- રાજસ્થાનથી ચોટીલા જતી દારૂ ભરેલી કાર સાથે બજાણા પાસેથી 3 શખ્સો ઝડપાયા
- લખતર પોલીસે પીછો કરતા ચાલક દારૂ ભરેલી કાર મૂકી ફરાર
- સુરેન્દ્રનગર મકાનમાંથી દારૂની 33 બોટલ સાથે 1 શખ્સ ઝડપાયો
સુરેન્દ્રનગર જિલ્લામાં દસાડા તાલુકાના બજાણા, લખતરના ભાસ્કરપરા, સુરેન્દ્રનગરના મીયાણાવાડ અને ચોટીલાના ખેરડી રોડ પર પોલીસે દારૂના દરોડા કર્યા હતા. જેમાં પાંચ શખ્સો દારૂ, કાર અને મોબાઈલ સહિત રૂ. 15,28,890ની મત્તા સાથે ઝડપાયા છે. બજાણા પાસે એસએમસીની ટીમે રાજસ્થાનથી ચોટીલા જતી દારૂ ભરેલી કાર સાથે3ને ઝડપી લીધા હતા. જયારે લખતરમાં પોલીસે પીછો કરતા દારૂ ભરેલી કાર ખેતરમાં મુકી ચાલક ફરાર થઈ ગયો હતો.
સ્ટેટ મોનીટરીંગ સેલની ટીમને રાજસ્થાનથી સૌરાષ્ટ્ર તરફ દારૂની લાઈન ચાલતી હોય અને કારમાં દારૂ લઈ જવાતો હોવાની બાતમી મળતા શનિવારે રાત્રે બજાણા પાસે વોચ રખાઈ હતી. જેમાં શંકાસ્પદ ક્રેટા કાર આવતા તેને રોકવાની કોશીષ કરતા કાર ચાલકે કાર ભગાવી હતી. જેમાં પોલીસે એકાદ કીમી પીછો કરીને કારને આંતરી હતી. જેમાં રાજસ્થાનના માંગીલાલ લીમ્બારામ બીશ્નોઈ, દિનેશ ભાગરાજ બીશ્નોઈ અને કૈલાસ હરીરામ બીશ્નોઈ ઝડપાયા હતા. પોલીસે રૂપીયા 2,06,790નો દારૂ અને બીયર, રૂપીયા 10 લાખની કાર, રૂપીયા 20 હજારના 4 મોબાઈલ સહિત રૂપીયા 12, 26,790નો મુદ્દામાલ જપ્ત કર્યો હતો. પ્રાથમીક તપાસમાં આ દારૂ રાજસ્થાનથી ચોટીલા લઈ જવાનો હોવાનું બહાર આવ્યુ હતુ. આથી ઝડપાયેલા ત્રણ ઉપરાંત દારૂ મોકલનાર રમેશ કાળુરામ બીશ્નોઈ, રાજુ પરખા, ક્રેટા કારનો માલીક અને ચોટીલામાં દારૂ મંગાવનાર સહિતનાઓ સામે બજાણા પોલીસ મથકે ગુનો નોંધાયો છે. જયારે લખતર પીએસઆઈ પી.બી.રમલાવત, મહાવીરસીંહ પઢેરીયા, અનીકેતસીંહ સહિતનાઓ શનિવારે રાત્રે પેટ્રોલિંગ કરી રહ્યા હતા. ત્યારે ભાસ્કરપરા કેનાલના રસ્તે દારૂ ભરેલ કાર નીકળનાર હોવાની બાતમી મળતા વોચ રખાઈ હતી. જેમાં શંકાસ્પદ કાર નીકળતા પોલીસે પીછો કરતા કાર ચાલકે કાર છાબલી તરફ મારી મુકી હતી. જેમાં 3 કીમી દુર જતા આગળ રેલવે ફાટક બંધ હોવાથી ચાલક કાર ખેતરોમાં મુકી ફરાર થઈ ગયો હતો. પોલીસે કારમાંથી દારૂની વીવીધ બ્રાન્ડની 324 બોટલ કિંમત રૂપીયા 54,400, બીયરના 144 ટીન કિંમત રૂપીયા 17,280 અને રૂપીયા ર લાખની સ્વીફટ કાર મળી કુલ રૂપીયા 2,76,800નો મુદ્દામાલ જપ્ત કર્યો હતો. બનાવની ફરાર કાર ચાલક સામે ફરિયાદ નોંધી વધુ તપાસ પોલીસ ચલાવી રહી છે. બીજી તરફ સુરેન્દ્રનગર એલસીબી ટીમના વિજયસીંહ પરમાર, ગોપાલસીંહ ઝાલા સહિતનાઓને પેટ્રોલિંગ દરમિયાન મીયાણાવાડમાં રહેતો મુસ્તુફા ઉર્ફે રાજા હબીબભાઈ માણેક તેના રહેણાક મકાન પાસે આવેલ તેના કબજા ભોગવટાના અલ્લારખાભાઈ સુલેમાનભાઈ માણેકના મકાનમાં વિદેશી દારૂ રાખી વેચાણ કરતો હોવાની બાતમી મળી હતી. આથી પોલીસે ગુરૂવારે સાંજે રેડ કરી હતી. જેમાં મુસ્તુફા માણેક વિદેશી દારૂની અલગ-અલગ બ્રાન્ડની 33 બોટલો કિંમત રૂપીયા 15 હજાર, રૂપીયા 10 હજારનો મોબાઈલ ફોન મળી કુલ રૂપીયા 25 હજારની મત્તા સાથે ઝડપાયો હતો. આ શખ્સની પ્રાથમીક પુછપરછમાં આ દારૂ તે કૃષ્ણનગરમાં રહેતા મયુરધ્વજસીંહ ઝાલા પાસેથી લાવ્યો હોવાનું ખુલતા બન્ને સામે એ ડીવીઝન પોલીસ મથકે ફરિયાદ નોંધાઈ છે. મયુરધ્વજસીંહ ઝાલાની ઝડપી લેવા વધુ તપાસ મહીપતસીંહ પરમાર ચલાવી રહ્યા છે. જયારે ચોટીલા પોલીસની ટીમને ચોટીલા નેશનલ હાઈવે પર આવેલ સોનલ કૃપા હોટલ પાછળ ખેરડી જવાના રસ્તે પસાર થતો એક શખ્સ શંકાસ્પદ લાગતા તેને અટકાવી તપાસ કરાઈ હતી. જેમાં ચોટીલાના પોપટપરામાં રહેતો જયસુખ રાણાભાઈ ચૌહાણ વિદેશી દારૂની 1 બોટલ કિંમત રૂપીયા 300 સાથે પકડાયો હતો.
