પાર્થ સ્કુલના મતદાન મથક પાસે થઇ માથાકૂટ
ભાજપના કાર્યકરો ૧૦૦ મીટરની ત્રિજ્યામાં પ્રચાર કરતા હોવાના મામલે શાબ્દિક ટપાટપી થઇ
રાજકોટમાં બપોરે ત્રણ વાગ્યા સુધી થયેલુ મતદાન એકંદરે શાંતિપૂર્ણ માહોલ વચ્ચે થયુ હતુ. જો કે બપોરે ૧૦ વાગ્યાના અરસામાં એકમાત્ર રેલનગર વિસ્તારમાં આવેલી પાર્થ સ્કુલના મતદાન મથક પાસે ભાજપ અને કોંગ્રેસના કાર્યકરો વચ્ચે તણખા ઝર્યા હતા. અહીં મતદાન મથકના ૧૦૦ મીટરની અંદર ભાજપના કાર્યકર્તાઓ પ્રચાર કરતા હોવાની આક્ષેપ કરીને કોંગ્રેસના કાર્યકરો ટપારવા જતાં માથાકૂટ થઇ હતી. જો કે હથિયારધારી પોલીસ જવાનો આવી જતા મામલો થાળે પડી ગયો હતો.
રેલનગરમાં પેટ્રોલ પમ્પની નજીક શાળા નં.૧૭થી થોડે દૂર આવેલી પાર્થ પ્રાયમરી સ્કુલના મતદાન મથકની ૧૦૦ મીટરની ત્રિજ્યામાં મતદારોને અમુક ભાજપના કાર્યકર્તાઓ ભાજપને મતદાન આપજો તેમ કહેતા હોવાનો આક્ષેપ કોંગ્રેસના કાર્યકર્તાઓએ કર્યો હતો. મતદાન મથક પર હાજર અધિકારીઓ તેમજ પોલીસ સમક્ષ પણ ફરિયાદ કરી હતી. કોંગ્રેસના કાર્યકર્તાઓ ખોટો આક્ષેપ કરે છે તેવુ ભાજપના કાર્યકર્તાઓએ કહેતા બન્ને વચ્ચે શાબ્દિક ટપાટપી બોલી હતી.
૧૦૦ મીટરની ત્રિજ્યામાં કોંગ્રેસના પણ બેનરો હતા
રેલનગરના જે મતદાન મથક પાસે ભાજપ અને કોંગ્રેસના કાર્યકરો વચ્ચે માથાકૂટ થઇ હતી એ પાર્થ સ્કુલના બૂથની ૧૦૦ મીટરની ત્રિજ્યામાં કોંગ્રેસના પણ બેનરો હતો. આ બેનર ચૂંટણી તંત્રના સ્ટાફે દૂર કરાવવાનું કહેતા કોંગ્રેસના કાર્યકરોએ એવો વિરોધ કર્યો હતો કે ભાજપના કાર્યકર્તાઓ પણ મતદાન મથકે આવતા મતદારોને ભાજપ તરફી મતદાન કરવા ભલામણ કરી રહ્યા છે.
