રાજકોટમાં શુક્રવારે ખડગે ગજવશે સભા, પ્રિયંકાની સભા પણ ગોઠવવાનું આયોજન

ભાજપના ગઢ ગુજરાતમાં આમતો ભાજપની જીતની બોણી સુરતની બેઠકથી થઇ ચુકી છે. અન્ય બેઠક માટે ખુદ વડાપ્રધાન નરેન્દ્ર મોદી તા.૨ના રોજ સૌરાષ્ટ્ર ધમરોળવા આવી રહ્યા છે ત્યારે બીજીબાજુ ગુજરાતમાં ભાજપના ગઢમાં ગાબડું પાડવા કોંગ્રેસના રાષ્ટ્રીય પ્રમુખ મલ્લિકાર્જુન ખડગે, રાહુલ ગાંધી અને પ્રિયંકા પણ કાઉન્ટર એટેક કરવાની રણનીતિ સાથે ગુજરાતમાં પડાવ નાખવાના છે. તા.3ના રોજ ખડગે રાજકોટમાં સભા ગજવવા આવી રહ્યા છે તો તા.૫ને રવિવારે પ્રિયંકા ગાંધીની સભા પણ રાજકોટમાં યોજાય તેવી ગોઠવણ થઇ રહી છે. ખડગેનો રાજકોટ પ્રવાસ તા.૨ના રોજ નિશ્ચિત છે. ઢેબર ચોક ખાતે સભા રાખવામા આવશે તેવી જાહેરાત પણ થઇ ચુકી છે. સમય હવે પછી જાહેર થશે. જ્યારે પ્રિયંકાનું રાજકોટ આવશે કે કેમ તે અંગે આવતીકાલ સુધીમાં ફાઇનલ થઇ જશે.
ભાજપના પરસોતમ રૂપાલાએ ક્ષત્રિય સમાજની બહેન-દીકરીઓને લઇને જે ટીપ્પણી કરીને વિવાદ છેડ્યો છે તેનુ એપી સેન્ટર રાજકોટ છે. જેને લઇને વિપક્ષ કોંગ્રેસ ગઠબંધન સંગઠને રાજકોટ બેઠકને લોકસભાની સૌથી વધુ હોટસીટ ગણાવીને ભાજપ સામે તમામ મોરચે બાથ ભીડી છે. હાલ રાહુલ ગાંધી ગુજરાતમાં સભા યોજી રહ્યા છે. ત્યારે કોંગ્રેસના રાષ્ટ્રીય પ્રમુખ મલ્લિકાર્જુન ખડગે પણ સૌરાષ્ટ્ર સહિત ગુજરાતમાં સભા ગજવવાના છે. તા.૨ના રજ ખડગે રાજકોટ પ્રચાર માટે આવવાના છે. ઢેબર ચોકમાં સભાનું આયોજન છે. સભાનો સમય આજ સાંજ સુધીમાં જાહેર થઇ જશે.
જ્યારે પ્રિયંકા ગાંધીની સભા પણ રાજકોટમાં થાય તેવી ગોઠવણ ચાલી રહી છે. રાજકોટ શહેર કોંગ્રેસ પ્રમુખ અતુલ રાજાણીનો સંપર્ક કરવામા આવતા તેમણે જણાવ્યુ હતુ કે, સંભવત: તા.૫ને રવિવારે પ્રિયંકા ગાંધી રાજકોટ આવી શકે છે. ફાઇનલ કાર્યક્રમ આવતીકાલ સુધીમાં દિલ્હીથી આવ્યા પછી નક્કી થશે કે પ્રિયંકા ગાંધી રાજકોટ આવશે કે નહીં. હાલ તો રાજકોટ આવશે તેમ માનીને તેમની સભાનું આયોજન થઇ રહ્યુ છે.