ભારતે વ્યૂહાત્મક ભાગીદારો પાસેથી કરી હથિયારની સપ્લાય
- ભારતે રશિયા, ફ્રાન્સ અને અમેરિકા પાસેથી એડવાન્સ ટેક્નોલોજી અને હથિયારોની આયાત કર્યા
- તેનાથી પ્રદેશની અસ્થિરતા વધી અને ‘તણાવગ્રસ્ત વિસ્તારમાં વ્યૂહાત્મક સંતુલન જોખમમાં: પાકિસ્તાન
ભારતની વધતી હથિયારોની શક્તિ જોઈને પાકિસ્તાન ચિંતામાં મૂકાયું છે. ભારત તેના વ્યૂહાત્મક ભાગીદારો જેમ કે રશિયા, ફ્રાન્સ અને અમેરિકા પાસેથી એડવાન્સ ટેક્નોલોજી અને હથિયારોની આયાત કરે છે તેથી પાકિસ્તાનમાં ડર પેદા થયો છે. પાકિસ્તાને સંયુક્ત રાષ્ટ્રમાં ચિંતા વ્યક્ત કરતા કહ્યું છે કે, ભારતને સતત હથિયારોની સપ્લાય કરવામાં આવી રહી છે. પાકિસ્તાને કહ્યું છે કે તેનાથી પ્રદેશની અસ્થિરતા વધી રહી છે અને ‘તણાવગ્રસ્ત વિસ્તારમાં વ્યૂહાત્મક સંતુલન જોખમમાં છે’.
સંયુક્ત રાષ્ટ્રમાં પાકિસ્તાનના નાયબ સ્થાયી પ્રતિનિધિ રાજદૂત મુહમ્મદ ઉસ્માન ઈકબાલ જાદુને શુક્રવારે મોડી રાત્રે આ વાત કહી હતી. જો કે, પાકિસ્તાની રાજદૂતે ભારતનું નામ લીધા વિના ભારત વિરુદ્ધ આ વાતો કહી હતી. ભારત સામે ઝેર ઓકતાં તેમણે કહ્યું હતું કે આંતરરાષ્ટ્રીય સમુદાયે સાંકડી વ્યૂહાત્મક અને વ્યાપારી બાબતોના આધારે દક્ષિણ એશિયા પ્રત્યે બેવડા ધોરણોની નીતિ છોડી દેવી જોઈએ.
60થી વધુ દેશોએ શુક્રવારે સંયુક્ત રાષ્ટ્ર સુરક્ષા પરિષદમાં ‘શાંતિ અને સુરક્ષા માટે નાના હથિયારો, હળવા શસ્ત્રો અને દારૂગોળાના દુરુપયોગ, ગેરકાયદેસર હેરફેર અને દુરુપયોગથી ઉભા થયેલા જોખમને સંબોધિત કરવા’ વિષય પર યોજાયેલી ચર્ચામાં ભાગ લીધો હતો જેમાં પાકિસ્તાનના દૂતએ આ ટિપ્પણી કરી હતી.
આ દરમિયાન પાકિસ્તાની રાજદૂત જાદૂને કહ્યું કે પરંપરાગત હથિયારોને મર્યાદિત કરવાનો અને તેનો ઉપયોગ ધીમે ધીમે ઘટાડવાનો લક્ષ્યાંક હાંસલ નથી થયો પરંતુ દેશ સતત પોતાના સૈન્ય ખર્ચમાં વધારો કરી રહ્યો છે.
ભારતના સંરક્ષણ બજેટથી પાકિસ્તાન નારાજ
છેલ્લા કેટલાક વર્ષોમાં પાકિસ્તાનની આર્થિક સ્થિતિ ખરાબથી ખરાબ થઈ ગઈ છે. તે ઈન્ટરનેશનલ મોનેટરી ફંડની લોન અને સાઉદી અરેબિયા, સંયુક્ત આરબ અમીરાત અને ચીન જેવા દેશોની લોનની મદદથી પોતાને નાદારીમાંથી બચાવી રહ્યો છે. પાકિસ્તાનમાં મોંઘવારીથી પરેશાન સામાન્ય લોકોને બે ટાઈમનું ભોજન પણ મળવું મુશ્કેલ થઈ રહ્યું છે. જોકે પાકિસ્તાનનું સંરક્ષણ બજેટ હંમેશા વધારે રહ્યું છે. પાકિસ્તાને 2023-24માં તેના સંરક્ષણ પાછળ $6.27 બિલિયનનો ખર્ચ કર્યો છે. તે જ સમયે, ભારતનું સંરક્ષણ બજેટ 72.2 અબજ ડોલર છે. પાકિસ્તાની રાજદૂતે ભારતના જંગી સંરક્ષણ બજેટ અંગે પોતાની નિરાશા વ્યક્ત કરવાનું ટાળ્યું ન હતું.
ભારત પર નિશાન સાધ્યું
ભારતનું નામ લીધા વિના તેમણે કહ્યું હતું કે, ‘દક્ષિણ એશિયામાં ઘણી અસ્થિર ઘટનાઓ બની રહી છે. અહીં એક દેશનો સૈન્ય ખર્ચ અન્ય તમામ દેશો કરતા ઘણો વધારે છે. આ દેશમાં પરંપરાગત હથિયારોનો અનિયંત્રિત પુરવઠો થઈ રહ્યો છે. તેની વધતી જતી વ્યૂહાત્મક ક્ષમતાઓ અસ્થિરતાને વેગ આપે છે નાજુક પ્રાદેશિક સંતુલનને જોખમમાં મૂકે છે અને લાંબા સમયથી ચાલતા વિવાદોના ઉકેલને જટિલ બનાવે છે. જેના કારણે વિસ્તારમાં કાયમી શાંતિ સ્થપાઈ રહી નથી.
પાકિસ્તાની રાજદૂતે પોતાના ધ્રૂજતા અવાજમાં આગળ કહ્યું હતું કે, ‘આ અસંતુલન હંમેશા ચાલતું આવ્યું છે જેના કારણે તણાવ પણ પેદા થયો છે. આનાથી પરમાણુ સશસ્ત્ર દેશો વચ્ચે યુદ્ધ પણ થઈ શકે છે. પાકિસ્તાની રાજદૂતે વધુમાં કહ્યું હતું કે, પાકિસ્તાન ન તો આ ક્ષેત્રમાં હથિયારોની સ્પર્ધા ઈચ્છે છે અને ન તો તેમાં સામેલ છે.
