભણેલા 5703, ગ્રેજ્યુએશનથી ઓછું ભણેલા 2647, ગ્રેજ્યુએટ થયેલા 632, ડિપ્લોમા ડિગ્રી વાળા 169, પોસ્ટ ગ્રેજ્યએટ 115 કેદી છે.
સેન્ટ્રલ જેલ અને સ્પેશિયલ જેલમાં કેદી કેટલા?
ગુજરાતની ચાર સેન્ટ્રલ જેલમાં 7450 પુરુષ અને 290 મહિલા કેદી એમ કુલ 7740 કેદી રાખવાની ક્ષમતા છે, જેની સામે 9779 પુરુષ અને 178 મહિલા, 4 ટ્રાન્સજેન્ડર એમ કુલ 9,961 કેદીઓ સબડી રહ્યા છે. આ ઉપરાંત બે સ્પેશિયલ જેલમાં 600 પુરુષ અને 50 મહિલા કેદીની ક્ષમતા છે, જેની સામે 551 પુરુષ અને 13 મહિલા કેદી એમ 564 કેદીઓ જેલમાં છે.
34 મહિલા કેદીની સાથે 39 બાળકો
ગુજરાતની જેલમાં સજા પામેલા મહિલા કેદીની સંખ્યા 4 છે, જેમની સાથે 4 બાળકો છે, અન્ડર ટ્રાયલમાં 31 કેદી અને 35 બાળક છે. આમ કુલ 34 મહિલા કેદીની સાથે 39 બાળકો છે.
