- સાંજે 5 વાગ્યાની આસપાસ થયો શોર્ટ સર્કિટ
- 26 ફ્લાઈટ કરાઈ કેન્સલ
- 5 કલાક બાદ ફરી લાઈટો થઈ ચાલુ
પાકિસ્તાનના કરાચીમાં જિન્ના ઈન્ટરનેશનલ એરપોર્ટ કેટલાક કલાકો સુધી અંધારામાં ડૂબી રહ્યું હતું. શોર્ટ સર્કિટના કારણે ગુરુવારે સાંજે અચાનક એરપોર્ટનો પાવર ડુલ થઈ ગયો હતો. જેના કારણે આખી રાત એરપોર્ટના ઘણા ભાગોમાં અંધારપટ છવાયેલો રહ્યો હતો. સિવિલ એવિએશન ઓથોરિટી (PCAA)ના પ્રવક્તાના જણાવ્યા અનુસાર સાંજે 5 વાગ્યે પાવર ટનલ બેઝમેન્ટ ટર્મિનલ બિલ્ડિંગ પાસે શોર્ટ સર્કિટ થયું હતું. જેના કારણે એરપોર્ટ પર પાવર ફેલ થઈ ગયો હતો. પાવર ફેલ થતાની સાથે જ એરપોર્ટના કર્મચારીઓએ પાવર પુનઃસ્થાપિત કરવાનું કામ શરૂ કરી દીધું હતું. લગભગ 5 કલાક બાદ વીજ પુરવઠો પુનઃસ્થાપિત કરી શકાશે.
કેટલાક ભાગો મોડી રાત સુધી અંધારામાં ડૂબી ગયા
આ સિવાય મળી રહેલા સમાચાર અનુસાર સ્થાનિક સેટેલાઇટ વિસ્તાર સિવાય મોટા ભાગના સ્થળોએ વીજ પુરવઠો થોડા સમય પછી પુનઃસ્થાપિત કરવામાં આવ્યો હતો અને ઓપરેશનલ લાઇટો પણ રાત્રે કામ કરવા લાગી હતી, પરંતુ કેટલાક ભાગો મોડી રાત સુધી અંધારામાં ડૂબી ગયા હતા. ગુરુવારે સાંજે જિન્નાહ ઇન્ટરનેશનલ એરપોર્ટ પર ઘણી ફ્લાઇટ્સ રદ કરવી પડી હતી, જો કે હાલમાં તમામ ફ્લાઇટ્સ કોઈપણ વિક્ષેપ વિના કાર્યરત છે.
26 ફ્લાઈટ્સ કેન્સલ કરવી પડી હતી
PCAAના પ્રવક્તાએ જણાવ્યું હતું કે ગુરુવારે સાંજે અચાનક પાવર આઉટ થવાને કારણે એરપોર્ટની કામગીરી પ્રભાવિત થઈ હતી. પાવર આઉટેજને કારણે સાંજના સમયે ચેક-ઇન અને ઇમિગ્રેશન કાઉન્ટરો પર લાંબી કતારો અને મૂંઝવણ સર્જાઈ હતી. છ આંતરરાષ્ટ્રીય અને 20 ડોમેસ્ટિક ફ્લાઇટ્સ રદ કરવામાં આવી હતી, જ્યારે ઘણી ફ્લાઇટ્સ મોડી પડી હતી. PCAAએ તેના નિવેદનમાં કહ્યું છે કે અમે તમામ મુસાફરોને થયેલી અસુવિધા માટે માફી માંગીએ છીએ. અમારી ટીમો તાત્કાલિક ધોરણે પુરવઠો પુનઃસ્થાપિત કરવા માટે કામ કરી રહી છે. જે વિસ્તારમાં શોર્ટ સર્કિટ થયું છે તે એરપોર્ટ માટે મુખ્ય પાવર ઇન્ફ્રાસ્ટ્રક્ચર ધરાવે છે, જે પેસેન્જર ટર્મિનલથી થોડે દૂર સ્થિત છે. ક્રૂએ પાવરને સંપૂર્ણપણે પુનઃસ્થાપિત કરવા માટે કામ કરવાનું શરૂ કર્યું પરંતુ પ્રક્રિયામાં ઘણા કલાકો લાગ્યા. એરપોર્ટ મેનેજમેન્ટે ક્રિટિકલ પાવર સિસ્ટમમાં અચાનક નિષ્ફળતાના કારણોની તપાસ શરૂ કરી છે.
