Israel-India: હમાસ હુમલાની નિંદા કરનારા પ્રથમ નેતા,રાષ્ટ્રપતિ હર્જોગએ PMમોદીના વખાણ કર્યા

ભારતના પ્રધાનમંત્રી નરેન્દ્ર મોદીના નેતૃત્વના ચોમેર વખાણ થઇ રહ્યા છે. કોરોના જેવી વિકટ સ્થિતિ હોય કે પછી યુદ્ધની વાત હોય. ભારત હંમેશા પોતાનુ સ્ટેન્ડ ક્લિઅર જણાવી રહ્યું છે. ત્યારે ઇઝરાયલ હમાસ વચ્ચે હુમલાને લઇને ઇઝરાયલના રાષ્ટ્રપતિએ પ્રધાનમંત્રી નરેન્દ્ર મોદીના વખાણ કર્યા છે.

ઈઝરાયેલના રાષ્ટ્રપતિ આઈઝેક હરઝોગે 7 ઓક્ટોબરે હમાસના હુમલાની નિંદા કરવા બદલ વડાપ્રધાન નરેન્દ્ર મોદીનો આભાર માન્યો છે. તેમણે કહ્યું કે ભારત વિશ્વના સૌથી મોટા દેશોમાંનો એક છે અને ઈઝરાયેલ સૌથી નાના દેશોમાંનો એક છે. તેમ છતાં આપણે બંને સંપૂર્ણપણે આધુનિક રાષ્ટ્રો છીએ, જે મજબૂત લોકશાહી આદર્શો પર આધારિત છે.

મહત્વનું છે કે મંગળવારે દિલ્હીમાં ઇઝરાયેલ રાષ્ટ્રીય દિવસની ઉજવણીનું આયોજન કરવામાં આવ્યું હતું, જેને ઇઝરાયેલના રાષ્ટ્રપતિ હરઝોગે વર્ચ્યુઅલ રીતે સંબોધિત કરતા જણાવ્યું હતું કે ભારત અને ઈઝરાયેલની ભાગીદારી મજબૂત વેપાર અને વ્યાપારી સંબંધોથી લઈને અર્થપૂર્ણ સાંસ્કૃતિક, શૈક્ષણિક, તકનીકી અને વૈજ્ઞાનિક વિનિમય સુધીની છે. તે વાતમાં કોઇ શંકા નથી કે અમારા સંબંધ સંકટના સમયમાં વ્યાપક અર્થપૂર્ણ રહે છે. પરંતુ 7 ઓક્ટોબરે ઇઝરાયેલ પર હમાસના હુમલાને કારણે થયેલા નરસંહારની નિંદા કરનારા વિશ્વના નેતાઓમાં ભારતના વડા પ્રધાન નરેન્દ્ર મોદી પ્રથમ છે. તેઓ ઇતિહાસના સાચા પક્ષ પર ઉભા રહ્યા છે. હું તેમનો દિલથી આભાર વ્યક્ત કરુ છું. હરઝોગે વધુમાં જણાવ્યું હતું કે જેમ જેમ તમારી લોકશાહી અને અર્થવ્યવસ્થા વધે છે તેમ તેમ વૈશ્વિક નેતૃત્વમાં તમારી ભૂમિકા વધે છે અને વિસ્તરે છે. પીએમ મોદીના આ તથ્યની અમે ઇઝરાયલમાં સરાહના અને સ્વાગત કરીએ છીએ.