યુક્રેને કાળાસમુદ્રમાં વધુ એક રશિયન યુદ્ધ જહાજનો કર્યો નાશ,પુતિનને સતત ત્રીજો ફટકો

• યુક્રેને કાળા સમુદ્રમાં રશિયન નૌકાદળના અન્ય યુદ્ધ જહાજ પર કર્યો જોરદાર હુમલો
  
• યુક્રેન દ્વારા હુમલો કરનાર આ ત્રીજું મોટું રશિયન યુદ્ધ જહાજ છે
  
• યુક્રેનિયન હુમલામાં એક વ્યક્તિનું મોત થયું
  

યુક્રેને કાળા સમુદ્રમાં રશિયન નૌકાદળના અન્ય યુદ્ધ જહાજ પર જોરદાર હુમલો કર્યો છે. આ હુમલામાં યુદ્ધ જહાજને ઘણું નુકસાન થયું છે. રશિયાએ હુમલાની પુષ્ટિ કરતા કહ્યું હતું કે, યુક્રેન દ્વારા બ્લેક સી હુમલામાં તેના એક યુદ્ધ જહાજને નુકસાન થયું છે. આ હુમલો સોમવારે રાત્રે રશિયાના કબજા હેઠળના ક્રિમિયાના ફિઓડોસિયા બંદર પર થયો હતો. રક્ષામંત્રીએ જણાવ્યું હતું કે મોટા લેન્ડિંગ જહાજ નોવોચેરકાસ્ક પર માર્ગદર્શિત મિસાઇલોથી સજ્જ યુક્રેનિયન વિમાન દ્વારા હુમલો કરવામાં આવ્યો હતો. અગાઉ યુક્રેનિયન વાયુસેનાના વડાએ કહ્યું હતું કે તેના લડાયક વિમાનોએ એક રશિયન જહાજને નષ્ટ કરી દીધું છે. ટેલિગ્રામ પરની એક પોસ્ટમાં યુક્રેનિયન એરફોર્સ કમાન્ડર માયકોલા ઓલેશ્ચુકે નોવોચેરકાસ્ક લેન્ડિંગ જહાજ પરના હુમલામાં સામેલ સૈનિકો અને પાઇલટ્સનો આભાર માન્યો હતો. યુક્રેન દ્વારા હુમલો કરનાર આ ત્રીજું મોટું રશિયન યુદ્ધ જહાજ છે.

ક્રિમીયાના ગવર્નરે હુમલાની કરી પુષ્ટિ

ક્રિમીઆના રશિયન નિયુક્ત વડા સેરગેઈ અક્સ્યોનોવના જણાવ્યા અનુસાર યુક્રેનિયન હુમલામાં એક વ્યક્તિનું મોત થયું હતું. તેમણે કહ્યું હતું કે હુમલામાં 6 ઈમારતોને નુકસાન થયું છે અને કેટલાક લોકોને કામચલાઉ કેમ્પમાં લઈ જવા પડ્યા છે. વિસ્તારને કોર્ડન કરી લીધા પછી બંદર પરિવહન કામગીરી સામાન્ય રીતે કામ કરી રહી હોવાના અહેવાલ છે જ્યારે હુમલાને કારણે લાગેલી આગને કાબૂમાં લેવામાં આવી છે. સોશિયલ મીડિયા પર ફૂટેજ સામે આવ્યા છે જેમાં કથિત રીતે બંદર વિસ્તારમાં જોરદાર વિસ્ફોટ થયો હોવાનું દર્શાવવામાં આવ્યું છે. ક્રિમીયાને આંતરરાષ્ટ્રીય સ્તરે યુક્રેનના ભાગ તરીકે ઓળખવામાં આવે છે પરંતુ 2014 માં કબજે કરવામાં આવ્યા પછી તે રશિયન કબજા હેઠળ રહે છે.

નોવોચેરકાસ્ક જહાજ કેટલું શક્તિશાળી છે?

નોવોચેરકાસ્ક એ રોપુચા વર્ગનું ઉતરાણ જહાજ છે. આ જહાજ 369 ફૂટ (112.5 મીટર) લાંબુ છે જે અંદાજે 3,450 ટન વજન વહન કરી શકે છે. યુએસ સૈન્ય અનુસાર, નોવોચેરકાસ્ક 87 સૈનિકોની ક્ષમતા સાથે લગભગ 237 લોકોને વહાણમાં લઈ જઈ શકે છે. જોકે હુમલા સમયે જહાજમાં કેટલા સૈન્ય કર્મચારીઓ હાજર હતા તે હજુ સુધી જાણવા મળ્યું નથી. આ જહાજ દુશ્મનના દરિયાકિનારા પર સૈનિકો, ટેન્ક અને સશસ્ત્ર વાહનોને ઉતારવા માટે બનાવવામાં આવ્યું છે. આ જહાજ એકસાથે 25 બખ્તરબંધ પાયદળ વાહનોને લઈ જવાની ક્ષમતા ધરાવે છે.

યુક્રેને રશિયાના ત્રીજા યુદ્ધ જહાજને નિશાન બનાવ્યું

યુક્રેનિયન કમાન્ડર ઓલેશ્ચુકે જણાવ્યું હતું કે જે રશિયન નોવોચેરકાસ્ક જહાજ પર હુમલો કરવામાં આવ્યો હતો તે ઈરાન બનાવટનું શાહિદ એટેક ડ્રોન લઈ જતું હતું. નોવોચેરકાસ્કની હાલત રશિયાના સૌથી મોટા મિસાઈલ ક્રુઝર્સમાંના એક મોસ્કવા જેવી જ હશે. એપ્રિલ 2022માં યુક્રેને કાળા સમુદ્રમાં મિસાઇલ વડે રશિયન ગાઇડેડ મિસાઇલ ક્રુઝર મોસ્કવા પર હુમલો કર્યો હતો. આ હુમલામાં મોસ્કવા જહાજ ડૂબી ગયું હતું. યુક્રેને સપ્ટેમ્બરમાં એવો પણ દાવો કર્યો હતો કે નોવોચેરકાસ્કનું બહેન જહાજ મિન્સ્ક ક્રિમીયામાં સેવાસ્તોપોલ નેવલ બેઝ પરના હુમલામાં નાશ પામ્યું હતું.