ભારત અને રશિયા વચ્ચે વીજળી ઉત્પાદનને લઈને થયા કરાર

• વિદેશ મંત્રી એસ. જયશંકર રશિયાના 5 દિવસના પ્રવાસે
• કુડનકુલમ ન્યુક્લિયર પાવર પ્લાન્ટને લઈને મહત્વના કરાર કર્યા 
• રશિયા-ભારતના સંબંધો ગાઢ થયા: વિદેશ મંત્રી જયશંકર
  

ભારતના વિદેશ મંત્રી એસ. જયશંકર રશિયાના 5 દિવસના પ્રવાસે છે. વિદેશ મંત્રીએ મોસ્કોમાં ભારતીય સમુદાય સાથે ચર્ચા કરી. આ દરમિયાન વિદેશ મંત્રી જયશંકરે પોતાના સંબોધનમાં કહ્યું કે રશિયા સંરક્ષણ, પરમાણુ ઉર્જા ક્ષેત્રે વિશેષ ભાગીદાર છે. આજે અમે કુડનકુલમ પરમાણુ એકમો સાથે સંબંધિત કેટલાક મહત્વપૂર્ણ કરાર પર હસ્તાક્ષર કર્યા. તેમણે એમ પણ કહ્યું કે અંતરિક્ષ અને પરમાણુ ક્ષેત્રોમાં તે દેશો સાથે સહયોગ કરવામાં આવે છે જેની સાથે તમારા વિશ્વાસભર્યા સંબંધો છે.

વિદેશ મંત્રી એસ. જયશંકરે કહ્યું કે ભારત અને રશિયાએ મંગળવારે તમિલનાડુમાં કુડનકુલમ ન્યુક્લિયર પાવર પ્લાન્ટના પાવર જનરેશન યુનિટના નિર્માણ સંબંધિત કેટલાક મહત્વપૂર્ણ કરાર પર હસ્તાક્ષર કર્યા છે. કુડનકુલમ ન્યુક્લિયર પાવર પ્લાન્ટ તમિલનાડુમાં રશિયાની તકનીકી સહાયથી બનાવવામાં આવી રહ્યો છે. તેમણે એમ પણ કહ્યું કે બંને દેશો એ વાત પર સહમત થયા છે કે ભારત અને યુરેશિયન ઇકોનોમિક ઝોન વચ્ચે ફ્રી ટ્રેડ એગ્રીમેન્ટ પર વ્યક્તિગત વાટાઘાટો શરૂ કરવા માટે તેમની વાટાઘાટ કરતી ટીમ જાન્યુઆરીના અંત સુધીમાં મળશે.

રશિયા-ભારતના સંબંધો ગાઢ થયા: જયશંકર

અગાઉ, અન્ય એક કાર્યક્રમ દરમિયાન જયશંકરે કહ્યું હતું કે ભૌગોલિક રાજનીતિ અને વ્યૂહાત્મક પરસ્પર નિર્ભરતાને કારણે ભારત અને રશિયા વચ્ચેના સંબંધો હંમેશા મજબૂત રહેશે. જયશંકરે સોશિયલ મીડિયા પર શેર કરેલી પોસ્ટમાં લખ્યું હતું કે તેઓ બંને દેશોમાં કનેક્ટિવિટી વધારવા, પ્રાદેશિક સંઘર્ષ વગેરે જેવા મુદ્દાઓ પર રશિયન નેતાઓ સાથે વાત કરશે.