- આતંકી હુમલા મામલે ત્રણ નાગરિકોને બોલાવાયા હતા પૂછપરછ માટે
- અટકાયત બાદ ત્રણેય નાગરિકોના થયા હતા શંકાસ્પદ મોત
- 13 સેક્ટર રાષ્ટ્રીય રાઈફલ્સના બ્રિગેડિયર કમાન્ડરની અટકાયત કરાઇ
જમ્મુ-કાશ્મીરના પૂંચમાં ત્રણ નાગરિકોના મોતના મામલામાં સેનાએ બ્રિગેડિયર સ્તરના અધિકારી વિરુદ્ધ તપાસ શરૂ કરી છે. તેમજ તેમની સામે કાર્યવાહી કરીને તેમની અટકાયત પણ કરવામાં આવી છે. ભારતીય સેનાના સૂત્રોના જણાવ્યા અનુસાર, 13 સેક્ટર રાષ્ટ્રીય રાઈફલ્સના બ્રિગેડિયર કમાન્ડરની અટકાયત કરવામાં આવી છે. આ ઉપરાંત અટેચ કરવામાં આવેલ અધિકારીઓના વિસ્તારમાં આતંકવાદી હુમલામાં જવાનોના શહીદ થવાની ઘટનાઓની પણ તપાસ કરવામાં આવશે.
વાસ્તવમાં, રાજૌરી-પુંછ સેક્ટરમાં સેનાના કાફલા પર ઘાત લગાવીને આતંકી હુમલો થયો હતો. આ હુમલામાં 4 જવાન શહીદ થયા હતા. માહિતી મુજબ, ત્યારબાદ હુમલાને પૂછપરછ માટે ત્રણ નાગરિકોને અટકાયતમાં લેવામાં આવ્યા હતા. જોકે, બાદમાં આ ત્રણેય નાગરિકો મૃત હાલતમાં મળી આવ્યા હતા. સેનાએ આ અંગે તપાસના આદેશ આપ્યા હતા. તપાસની શરૂઆત સાથે જ બ્રિગેડિયર કમાન્ડર સામે પ્રથમ કાર્યવાહી કરવામાં આવી છે.
21 ડિસેમ્બરે થયો હતો આતંકી હુમલો
જણાવી દઈએ કે, ગત 21 ડિસેમ્બરના રોજ સાંજે લગભગ 4.45 કલાકે, આતંકવાદીઓએ રાજૌરી અને પુંછ સુરનકોટ સબડિવિઝનમાં ડેરા કી ગલી અને બુફલિયાઝ વચ્ચેના ગાઢ જંગલ વિસ્તારમાં દાનાર સવાનિયા વળાંક પર સેનાના બે વાહનો પર હુમલો કર્યો હતો, જેમાં 4 જવાનો શહીદ થયા હતા જ્યારે અન્ય ત્રણ જવાનો ઘાયલ થયા હતા. આ વિસ્તારમાં શંકાસ્પદ ગતિવિધિના અહેવાલો બાદ ગુરુવારે સવારે શરૂ કરવામાં આવેલા ઓપરેશન માટે આવેલા સૈન્યના વાહનો પર હુમલો કરવામાં આવ્યો હતો. આર્મી ચીફ મનોજ પાંડે સોમવારે રાજૌરી પહોંચ્યા હતા. તેમણે અહીં સુરક્ષાની સ્થિતિની સમીક્ષા કરી હતી. સેનાના વરિષ્ઠ અધિકારીઓએ તેમને જમીની વાસ્તવિકતાથી વાકેફ કર્યા હતા.
ઈન્ટેલિજન્સની નિષ્ફળતા જવાબદાર: પૂર્વ DGP
જમ્મુ અને કાશ્મીરના ભૂતપૂર્વ ડીજીપી એસપી વૈદે રાજૌરી-પુંછ સેક્ટરમાં અવારનવાર થઈ રહેલા આતંકી હુમલા માટે ગુપ્તચર માહિતીની નિષ્ફળતાને જવાબદાર ગણાવી હતી. તેમણે કહ્યું કે આપણે આપણું ગુપ્તચર નેટવર્ક મજબૂત કરવું પડશે. નબળા ઇન્ટેલિજન્સને કારણે આપણે સમસ્યાઓનો સામનો કરવો પડે છે. આર્મી ચીફ જનરલ મનોજ પાંડેએ આ બાબતને ગંભીરતાથી લીધી તેની હું પ્રશંસા કરું છું. તેમની મુલાકાત ઘણી મહત્વની હતી. તેમણે કહ્યું કે આપણે સ્થાનિક લોકોની પસંદગી કરવી જોઈએ અને પોલીસ અને સેનામાં પણ એસપીઓ તરીકે તેમની ભરતી કરવી જોઈએ. મને 100 ટકા ખાતરી છે કે તેઓ આતંકવાદીઓને તેમના ઠેકાણાઓમાંથી બહાર કાઢવામાં સફળ થશે કારણ કે તેઓ સ્થળના દરેક ખૂણા અને ખૂણાથી વાકેફ છે.
