- ઇઝરાયલ હમાસ યુદ્ધ વચ્ચે અનેક મુસ્લિમ દેશો નેતન્યાહુના વિરોધમાં
- તુર્કીએ ઇઝરાયલના જાસૂસોને પકડવા મોટા પ્રમાણમાં દરોડા પાડયા
- થોડા સમય પહેલા ઈઝરાયેલની જાસૂસી સંસ્થાએ આપી હતી ધમકી
ઈઝરાયેલ અને હમાસ વચ્ચે છેલ્લા બે મહિના કરતાં વધુ સમયથી યુદ્ધ ચાલી રહ્યું છે. આ યુદ્ધને લઈને ઘણા મુસ્લિમ દેશો પ્રધાનમંત્રી બેન્જામિન નેતન્યાહુ વિરુદ્ધ ખુલ્લેઆમ બંડ પોકારી રહ્યા છે. ઈરાન અને લેબનોન બાદ તુર્કી પણ તેમાંથી એક છે. તુર્કીનો આરોપ છે કે ઈઝરાયેલ પોતાના લોકોને મોકલીને જાસૂસી કરાવી રહ્યું છે. પરંતુ રાષ્ટ્રપતિ એર્દોગને મોસાદના ઈરાદાઓને નિષ્ફળ બનાવી દીધા છે. તુર્કીના અધિકારીઓએ ઈઝરાયેલ માટે કથિત રીતે જાસૂસી કરવાના આરોપમાં 33 લોકોની અટકાયત કરી છે.
વધુ 13 લોકો શોધખોળ ચાલુ
મીડિયાના અહેવાલો અનુસાર, એક ઓપરેશનના ભાગરૂપે 8 પ્રાંતોમાં 57 સ્થાનો પર એક સાથે દરોડા પાડવામાં આવ્યા હતા જેમાં 33 લોકોની અટકાયત કરવામાં આવી હતી. અધિકારીઓ હજુ પણ વધુ 13 લોકોની શોધખોળ કરી રહ્યા છે જેમનો સંબંધ ઇઝરાયેલની ગુપ્તચર સંસ્થા મોસાદ સાથે હોવાનું માનવામાં આવે છે. શકમંદો પર મોસાદ વતી જાસૂસી, દેખરેખ, હુમલો અને અપહરણ કરવા જેવી ગતિવિધિઓમાં સામેલ હોવાનો આરોપ છે. જો કે, તેણે કથિત રીતે નિશાન બનાવનારા શંકાસ્પદો અથવા વિદેશીઓ વિશે માહિતી આપી નથી.
થોડા દિવસ પહેલા આપી હતી ધમકી
જણાવી દઈએ કે, જાસૂસોની અટકાયતના સમાચાર એવા સમયે આવ્યા છે જ્યારે થોડા દિવસ પહેલા જ ઈઝરાયેલની ડોમેસ્ટિક સિક્યુરિટી એજન્સી શિન બેટે એક ઓડિયો રેકોર્ડિંગમાં કહ્યું હતું કે તેમનું સંગઠન લેબનોન, તુર્કી અને કતાર સહિત દરેક જગ્યાએ હમાસને ખતમ કરવા માટે તૈયાર છે. જેના પર તુર્કીના રાષ્ટ્રપતિ રેસેપ તઈપ એર્દોગને ઈઝરાયેલને ચેતવણી આપી હતી કે જો તે તુર્કીની ધરતી પર હમાસના સભ્યો પર હુમલો કરવાની ધમકી આપશે તો તેના ગંભીર પરિણામો ભોગવવા પડશે.
