અફઘાન ટીમનો સફાયો ભારતનો ટાર્ગેટ, કુલદીપ અને અવેશને તકની સંભાવના

• આજે ત્રીજી અને અંતિમ ટી20 મેચ
• ભારત બોલિંગ આક્રમણમાં ફેરફાર કરશે
  
• સાંજે 7:00 વાગ્યાથી મેચનો પ્રારંભ થશે
  

શ્રેણી પોતાના નામે કરી ચૂકેલી ભારતીય ટીમ અફઘાનિસ્તાન સામે બુધવારે રમાનારી ત્રીજી અને અંતિમ ટી20 ઇન્ટરનેશનલ મેચમાં પોતાની રિધમને જાળવી રાખીને પ્રવાસી ટીમને ક્વીન સ્વીપ કરવાના ઇરાદા સાથે મેદાનમાં ઉતરશે. પ્રથમ બે મેચમાં ખાતું ખોલાવ્યા વિના આઉટ થયેલો ભારતીય સુકાની રોહિત શર્મા મોટી ઇનિંગ રમવા માટે આતુર રહેશે. જૂન મહિનામાં રમાનારા વર્લ્ડ કપ પહેલાં ભારતની આ છેલ્લી ટી20 મેચ છે. મોહાલી અને ઇન્દોરમાં મળેલા વિજય બાદ ટીમ મેનેજમેન્ટ હરીફ ટીમને હળવાશથી લેવાના કોઈ મૂડમાં નથી. બંને મેચમાં પ્રથમ બોલથી જ આક્રમણ કરવાની ભારતની રણનીતિ સફળ રહી છે. આ મુકાબલો સાંજે 7:00 વાગ્યાથી શરૂ થશે.

ભારત અત્યાર સુધી ટી20માં છેલ્લી ઓવરમાં આક્રમક બેટિંગ કરવાની નીતિ અપનાવતું હતું પરંતુહવે બેટ્સમેન પ્રથમ બોલથી જ આક્રમક રમી રહ્યા છે જેનું શિવમ દૂબે અને વિરાટ કોહલીએ શાનદાર ઉદાહરણ આપ્યું હતું. કોહલી અગાઉ સ્પિનર્સ સામે ધીમે રમતો હતો પરંતુ હવે તે બોલને સતત બાઉન્ડ્રી બહાર મોકલવાનો પ્રયાસ કરે છે. દૂબે ગયા વર્ષે ડબલિનમાં આયરલેન્ડ સામેની શ્રેણી માટે ત્રણ વર્ષ બાદ ટીમમાં પાછો ફર્યો હતો. ત્યારબાદ તે એશિયન ગેમ્સમાં રમ્યો હતો પરંતુ ઓસ્ટ્રેલિયા અને સાઉથ આફ્રિકા સામેની ટીમમાં તેને સ્થાન મળ્યું નહોતું. અફઘાનિસ્તાન સામે તેણે આક્રમક બે અડધી સદી ફટકારી હતી. ઓપનર જયસ્વાલે પણ એક અડધી સદી નોંધાવી હતી.

રોહિત હજુ સુધી શ્રેણીમાં ખાતું ખોલી શક્યો નથી. પ્રથમ મેચમાં ગિલ સાથેની ભૂલના કારણે તે રનઆઉટ થયો હતો. બીજી મેચમાં તે ફારૂકીની બોલિંગમાં બોલ્ડ થયો હતો. જોકે મેનેજમેન્ટ રોહિતના કંગાળ ફોર્મથી ચિંતિત નથી પરંતુ છેલ્લી મેચમાં મોટી ઇનિંગની આશા રાખવામાં આવશે. આ મેચમાં કદાચ બેટિંગમાં ફેરફાર નહીં થાય પરંતુ કુલદીપ યાદવ અને અવેશ ખાનને તક મળી શકે છે. કુલદીપને રવિ બિશ્નોઈ અથવા વોશિંગ્ટન સુંદરના સ્થાને તથા અવેશને મુકેશ કુમારના સ્થાને રમાડવામાં આવી શકે છે. વિકેટકીપર જિતેશ શર્માને આરામ અપાશે તો તેનું સ્થાન સંજુ સેમસનને આપવામાં આવશે.

અફઘાનિસ્તાન પ્રથમ બે મેચમાં ફ્લોપ રહેલાં ઓપનર રહમાનુલ્લાહ ગુરબાઝ પાસેથી વધારે સારા પ્રદર્શનની આશા રાખશે. પ્રવાસી ટીમને તેના સ્ટાર લેગ સ્પિનર રાશિદ ખાનની ખોટ પડી હતી જે સર્જરી બાદની રિહેબિલિટેશન પ્રક્રિયામાંથી પસાર થઈ રહ્યો હોવાના કારણે આ શ્રેણીમાં રમી રહ્યો નથી.