તાનાશાહ કિમે હદ વટાવી, એક પછી એક બેલેસ્ટિક મિસાઈલ છોડતાં દુનિયામાં ફફડાટ

• ઉત્તર કોરિયાએ જાપાનના સમુદ્ર નજીક મિસાઈલ છોડી
  
• બેલેસ્ટિક મિસાઈલ પૂર્વ સમુદ્રમાં પડી
• ગયા વર્ષે પોતાને પરમાણુ શક્તિ જાહેર કરી

ઉત્તર કોરિયાએ સોમવારે પૂર્વ સમુદ્ર તરફ લાંબા અંતરની બેલેસ્ટિક મિસાઈલ છોડી હતી. દક્ષિણ કોરિયાની સેનાએ આ માહિતી આપી હતી. દક્ષિણ કોરિયાની સેનાએ કહ્યું હતું કે બેલેસ્ટિક મિસાઈલ ફાયર કરતા પહેલા ઉત્તર કોરિયાએ ટૂંકા અંતરની મિસાઈલ પણ છોડી હતી. સિયોલના જોઈન્ટ ચીફ ઓફ સ્ટાફે માહિતી આપી હતી કે ઉત્તર કોરિયાએ જાપાનના સમુદ્ર નજીક મિસાઈલ છોડી છે.

જાપાન સરકારે વધુ વિગતો આપ્યા વગર ટ્વિટર પર કહ્યું હતું કે ઉત્તર કોરિયાએ બેલેસ્ટિક મિસાઈલ છોડી છે. જોકે, બેલેસ્ટિક મિસાઈલ લોન્ચ કરતા પહેલા ઉત્તર કોરિયાએ રવિવારે મોડી રાત્રે પ્યોંગયાંગ વિસ્તારમાંથી ટૂંકા અંતરની બેલેસ્ટિક મિસાઈલ પણ છોડી હતી. દક્ષિણ કોરિયાની સેનાએ પહેલા જ આ અંગે જાણકારી આપી હતી.

બેલેસ્ટિક મિસાઈલ પૂર્વ સમુદ્રમાં પડી

ઉત્તર કોરિયા દ્વારા છોડવામાં આવેલી બેલેસ્ટિક મિસાઈલ પૂર્વ સમુદ્રમાં પડી હતી જેના માટે મિસાઈલે 570 કિલોમીટરનું અંતર કાપવાનું હતું. આ અંગે જેસીએસે કહ્યું હતું કે, તેઓએ ઉત્તર કોરિયા દ્વારા છોડવામાં આવેલી બેલેસ્ટિક મિસાઈલની માહિતી સિયોલ, વોશિંગ્ટન અને જાપાન સાથે શેર કરી છે. ઉત્તર કોરિયાએ ગયા વર્ષે પોતાને પરમાણુ શક્તિ જાહેર કરી હતી અને વારંવાર કહ્યું હતું કે તે તેના પરમાણુ કાર્યક્રમને ક્યારેય છોડશે નહીં જેને શાસન તેના અસ્તિત્વ માટે આવશ્યક માને છે.

ગયા મહિને ઉત્તર કોરિયાએ સૈન્ય જાસૂસી ઉપગ્રહ સફળતાપૂર્વક ભ્રમણકક્ષામાં મૂક્યો હતો. તેના પર તેણે દાવો કર્યો હતો કે તેણે જાસૂસી મિસાઇલો દ્વારા અમેરિકન અને દક્ષિણ કોરિયાના સૈન્ય સ્થળોની તસવીરો જોઈ હતી.

જાપાનના વડા પ્રધાન ફ્યુમિયો કિશિદાએ એક નિવેદન આપ્યું 

ઉત્તર કોરિયા દ્વારા છોડવામાં આવેલી મિસાઈલ પર જાપાનના વડા પ્રધાન ફ્યુમિયો કિશિદાએ પત્રકારોને જણાવ્યું હતું કે અત્યાર સુધી તેમને મિસાઈલ પ્રક્ષેપણને કારણે કોઈ ઈજા કે નુકસાનના અહેવાલ મળ્યા નથી. તેઓ પરીક્ષણ અંગે ચર્ચા કરવા માટે રાષ્ટ્રીય સુરક્ષા પરિષદની બેઠક યોજવાની યોજના ધરાવે છે. દક્ષિણ કોરિયા, અમેરિકા અને જાપાને મિસાઈલ પ્રક્ષેપણની સખત નિંદા કરી હતી.

ઉત્તર કોરિયાએ દક્ષિણ કોરિયાને ધમકી આપી 

ઉત્તર કોરિયાના રક્ષામંત્રાયે અમેરિકન અને દક્ષિણ કોરિયાના અધિકારીઓ વચ્ચેની બેઠક પર આકરી પ્રતિક્રિયા આપી હતી. જવાબમાં ઉત્તર કોરિયા કડક વલણ અપનાવશે તેવી ધમકી આપી હતી. જાપાનના વડા પ્રધાન ફ્યુમિયો કિશિદાએ જણાવ્યું હતું કે ઇજાઓ અથવા નુકસાનના કોઈ તાત્કાલિક અહેવાલો નથી. ઉત્તર કોરિયા દરરોજ મિસાઈલ પરીક્ષણ કરે છે દક્ષિણ કોરિયાને ધમકી આપે છે. સેંકડો મિસાઇલોનું પરીક્ષણ કરવામાં આવ્યું છે જેમાં ટૂંકા અંતરની બેલેસ્ટિક મિસાઇલો અને લાંબા અંતરની બેલેસ્ટિક મિસાઇલો ઉપરાંત આંતરખંડીય મિસાઇલોનું પણ પરીક્ષણ કરવામાં આવ્યું છે.