- આ શિયાળામાં સતત ત્રીજી વખત કમોસમી વરસાદ
- 47 તાલુકાઓ પૈકી 40 તાલુકામાં હળવોથી મધ્યમ કમોસમી વરસાદ થયો
- છેલ્લા 12 વર્ષમાં પાંચ વખત માર્ચમાં કમોસમી વરસાદ
શિયાળાના અંતમાં અને ઉનાળાના આગમન સમયે ઉત્તર ગુજરાતના મોટાભાગના વિસ્તારોમાં કમોસમી વરસાદ થતાં ખેડૂતોને વ્યાપક નુકસાન થયુ છે. બીજી તરફ ગાજવીજ સાથે તૂટી પડેલા વરસાદને કારણે એક જ દિવસમાં 9 ડિગ્રી લઘુત્તમ તાપમાન ગગડી જતાં ફરી એક વખત ઠંડીનો ચમકારો અનુભવાયો છે.
છેલ્લા કેટલાક દિવસોથી લઘુત્તમ તાપમાન 20 ડિગ્રીને પાર કરી જતાં ગરમીનો અનુભવ થવા લાગ્યો હતો. પરંતુ શનિવારે કમોસમી વરસાદ થતાં પારો ગગડીને 12 ડિગ્રીએ આવી જતાં લોકો ઠંડીમાં ઠુંઠવાયા હતા. હજુ આગામી ત્રણ દિવસ ઠંડીનો ચમકારો રહેશે અને બાદમાં લઘુત્તમ તાપમાન ઉંચકાવા લાગશે. આગામી સપ્તાહથી ઉનાળાનો પણ પ્રારંભ થઈ શકે છે. જો કે ઉનાળાના આગમ પહેલાં કુદરતે કરવટ બદલતાં કરા સાથે પડેલા કમોસમી વરસાદથી હજારો હેક્ટરમાં રવી પાકોને નુકસાન થયુ છે. જેના પગલે ખેડૂતોની હાલત કફોડી બની ગઈ છે.
ગયા વર્ષે માર્ચ મહિનાના પ્રારંભે જ કમોસમી વરસાદ થયો હતો. હોળીના સમયગાળા દરમિયાન તો જાણે ચોમાસુ મંડાઈ ગયુ હોય તેવો વરસાદ પડયો હતો. જેના કારણે ખેડૂતોને વ્યાપક નુકસાન થયુ હતુ. ઘઉંનો મોટાભાગનો પાક પલળી જતાં ખેડૂતોને મણ દીઠ 200 રૂપિયા જેટલો ઓછો ભાવ મળ્યો હતો. દરમિયાન સતત બીજા વર્ષે પણ વેસ્ટર્ન ડિસ્ટર્બન્સની અસર હેઠળ શનિવારે ઉત્તર ગુજરાતના મોટાભાગના વિસ્તારોમાં કડાકા-ભડાકા સાથે કમોસમી વરસાદ તૂટી પડયો હતો. વરસાદની સાથે કરા પણ પડયા હતા, જેના પગલે તૈયાર રવી પાકોને વ્યાપક નુકસાન થયુ છે. કમોસમી વરસાદ બાદ વાતાવરણ પણ પલટાઈ ગયુ છે અને ઉનાળાના આગમનની તૈયારીઓ વચ્ચ ફરીથી ઠંડીનો ચમકારો અનુભવાઈ રહ્યો છે. શનિવારે ડીસાનું લઘુત્તમ તાપમાન ર1.ર ડિગ્રી નોંધાયુ હતુ. જ્યારે કમોસમી વરસાદ થતાં તાપમાન ગગડીને શનિવારે 12.4 ડિગ્રી નોંધાયુ હતુ. એક જ દિવસમાં પારો 8.8 ડિગ્રી ગગડી જતાં કડકડતી ઠંડીનો લોકોએ અનુભવ કર્યો હતો.
ઠંડાગાર વાતાવરણ વચ્ચે ઠંડા પવન ફૂંકાતાં શિયાળાના મધ્યમાં ઠંડી પડે તેવો લોકોએ અનુભવ કર્યો હતો અને ફરીથી ગરમ વસ્ત્રો પહેરવાની ફરજ પડી હતી.
હજુ આગામી ત્રણ દિવસ સુધી ઉત્તર ગુજરાતમાં ઠંડીનો ચમકારો રહશે. ત્યાર બાદ તાપમાન ઉચકાવા લાગશે અને માર્ચ મહિનાના બીજા સપ્તાહતી ધીમા પગલે ઉનાળાની શરૂઆત થઈ જવાની શક્યતાઓ રહેલી છે.
છેલ્લા 12 વર્ષમાં પાંચ વખત માર્ચમાં કમોસમી વરસાદ
છેલ્લા 12 વર્ષમાં માર્ચ મહિનામાં વર્ષ 20 13, 1015, 20 20 , 20 23 અને 2024માં કમોસમી વરસાદ થયો હતો. જેમાં વર્ષ 20 13 અને 2020 માં વરસાદી ઝાપટાં થયાં હતા. જ્યારે 2015માં ડીસામાં 15 મી.મી. વરસાદ થયો હતો. ગયા વર્ષે તો છેલ્લા 12 વર્ષમાં પ્રથમ વખત ઉત્તર ગુજરાતમાં માર્ચ મહિનામાં એકથી દોઢ ઈંચ વરસાદ થયો હતો. ગત વર્ષે તા. 17થી 19મી માર્ચ સુધી કડાકા-ભડાકા અને તેજ પવન ફૂંકાવા સાથે વરસાદ વરસ્યો હતો અને ઉત્તર ગુજરાતના 37 તાલુકામાં વરસાદ થયો હતો.
શિયાળાના આરંભથી જ વાતાવરણમાં પલટો નોંધાયો
શિયાળાની શરૂઆતથી જ વાતાવરણમાં સતત પલટો આવતો રહ્યો છે. શિયાળાના પ્રારંભે જ 26 નવેમ્બરના રોજ ભર શિયાળે અષાઢી માહોલ સર્જાયો હતો અને ઉત્તર ગુજરાતના અનેક વિસ્તારોમાં ગાજવીજ સાથે વરસાદ તૂટી પડયો હતો. ત્યારબાદ 3 ડિસેમ્બરના રોજ પણ ફરીથી ઉત્તર ગુજરાતમાં કમોસમી માવઠુ થયુ હતુ. જ્યારે શિયાળાના અંતમાં પણ ર માર્ચે ઉત્તર ગુજરાતમાં ગાજવીજ સાથે કમોસમી વરસાદ થયો હતો. ઉત્તર ગુજરાતના 47 તાલુકાઓ પેકી 40 તાલુકામાં શનિવારે દિવસ દરમિયાન કમોસમી વરસાદ થયો હતો. જેમાં બનાસકાંઠાના ધાનેરા અને ભાભરમાં એક ઈંચ જેટલો અને સાબરકાંઠાના વડાલીમાં 20 મી.મી વરસાદ નોંધાયો હતો.
નુકસાનનો સર્વે કરાવી ખેડૂતોને સહાય આપવા રજૂઆતો
કમોસમી વરસાદથી ઘઉં,રાયડો, મકાઈ, વરિયાળી, જીરું, તરબૂચ સહિતના પાકોને નુકસાન થયુ છે. જેના પગલે ખેડૂતોની હાલત કફોડી બની ગઈ છે. દરમિયાન અરવલ્લી જિલ્લા સહિત ઉત્તર ગુજરાતમાં સર્વે કરાવી ખેડૂતોને નુકસાની સહાય આપવામાં આવે તેવી બાયડ ધારાસભ્ય
ધવલસિંહ ઝાલાએ મુખ્યમંત્રીને પત્ર લખી માંગ કરી છે. અરવલ્લી જિલ્લા પંચાયતના પૂર્વ પ્રમુખ રાજેન્દ્ર પારઘીએ પણ રાજ્યના કૃષિ મંત્રીને રજૂઆત કરી સર્વે કરાવવામાં આવે અને ખેડૂતોને સહાય આપવામાં આવે તેવી માંગ કરી છે.
પાક પલળી જતાં ખેડૂતોને વ્યાપક નુકસાન
ઉત્તર ગુજરાતમાં સૌથી વધુ 3.69 લાખ હેક્ટરમાં ઘઉંનુ વાવેતર કરવામાં આવ્યુ હતુ. ઘઉંનો પાક તૈયાર થઈ ગયો છે અને ખેડૂતો લણણીની તૈયારીઓ કરી રહ્યા છે તેવા સમયે જ વરસાદ થતાં તૈયાર ઘઉં પલળી ગયા છે. વરસાદ થતાં ઘઉં કાળા પડી જવા સાથે દાણો પાતળો થઈ જાય તો ખેડૂતોને ભાવ ઓછા મળવાની દહેશત રહેલી છે. આ જ રીતે ર.રપ લાખ હેક્ટરમાં રાયડો,1.27 લાખ હેક્ટરમાં બટાકા,92 હજાર હેક્ટરમાં જીરું,63 હજાર હેક્ટરમાં ચણા,38 હજાર હેક્ટરમાં તમાકુ,રપ હજાર હેક્ટરમાં વરિયાળી,11 હજાર હેક્ટરમાં મકાઈ,39 હજાર હેક્ટરમાં શાકભાજી મળી કુલ 13 લાખ હેક્ટરમાં વાવેતર કરવામાં આવ્યુ હતુ. તમામ રવી પાકો તૈયાર થવા આવ્યા છે. તે સમયે જ વરસાદે ખેડૂતોની હાલત બગાડી નાખી છે.
કરા પડવાથી બાયાગતી પાકોને નુકસાન થયું
કમોસમી વરસાદની સાથે ઉત્તર ગુજરાતમાં મોટાભાગના વિસ્તારોમાં કરા પણ પડયા હતા. અરવલ્લી અને સાબરકાંઠા જિલ્લામાં અનેક જગ્યાએ પપૈયાનું વાવેતર કરવામાં આવેલ છે. તૈયાર થઈ ગયેલા પપૈયાના ફળ ઉપર કરા પડતાં નુકસાન થયુ છે. બીજી તરફ પપૈયાના ઝાડ પણ પવનને કારણે ભાગી પડતાં ખેડૂતોને મોટુ નુકસાન થયુ છે. ભારે પવનને કારણે અનેક જગ્યાએ ઘઉંનો પાક પણ આડો પડી ગયો હતો. જયારે વરિયાળીના છોડ પણ પવનમાં ભાંગી ગયા હતા.
