સરકારી અનાજ સગેવગે કરવાના કૌભાંડનો પર્દાફાશ, ચાર વેપારીઓ વિરુદ્ધ ફરિયાદ

• ઈડર પુરવઠા મામલતદારે ફરિયાદ નોંધાવ્યા બાદ વેપારીઓમાં ફફડાટ
• પુરવઠા વિભાગ દ્વારા રૂ.34.24 લાખનું અનાજ અને રૂ.5લાખની આઈસર સીઝ કરાઈ
  
• ફરીયાદ નોંધાયા બાદ પોલીસે કૌભાંડમાં સામેલ ચારેય વેપારીઓને ઝડપી દીધા છે
  

બનાસકાંઠા જિલ્લામાંથી કેટલોક સરકારી અનાજનો જથ્થો ગેરકાયદે રીતે સાબરકાંઠાના ઈડર સ્થિત જુના માર્કેટયાર્ડના કેટલાક વેપારીઓએ લીધા બાદ આ કૌભાંડનો પર્દાફાશ થયો હતો અને સોમવારે તપાસનો ધમધમાટ શરૂ થયા બાદ મોડેથી જુના માર્કેટયાર્ડના ચાર પેઢીના માલિકો વિરુદ્ધ ઈડર પુરવઠા વિભાગના મામલતદારી આવશ્યક ચીજવસ્તુ ધારાના ભંગ બદલ પોલીસ ફરિયાદ દાખલ કરાઈ હતી. આ અંગે સૂત્રોમાંથી મળતી માહિતી મુજબ બનાસકાંઠા જિલ્લામાંથી થોડાક દિવસ અગાઉ જાહેર વિતરણ વ્યવસ્થા હેઠળ વિતરણ કરવામાં આવતો ફોર્ટીફાઈડ ચોખા તથા ઘઉં અને ચણાનો જથ્થો સરકારના નિયમનો ભંગ કરીને કેટલાક બીલો અધુરી વિગતો સાથે રજુ કર્યા હોવાનું બહાર આવ્યા બાદ તપાસનો ધમધમાટ શરૂ થયો હતો અને તેના ભાગરૂપે ગાંધીનગરથી પુરવઠા વિભાગના અધિકારીઓ હિંમતનગરની કેટલીક પેઢીઓની મુલાકાત પણ લીધી હતી. ત્યારબાદ જિલ્લા કલેકટરના આદેશથી પુરવઠા મામલતદાર ઈડર વી.આર.જોષી દ્વારા મોડી સાંજે ઈડરના જુના માર્કેટયાર્ડ સ્થિત પેઢીના ચાર માલિકો વિરુદ્ધ ઈડર પોલીસ સ્ટેશનમાં ફરીયાદ દાખલ કરાઈ હતી. તો બીજી તરફ મંગળવારે પણ ગાંધીનગરથી પુરવઠા વિભાગના કેટલાક અધિકારીઓ ઈડર આવ્યા હતા અને કેટલીક વિગતો મેળવ્યા બાદ તેઓ ચુપચાપ રવાના થઈ ગયા હતા. જોકે ફરીયાદ નોંધાયા બાદ ઈડર પોલીસે કૌભાંડમાં સામેલ ચારેય વેપારીઓને ઝડપી લેવાના ચક્રો ગતિમાન કરી દીધા છે. પુરવઠા વિભાગે કેટલો જથ્થો સીઝ કર્યો

સરકારી અનાજનો શંકાસ્પદ પુરવઠા વિભાગ દ્વારા સીઝ કરવામાં આવ્યો છે તેમાં અંદાજે રૂ.13.04 લાખના પર,180 કિલો ગ્રામ ચોખા, રૂ.20.16 લાખનો 1,00,800 કિલો ગ્રામ ઘઉં, રૂ.1,04,472ની કિંમતના 2089.450 કિલો ગ્રામ ચણા અને રૂ.5 લાખની આઈસર નંબર જીજે.05એટી.2810 અને આઈસર નં.જીજે.09ઝેડ.4760 મળીને અંદાજે રૂ.39,24,988 નો મુદ્દામાલ પુરવઠા વિભાગે પકડી સીઝ કરવામાં આવ્યો છે. કોની વિરુદ્ધ ફરિયાદ નોંધાવાઈ

સહકાર ટ્રેડીંગ, જુના માર્કેટયાર્ડ ઈડરના માલિક મેમણ મહંમદએઝાઝ સફીભાઈ (રહે.ગંભીરપુરા)

શાહ રતનલાલ પન્નાલાલ, દુકાન નં.96ના માલિક શાહ મુકેશભાઈ રતનલાલ (રહે.શ્રીનગર, ઈડર)

ભારત એગ્રો ઈન્ડસ્ટ્રીઝ, દુકાન નં.39-40ના માલિક જાવેદહુસૈન હાજી ઉસ્માનભાઈ (રહે.અમનપાર્ક સોસાયટી, ઈડર)

નેશનલ ટ્રેડર્સ, દુકાન નં.76ના માલિક મેમણ જાવેદભાઈ હનીફભાઈ (રહે.ઈડર)