- બાંગ્લાદેશી સાંસદ અનવારુલ અજીમની ત્રણ દિવસ પહેલાં કરપીણ હત્યા થતા ચકચાર મચી
- સાંસદની હત્યા પાછળ મહિલાની હનિટ્રેપ તરીકે ભૂમિકા સામે આવ્યોનો ખુલાસો
- 100 કરોડ રૂપિયાનું સોનું, ત્રણ મહિનાના આયોજન બાદ સાંસદની થઈ હત્યા
છેલ્લા ચાર દિવસથી ભારત અને બાંગ્લાદેશમાં ચકચાર મચાવનારા સાંસદની હત્યા કેસની ચર્ચા છે. બાંગ્લાદેશમાં અવામી લીગના સાંસદની હત્યાના સંબંધમાં એક મહિલાની ધરપકડ કરવામાં આવી હતી. ઢાકા મેટ્રોપોલિટન પોલીસે સિલિસ્ટી રહેમાન નામની મહિલાની ધરપકડ કરી છે. સૂત્રોના જણાવ્યા અનુસાર સિલિસ્તી રહેમાન બાંગ્લાદેશના સાંસદ અનવારુલ અઝીમની હત્યાના માસ્ટરમાઇન્ડ અખ્તરુઝમાન શાહીનની ગર્લફ્રેન્ડ છે. તપાસ અધિકારીઓને શંકા છે કે તેનો ઉપયોગ ‘હનીટ્રેપ’ તરીકે કરવામાં આવ્યો હતો અને બાંગ્લાદેશી સાંસદની હત્યામાં મહત્વની ભૂમિકા ભજવી શકે છે.
સાંસદની હત્યા પાછળ આટલા કારણો જવાબદાર હતા
પોલીસની સઘન તપાસમાં ખુલાસો થયો કે મુખ્ય હત્યારા અમાનુલ્લાહ અને તેના સાગરિતોએ ન્યૂટાઉનના તે લક્ઝરી ફ્લેટમાં ગયા બાદ શાહીનના બાકી નાણાં ચૂકવવા માટે સાંસદ પર દબાણ કર્યું હતું. આ દરમિયાન અમાનુલ્લાએ સાંસદને થપ્પડ મારી હતી અને મારામારી થઈ હતી. બાદમાં ઓશીકા વડે મોઢું દબાવીને સાંસદની હત્યા કરવામાં આવી હતી. આ પછી, મુખ્ય કાવતરાખોર શાહીનને કહેવામાં આવ્યું કે મિશન પૂર્ણ થઈ ગયું છે. શાહીને મૃતદેહને છુપાવવાનો આદેશ આપ્યો. સૂચના મળતાં અમાનુલ્લાહે તેના શરીરના ટુકડા કરી નાખ્યા. સફેદ પોલીથીન, બ્લીચીંગ પાવડર અને બે મોટી સાઈઝની ટ્રોલી બેગ બહારથી ખરીદી હતી. મૃતદેહના ટુકડા કર્યા બાદ તેને બે અલગ-અલગ ટ્રોલીમાં લોડ કરવામાં આવે છે. શરીરના અંગો બેગમાં મૂક્યા બાદ બહારથી લાવેલા બ્લીચિંગ પાવડરથી ફ્લેટનો ફ્લોર સાફ કરવામાં આવ્યો હતો.
આ ટ્રોલી મર્ડર ગ્રુપના સભ્ય સિયામને આપવામાં આવી છે. સિયામ કારમાં બેઠો અને થોડે દૂર નીચે ઊતર્યો. આ પછી અમાનુલ્લા એ કહી શક્યો નહીં કે તેણે આ બેગ ક્યાં લીધી. ફ્લેટમાં બીજી બેગ છોડીને, અમાનુલ્લાહ અને શાહીનની ગર્લફ્રેન્ડ સિલિસ્ટી 15 મેના રોજ પ્લેન દ્વારા ઢાકા પરત ફર્યા. મુસ્તફિઝ, ફૈઝલ અને અન્ય લોકોએ ત્યાંથી બીજી ટ્રોલી બેગ કાઢી.
બંને સોનાની દાણચોરીનું રેકેટ ચલાવતા હતા.
માર્યા ગયેલા સાંસદ અનવારુલ અઝીમ અનાર અને મુખ્ય શંકાસ્પદ અખ્તરુઝમાન સોનાની દાણચોરીનું રેકેટ ચલાવતા હતા, પરંતુ તેમની વચ્ચે પૈસાને લઈને મતભેદ હતા અને અઝીમે 100 કરોડથી વધુ રૂપિયા પોતાની પાસે રાખ્યા હતા. પોતાના વતન ઝેનાઈદહમાં શાહીન મિયાં તરીકે ઓળખાતો અખ્તરુઝમાન દુબઈથી બાંગ્લાદેશમાં સોનાની દાણચોરી કરતો હતો, જ્યારે ઝેનાઈદહ-4ના સત્તાધારી અવામી લીગના સાંસદ અઝીમ ભારતમાં યોગ્ય લોકો સુધી માલ પહોંચે તેની ખાતરી કરતો હતો. ગયા વર્ષે અઝીમે અખ્તરુઝ્ઝમાનને કહ્યું હતું કે તેને વધુ હિસ્સો જોઈએ છે, ત્યારબાદ અખ્તરુઝમાને અઝીમના પ્રસ્તાવને નકારી કાઢ્યો હતો અને તેના કારણે બંને વચ્ચે અણબનાવ થયો હતો. જ્યારે અઝીમે 100 કરોડથી વધુ રૂપિયા લીધા અને પોતાની પાસે રાખ્યા ત્યારે બંને વચ્ચે દુશ્મની થઈ
આ પછી અખ્તરુજજમાને અઝીમ પાસે પૈસા માંગવાનું શરૂ કર્યું. બંને છેલ્લા છ મહિનામાં મામલો થાળે પાડવા માટે ઘણી વખત મળ્યા હતા અને અઝીમે અખ્તરુઝ્ઝમાનને પૈસા આપવાનો સતત ના પાડી હતી. આ પછી અખ્તરુઝમાને તેની હત્યા કરવાનું નક્કી કર્યું. અઝીમ 12 મેના રોજ કોલકાતા ગયો હતો અને રાત માટે મિત્રના ઘરે રોકાયો હતો. બીજા દિવસે તે ડૉક્ટર પાસે જાઉં છું તેમ કહીને ચાલ્યો ગયો. તે પાછો ફર્યો ન હતો અને મિત્રને તેના મોબાઇલ ફોનમાંથી કેટલાક મેસેજ મળી આવ્યા હતા, જેમાં કહેવામાં આવ્યું હતું કે તેને ફોન કરવાની જરૂર નથી.
સાંસદની હત્યાનું પ્લાનિંગ ત્રણ મહિના પહેલાં કરવામાં આવ્યું હતું
ઢાકા મેટ્રોપોલિટન પોલીસ એડિશનલ કમિશનર (ડીબી) હારુન અને રશીદે કહ્યું, “હત્યાની યોજના બે-ત્રણ મહિના પહેલા બનાવવામાં આવી હતી. ગુલશન અને બસુંધરામાં અખ્તરુઝમાનના ફ્લેટમાં ઘણી બેઠકો થઈ હતી. ડીએમપીની તકેદારીના કારણે શકમંદો અહીં હત્યા કરી શક્યા નથી. તેઓ જાણતા હતા કે સાંસદો વારંવાર કોલકાતાની મુલાકાત લે છે, તેથી તેમણે એક નવો પ્લાન બનાવ્યો અને 25 એપ્રિલે ત્યાં એક ફ્લેટ ભાડે લીધો. 30 એપ્રિલે અખ્તરુઝમાન, તેની ગર્લફ્રેન્ડ અને કિલર અમાનુલ્લાહ કોલકાતા પહોંચ્યા અને ન્યૂટાઉન વિસ્તારના એક ફ્લેટમાં ગયા.
13મી મેના રોજ જ્યારે અજીમ પોતાના મિત્રના ઘરેથી નીકળ્યો ત્યારે એક શંકાસ્પદે તેને એક સફેદ રંગની કારમાં બેસાડી દીધો અને ફલેટ પર લઈ ગયો હતો. સાંસદ બપોરના સમયે ફલેટમાં પ્રવેશ્યો અને શકમંદોએ અડધો કલાકમાં પોતાના પ્લાનને અંતિમ સ્વરૂપ આપી દીધું. તેઓએ અજમીને ફોનને ચાલુ રાખ્યો અને પોલીસ તંત્રને મૂર્ખ બનાવવા જુદા-જુદા સ્થળેથી લોકોને સંદેશ મોકલ્યા હતા.
જિહાદ નામના કોન્ટ્રાક્ટ કિલરની ધરપકડ કરાઈ
15મી મેના રોજ અમાનુલ્લાહ અને અખ્તરુજ્જામાંની પ્રેમિકા બાંગ્લાદેશ પરત આવી, જ્યારે બે શકમંદો 16 અને 17મી મેએ બાંગ્લાદેશ પરત આવ્યા. સીઆઈડીના શરૂઆતના ગાળાની તપાસમાં અનુમાન છે કે આ રહસ્યમયી મહિલાને જાણ છે કે સાંસદની હત્યા પછી તેના મૃતદેહના ટુકડા ક્યાં ફેંક્યા છે. કોલકાતાના ન્યૂટાઉન ફલેટમાં બાંગ્લાદેશના સાંસદની હત્યાની તપાસમાં પોલીસ પહેલા જ જિહાદ હાઉલદાર નામના એક કોન્ટ્રાક્ટ કિલરની ધરપકડ કરી ચુકી છે. આ શખ્સ બાંગ્લાદેશથી ગેરકાયદે મુંબઈમાં રહે છે. પોલીસ સૂત્રો અનુસાર મુખ્ય આરોપી અખ્તરુજ્જમાં બે મહિના અગાઉ શખ્સને મુંબઈથી કોલકાતા લઈ આવ્યો હતો. ધરપકડ કરાયેલા જિહાદી નામના શખ્સની પૂછપરછમાં આ વાત સ્વીકારી છે.
તે બાંગ્લાદેશથી કોલકાતા આવ્યા પહેલાં નકલી ડોક્યુમેન્ટથી ઘણા સિમકાર્ડ ખરીદ્યા હતા. તપાસનીસ અધિકારીઓની તપાસમાં જાણવા મળ્યું કે સાંસદને મારવા માટે અઢી કરોડ રૂપિયાની અધધ રકમ અપાઈ હતી. આરોપી જિહાદ તપાસ ટીમને અવળા માર્ગે ફેરવી રહ્યો હતો. ગુરુવારે આખા દિવસે મૃતદેહને ક્યાં ફેકયો તેની પૂછપરછ કરવામાં આવી, પરંતુ અત્યાર સુધી મૃતદેહની કોઈ વિગત નથી સાંપડી.
