- લેબર પાર્ટી દ્વારા લેબર ઇન્ડિયન્સ પહેલનો પ્રારંભ કરાયો
- ભારત સાથે વાતચીતને મજબૂત કરવાના આશય સાથે નવો પ્રવાસી આઉટરિચ કાર્યક્રમ શરૂ કર્યો
- લંડનમાં સંસદ ભવન પરિસરમાં લેબર ઇન્ડિયન્સ પહેલનો પ્રારંભ કર્યો
બ્રિટનમાં આ વર્ષના અંતે યોજાનારી સામાન્ય ચૂંટણીમાં વિપક્ષી લેબર પાર્ટીએ સત્તા મેળવવા માટે બ્રિટિશ ભારતીયોને સાધવા માટે પ્રયાસ શરૂ કર્યા છે. લેબર પાર્ટીએ પ્રવાસી ભારતીયો સાથે જોડાવા માટે અને સત્તામાં આવ્યાના એક વર્ષમાં ભારત સાથે વાતચીતને મજબૂત કરવાના આશય સાથે નવો પ્રવાસી આઉટરિચ કાર્યક્રમ શરૂ કર્યો છે. લેબર પાર્ટીના વિદેશ મામલાના સચિવ ડેવિડ લેમીએ લંડનમાં સંસદ ભવન પરિસરમાં લેબર ઇન્ડિયન્સ પહેલનો પ્રારંભ કર્યો છે. આ પ્રસંગે લેમીએ પોતાના તાજેતરના ભારત પ્રવાસનો ઉલ્લેખ કર્યો હતો. સાથે જ તેમણે લેબર પાર્ટી જો આગામી ચૂંટણીમાં જીત મેળવે તો ભારત-બ્રિટનની ભાગીદારીને નવી ઊંચાઇ પર લઇ જવાની પોતાની મહત્ત્વાકાંક્ષા પણ જણાવી હતી. ભારતને એક મહાશક્તિ ગણાવતા લેમીએ કહ્યું હતું કે ભારતની વ્યૂહાત્મક ભાગીદારી પક્ષગત રાજકારણથી પર છે. તેમણે કહ્યું હતું કે ઉદ્યોગસાહસિકતા, ઇનોવેશન, વૈજ્ઞાનિક, ઔદ્યોગિક આધાર અને મોટી વસતી સાથે ભારત એક મહાશક્તિ છે. આ વાતે જરાય શંકા નથી કે આ ભૂ-રાજકીય સમયમાં બ્રિટન માટે આ સમજવંુ ખૂબ જ મહત્ત્વપૂર્ણ છે કે ભારત દુનિયાની એક મહાશક્તિ છે.
