- રફાહની રાહત શિબિરમાં થયેલા હુમલાની ચોતરફ નિંદા
- ભારત સહિત દુનિયાના નામચીન લોકો આ હુમલાનો વખોડી રહ્યું છે.
- હોલિવૂડ અને બોલિવૂડ હસ્તીઓ શેર કરી રહ્યા છે સ્ટોરી
તાજેતરમાં ઇઝરાયલે રાફામાં હુમલો કરતા 45 લોકોના મોત થયા હતા. જે ઘટનાની યુએન દ્વારા સખત શબ્દોમાં નિંદા કરવામાં આવી છે. તો બીજી તરફ આ ઘટનાને લઇને દુનિયાભરમાં સોશિયલ મીડિયા સાઇટર પર ‘All Eyes on Rafah’લખેલી સ્ટોરી જોવા મળી રહી છે. ફોટો કેપ્શનમાં આ હેશટેગનો પણ ઉપયોગ કરવામાં આવી રહ્યો છે. ભારત સહિત દુનિયાભરના નામચીન લોકો આ અંગે સ્ટોરી મૂકી રહ્યા છે. જેમાં હોલિવૂડથી લઇને બોલિવૂડની હસ્તીઓનો પણ સમાવેશ થાય છે.
શું છે All Eyes on Rafah અભિયાન ?
‘ઓલ આઈઝ ઓન રફાહ’ નામનું આ અભિયાન મોટાભાગે કાર્યકરો અને માનવ સંગઠનો દ્વારા યુરોપ, ઓસ્ટ્રેલિયા અને ભારત જેવા દેશોમાં યુદ્ધ વિશે જાગૃતિ ફેલાવવા માટે ચલાવવામાં આવી રહ્યું છે, જેને સામાન્ય લોકોનું સમર્થન મળી રહ્યું છે. આ સ્લોગનનો ઉપયોગ વિશ્વ આરોગ્ય સંસ્થા (WHO)ના ડિરેક્ટર રિક પેપરકોર્ન દ્વારા ફેબ્રુઆરીમાં કરવામાં આવ્યો હતો. તેમની આ ટિપ્પણી ઇઝરાયેલના વડા પ્રધાન બેન્જામિન નેતન્યાહુએ શહેર ખાલી કરવાની યોજનાના એલાન બાદ સામે આવી હતી. તેમણે આંતરરાષ્ટ્રીય સમુદાયને ગાઝામાં શું થઈ રહ્યું છે તેના પર નજર રાખવા કહ્યું હતું.
All Eyes on Rafah એટલે શું ?
આ સૂત્રનો અર્થ સમગ્ર વિશ્વના લોકોને પેલેસ્ટાઈનમાં બની રહેલી ઘટનાઓ તરફ આંખ આડા કાન ન કરવાની અપીલ કરવાનો છે. ભીષણ લડાઈમાંથી ભાગી ગયેલા લગભગ 14 લાખ ગાઝાવાસીઓ હાલ રફાહમાં આશ્રય લઈ રહ્યા છે. આટલી મોટી વસ્તી હોવા છતાં ઈઝરાયેલ ત્યાં હુમલાઓ કરી રહ્યું છે. છેલ્લા ઘણા દિવસોથી પેલેસ્ટાઈન તરફી પ્રદર્શનોમાં આ નારાનો ઉપયોગ કરવામાં આવી રહ્યો છે. પરંતુ રફાહમાં ઇઝરાયેલના તાજેતરના હવાઈ હુમલામાં 40 પેલેસ્ટિનિયનોના મોત અને ડઝનેક લોકો ઘાયલ થયા હતા. જે બાદ All Eyes on Rafah સૂત્ર સોશિયલ મીડિયા પર ઝડપથી ફેલાઈ રહ્યું છે.
બોલિવૂડ સ્ટાર્સે પણ કરી ટીકા
રફાહમાં રાહત શિબિરો પર થયેલા હુમલા બાદ સામે આવી રહેલી દર્દનાક તસવીરોએ આખી દુનિયાને ચોંકાવી દીધી છે. આ હુમલા બાદ આલિયા ભટ્ટ, પ્રિયંકા ચોપરા, કરીના કપૂર, વરુણ ધવન, રશ્મિકા મંદન્ના, સોનાક્ષી સિન્હા, સમંથા રૂથ પ્રભુ, તૃપ્તિ ડિમરી, દિયા મિર્ઝા અને રિચા ચઢ્ઢા સહિત ઘણી ભારતીય સેલિબ્રિટીઓએ પોતપોતાની ઇન્સ્ટાગ્રામ સ્ટોરી પર વાયરલ સ્લોગન શેર કર્યું હતું. આલિયાએ તેની સ્ટોરી પર ઇન્સ્ટાગ્રામ પેજ ‘ધ મધરહુડ હોમ’ દ્વારા પોસ્ટ કરેલી પોસ્ટ શેર કરી અને લખ્યું #AllEyesOnRafah. આ પોસ્ટમાં જણાવવામાં આવ્યું હતું કે કેવી રીતે તમામ બાળકો ‘પ્રેમ, સલામતી, શાંતિ અને જીવન’ના હકદાર છે.
રમત જગત અને રાજકારણીઓએ શેર કરી હતી સ્ટોરી
ભારતીય ક્રિકેટ ટીમના કેપ્ટન રોહિત શર્માની પત્ની રિતિકા સજદેહ, ઈરફાન પઠાણ અને કોંગ્રેસ નેતા ઈમરાન પ્રતાપગઢી જેવા અન્ય ઘણા પ્રખ્યાત લોકોએ પણ આ સ્ટોરી શેર કરીને પેલેસ્ટાઈનીઓ સાથે એકતા દર્શાવી હતી. .
