- 26 મરીન ફાઇટર પ્લેન ખરીદશે ભારત ?
- ફ્રાંસે ડીલ માટે ભારતને મોકલ્યો પ્રસ્તાવ
- આ ડીલ 50 હજાર કરોડ રૂપિયાની હોઈ શકે છે
ભારત વધુ 26 મરીન ફાઈટર એરક્રાફ્ટ ખરીદવા માટે ફ્રાન્સ સાથે ડીલ કરી શકે છે. આ માટે ફ્રાન્સની સરકારે ડીલ માટે પ્રસ્તાવ મોકલ્યો છે. પ્રસ્તાવ મુજબ આ ડીલ 50 હજાર કરોડ રૂપિયાની હોઈ શકે છે. આ ડીલ હેઠળ ભારતને ફાઈટર પ્લેન તેમજ તેમની ટ્રેનિંગ, મેઈન્ટેનન્સ અને લોજિસ્ટિક્સ સપોર્ટ મળશે.
22 સિંગલ સીટર અને ચાર ડબલ સીટર જેટ
ભારત સરકાર નેવી માટે 22 સિંગલ સીટર ફાઈટર એરક્રાફ્ટ અને 4 ડબલ સીટર ટ્રેનર એરક્રાફ્ટ ખરીદવાની તૈયારી કરી રહી છે. સરકારે ઓક્ટોબરમાં આ ડીલ માટે લેટર ઓફ રિક્વેસ્ટ (LoR) જાહેર કર્યો હતો. જેના પર હવે ફ્રાન્સની સરકારે મરીન રાફેલ ફાઈટર એરક્રાફ્ટ વેચવા માટે લેટર ઓફ એક્સેપ્ટન્સ (LoA) મોકલ્યો છે. આ પત્રમાં ડીલ સંબંધિત તમામ માહિતી છે. ફ્રાન્સે 50 હજાર કરોડ રૂપિયાના સોદાનો પ્રસ્તાવ મૂક્યો છે અને ફાઈટર પ્લેનની સાથે તેમના હથિયારો, સિમ્યુલેટર, સાધનો, ક્રૂ ટ્રેનિંગ અને લોજિસ્ટિક્સ સપોર્ટ પણ આપવામાં આવશે.
જુલાઈમાં આ સોદાને મંજૂરી આપી
મહત્વનું છે કે 13 જુલાઈના રોજ રક્ષા મંત્રી રાજનાથ સિંહની અધ્યક્ષતામાં ડિફેન્સ એક્વિઝિશન કાઉન્સિલે નેવી માટે 26 જેટ ખરીદવાના સોદાને મંજૂરી આપી હતી. આ અંતર્ગત નેવી માટે લગભગ 30 હજાર કરોડ રૂપિયામાં 26 ફાઈટર એરક્રાફ્ટ અને ત્રણ સ્કોર્પિયન સબમરીન ખરીદવાની છે. પેરિસમાં પીએમ મોદી અને ફ્રાન્સના રાષ્ટ્રપતિ ઈમેન્યુઅલ મેક્રોન વચ્ચે પેરિસ સમિટના એક દિવસ પહેલા ડિફેન્સ એક્વિઝિશન કાઉન્સિલ દ્વારા આ મંજૂરી આપવામાં આવી હતી. જોકે, સમિટમાં આ ડીલનો કોઈ ઉલ્લેખ નહોતો.
કેબિનેટની મંજૂરી બાદ જ ડીલને ફાઈનલ થશે
ફ્રાન્સે ડીલ માટે માત્ર પ્રસ્તાવ મોકલ્યો છે. પરંતુ તેની કિંમત પર વાટાઘાટો અને કેબિનેટ સમિતિની મંજૂરી પછી જ આ ડીલને અંતિમ સ્વરૂપ આપવામાં આવશે. તમને જણાવી દઈએ કે નેવીને તેના બે એરક્રાફ્ટ કેરિયર્સ માટે વધુ ફાઈટર પ્લેનની જરૂર છે. સાથે જ, આ ડીલ સમુદ્રમાં આપણી શક્તિ વધારવા અને ચીનના વધતા ખતરાનો સામનો કરવા માટે ખૂબ જ મહત્વપૂર્ણ સાબિત થઈ શકે છે.
