- OECDએ FY25 માટે ભારતના આર્થિક વિકાસ દરનું અનુમાન વધાર્યું
- પહેલા OECDએ 6.1 ટકાના આર્થિક વિકાસ દરનું અનુમાન લગાવ્યું હતું
- 2024, 25માં મજબૂત સ્થાનિક માંગને કારણે ભારત 6.5%ના દરે વૃદ્ધિ કરશે: IMF
IMF બાદ હવે OECDએ પણ આવનાર નાણાકીય વર્ષ 2024-25 માટે ભારતના આર્થિક વિકાસ દરનું અનુમાન વધારી દીધું છે. OECDના અનુમાન મુજબ રોકાણમાં ભારે ઉછાળાને કારણે 2024-25માં ભારતીય અર્થવ્યવસ્થા 6.5%ના દરથી વિકાસ કરશે. પહેલા OECDએ 6.1 ટકાના આર્થિક વિકાસ દરનું અનુમાન લગાવ્યું હતું.
38 મોટી આવક ધરાવતા દેશોના સંગઠન OECD (ઓર્ગેનાઈઝેશન ફોર ઈકોનોમિક કો-ઓપરેશન એન્ડ ડેવલપમેન્ટ)એ જણાવ્યું છે કે ચાલુ નાણાકીય વર્ષ 2023-24માં ભારતીય અર્થવ્યવસ્થા 6.7 ટકાના દરે વૃદ્ધિ દરે વિકાસ કરશે. IMFએ પણ 6.7 ટકાનો અંદાજ લગાવ્યો છે. જો કે, ભારતના આંકડા મંત્રાલયે ચાલુ નાણાકીય વર્ષમાં GDP 7.3 ટકા રહેવાનો અંદાજ મૂક્યો છે. OECD અનુસાર, 2025-26માં અર્થતંત્ર 6.25 ટકાના દરે વૃદ્ધિ પામશે. મોંઘવારીમાંથી પણ રાહત મળવાની આશા છે. ભારતમાં ફુગાવાનો દર 2024-25માં 4.9 ટકા રહેવાનો અંદાજ છે, જે અગાઉ 5.3 ટકા હોવાનો અંદાજ હતો. 2025-26માં મોંઘવારીનો દર 4.3 ટકા રહી શકે છે. OECD એ વૈશ્વિક વૃદ્ધિના દૃષ્ટિકોણમાં પણ સુધારો કર્યો છે. તેમનું માનવું છે કે 2024માં વૈશ્વિક વૃદ્ધિ દર 2.9 ટકા રહી શકે છે, જે અગાઉ 2.7 ટકા રહેવાનો અંદાજ હતો.
ગયા સપ્તાહે જ ઈન્ટરનેશનલ મોનેટરી ફંડ (IMF)એ પણ પોતાનું અનુમાન જાહેર કર્યું હતું અને કહ્યું હતું કે 2024માં ભારત 6.5 ટકાના દરે વૃદ્ધિ કરશે. IMFએ વર્લ્ડ ઈકોનોમિક આઉટલુક રિપોર્ટ જાહેર કરતી વખતે પોતાના અંદાજમાં 20 બેસિસ પોઈન્ટ્સનો સુધારો કર્યો છે. રિપોર્ટ અનુસાર, 2024 અને 2025માં મજબૂત સ્થાનિક માંગને કારણે ભારત બંને વર્ષોમાં 6.5 ટકાના દરે વૃદ્ધિ કરશે.
તાજેતરમાં, નાણા મંત્રાલયે ભારતીય અર્થવ્યવસ્થા પર એક અહેવાલ જાહેર કર્યો હતો અને કહ્યું હતું કે 2023-24 સતત ત્રીજું વર્ષ છે જ્યારે ભારતનો આર્થિક વિકાસ દર 7 ટકાથી વધુ થવા જઈ રહ્યો છે, જ્યારે વૈશ્વિક અર્થવ્યવસ્થાને 3 ટકાના દરે વિકાસ કરવા માટે સંઘર્ષ કરવો પડશે.
