- ઈઝરાયલ-ગાઝાના યુદ્ધમાં બીજી વખત યુદ્ધવિરામની સ્થિતિ
- યુદ્ધવિરામ અંગે પેરિસમાં વાતચીત ચાલી રહી છે
- ઈજિપ્ત અને અમેરિકા ભજવી રહ્યા છે મધ્યસ્થીની ભૂમિકા
લગભગ પાંચ મહિનાથી ચાલી રહેલા ઈઝરાયલ-ગાઝાના યુદ્ધમાં બીજી વખત યુદ્ધવિરામની સ્થિતિ સર્જાઈ રહી છે. આ યુદ્ધવિરામ પણ મર્યાદિત સમય માટે હશે અને તેનો મુખ્ય ઉદ્દેશ્ય ગાઝામાં બંધક બનેલા લગભગ 130 ઈઝરાયેલી નાગરિકોને મુક્ત કરાવવાનો રહેશે. આ દરમિયાન ગાઝામાં ઈઝરાયેલ સેનાના હુમલા ચાલુ છે. આ હુમલાઓ વચ્ચે, ઇઝરાયેલી સેનાએ ઘણા હમાસના આતંકવાદીઓને પકડી લીધા છે જેઓ સામાન્ય નાગરિકો સાથે બચીને ભાગી રહ્યા હતા.
હવે પેરિસમાં યુદ્ધવિરામ અંગેની વાતચીત ચાલી રહી છે. આ વાતચીતમાં કતાર, ઈજિપ્ત અને અમેરિકા મધ્યસ્થીની ભૂમિકા ભજવી રહ્યા છે. ઈઝરાયેલના રાષ્ટ્રીય સુરક્ષા સલાહકાર ઝાચી હનાબીના જણાવ્યા અનુસાર, ઈઝરાયેલનું પ્રતિનિધિમંડળ મંત્રણામાં ભાગ લીધા બાદ તેલ અવીવ પરત ફર્યું છે.
પેરિસમાં ચાલી રહી છે મંત્રણા
પ્રતિનિધિમંડળે યુદ્ધવિરામની તરફેણમાં કેટલીક બાબતો જણાવી છે. મંત્રણામાં સામેલ આ લોકો યુદ્ધવિરામની શરતો વિશે યુદ્ધ બાબતો માટે ગઠિત મંત્રી મંડળને જણાવશે. આ પછી મંત્રી મંડળ યુદ્ધવિરામ પર નિર્ણય લેશે. એવું માનવામાં આવે છે કે જો યુદ્ધવિરામ થશે, તો તે રમઝાન મહિનામાં થશે જેથી મુસ્લિમો તેમની ધાર્મિક પ્રવૃત્તિઓ કરી શકે.
અત્યાર સુધીની વાટાઘાટોમાં એ વાત નિશ્ચિત છે કે ગાઝામાં અસ્થાયી યુદ્ધવિરામ થશે, પરંતુ ઈઝરાયેલના બંધકોના બદલામાં મોટી સંખ્યામાં પેલેસ્ટિનિયન કેદીઓને ઈઝરાયેલની જેલોમાંથી મુક્ત કરવામાં આવશે. નવેમ્બર 2023 ના યુદ્ધવિરામમાં, એક ઇઝરાયેલી બંધકના બદલામાં ત્રણ પેલેસ્ટિનિયન કેદીઓને મુક્ત કરવામાં આવ્યા હતા. દરમિયાન, ગાઝામાં યુદ્ધ ચાલુ છે. હમાસના આતંકવાદીઓ ઓ સાથેની અથડામણમાં ઈઝરાયેલી સેનાનો એક મેજર માર્યો ગયો હોવાના અહેવાલ છે.
ઇઝરાયેલ સૈનિકોના મૃત્યુની સંખ્યામાં વધારો
આ સાથે ગાઝામાં મૃતક ઇઝરાયેલ સૈનિકોની સંખ્યા વધીને 239 થઈ ગઈ છે. આ યુદ્ધમાં 30 હજાર પેલેસ્ટિનિયન માર્યા ગયા છે. દરમિયાન, હમાસના ઘણા આતંકવાદીઓ જેઓ સામાન્ય નાગરિકો સાથે ખાન યુનિસથી ભાગી રહ્યા હતા તેઓને ઇઝરાયેલી સેનાએ પકડી લીધા છે. ધરપકડ કરાયેલા લોકો પાસેથી હથિયારો મળી આવ્યા છે. આ જાણકારી ઈઝરાયેલની સેનાએ આપી છે.
