- ‘સબકે રામ’ ના નારાનો દેશભરમાં પ્રચાર કરવામાં આવશે
- લોકોને રામ મંદિરના ઉદ્ઘાટનની ઉજવણી કરવાનું કહેવામાં આવશે
- ઘરે-ઘરે જઈને અક્ષત અને ફોટોગ્રાફ્સનું વિતરણ કરવામાં આવી રહ્યુ છે
લોકસભા ચૂંટણી 2024 માટે હવે માત્ર થોડા મહિના જ બાકી છે. ભાજપે ત્રીજી વખત સરકાર બનાવવાની તૈયારી કરી લીધી છે. ભાજપ અને રાષ્ટ્રીય સ્વયંસેવક સંઘ (આરએસએસ) એ સોમવાર (1 જાન્યુઆરી) ના રોજ એક મોટું અભિયાન શરૂ કર્યું, જેને તાજેતરના ઇતિહાસમાં સૌથી મોટું અભિયાન તરીકે વર્ણવવામાં આવી રહ્યું છે. આ અભિયાન દ્વારા દેશમાં ઘરે-ઘરે ‘અક્ષત’નું વિતરણ કરવામાં આવશે. સાથે સાથે ‘સબકે રામ’ ના નારાનો દેશભરમાં પ્રચાર કરવામાં આવશે.
22 જાન્યુઆરીના રોજ રામ મંદિર પ્રાણ પ્રતિષ્ઠા કાર્યક્રમ
RSSના સહયોગી વિશ્વ હિન્દુ પરિષદ (VHP)એ 15 કરોડ ઘરો સુધી પહોંચવાનું વચન આપ્યું છે. આ અંતર્ગત લોકોને 22 જાન્યુઆરીના રોજ રામ મંદિર પ્રાણ પ્રતિષ્ઠા કાર્યક્રમમાં ભાગ લેવા, આજુબાજુના મંદિરોને શણગારવા અને પોતપોતાના ઘરના મંદિરોને દીવા પ્રગટાવીને શણગારવા વિનંતી કરવામાં આવશે. લોકોને રામ મંદિરના ઉદ્ઘાટનની ઉજવણી કરવાનું કહેવામાં આવશે.
ઘરે-ઘરે અક્ષતનું વિતરણ કરવામાં આવી રહ્યું છે
VHP કાર્યકર્તાઓ પવિત્ર ‘અક્ષત’ તેમજ ભગવાન રામની તસવીર અને અયોધ્યામાં બની રહેલા રામ મંદિરનું લોકોને 15 જાન્યુઆરી સુધી વિતરણ કરશે. લોકોને અક્ષત અને ફોટોગ્રાફ્સનું વિતરણ કરવાનું કામ વ્યક્તિગત રીતે એટલે કે ઘરે ઘરે જઈને કરવામાં આવશે. 1 જાન્યુઆરીથી દેશભરમાં અક્ષત વિતરણનું કામ શરૂ થઈ ગયું છે. સૌથી પહેલા અયોધ્યાની વાલ્મિકી કોલોનીમાં ઘરે-ઘરે જઈને અક્ષત અને ફોટોગ્રાફ્સનું વિતરણ કરવામાં આવ્યું છે.
વાલ્મીકિ આશ્રમથી પણ અક્ષતનું વિતરણ શરૂ થયું
દિલ્હીમાં ભગવાન વાલ્મીકિ આશ્રમથી પણ અક્ષતનું વિતરણ શરૂ થયું. એક રીતે ભાજપ એ બતાવવા માંગે છે કે તે દેશના અનુસૂચિત જાતિ વિભાગ સાથે જોડાયેલ છે. આ એ જ વિસ્તાર છે જ્યાંથી વડાપ્રધાન નરેન્દ્ર મોદીએ સ્વચ્છ ભારત અભિયાનની શરૂઆત કરી હતી. અક્ષત વિતરણના અભિયાન દરમિયાન, લોકોને પ્રાણ પ્રતિષ્ઠાના દિવસે તેમના પડોશના મંદિરોની મુલાકાત લેવા વિનંતી કરવામાં આવશે. VHP મંદિરોમાં પ્રાણ પ્રતિષ્ઠાનું જીવંત પ્રસારણ કરવાની પણ યોજના બનાવી રહ્યું છે.
સમગ્ર અભિયાન બે ભાગમાં ચાલશે
અભિયાનના પ્રથમ ભાગ રૂપે, લોકોને 22 જાન્યુઆરી, પ્રાણ પ્રતિષ્ઠાના દિવસે રાત્રે તેમના ઘરમાં ઓછામાં ઓછા પાંચ દીવા પ્રગટાવવા માટે કહેવામાં આવશે. બીજા ભાગ તરીકે લોકોને અયોધ્યા જોવા લઈ જવામાં આવશે. 22 જાન્યુઆરી પછી લોકો રામ મંદિરમાં જઈને પૂજા કરી શકશે. બીજેપી 22 જાન્યુઆરી પછી દરરોજ 55 લાખ લોકો રામ મંદિરના દર્શન કરવા માટે યોજના પર કામ કરી રહી છે. આને લોકસભાના પ્રચાર તરીકે પણ જોવામાં આવી રહ્યું છે.
