- અવકાશયાત્રી સુનિતા વિલિયમ્સ અને બુચ વિલ્મોર સ્પેસમાં પાંચમી જૂનથી ફસાયેલી સ્થિતિમાં
- લાંબા સમય સુધી અવકાશમાં રહેવાથી તેઓના આરોગ્યને લઈને પણ ખતરાની સમસ્યા થઈ શકે છે
- નાસાએ હવે સ્પેસ એક્સ કે સ્ટારલાઈનરથી બંનેને ધરતી પર લાવવાનો જલ્દી નિર્ણય લેવો પડે તેવી સ્થિતિ
અવકાશ યાત્રી સુનિતા વિલિયમ્સ અને બુચ વિલ્મોરનું અવકાશમાંથી પરત કયારે આવશે આને લઈ નાસાએ મોટું અપડેટ આપ્યું છે. અમેરિકી સ્પેસ એજન્સી અનુસાર ઓગસ્ટના અંત સુધી તેઓએ એવો નિર્ણય કરવાનો છે કે, બંને અવકાશયાત્રીઓને બોઈંગના સ્ટારલાઈનરથી પરત આવવા કે ફરી સ્પેસએક્સના વિમાનથી.
વાત જાણે એમ છે કે, સુનિતા વિલિયમ્સ અને બુચ વિલ્મોર પાંચમી જૂને બોઈંગના સ્ટારલાઈનર વિમાનથી અવકાશમાં બનેલા સ્પેસ સ્ટેશન પહોંચ્યા હતા. આ એક ટેસ્ટિંગ ફલાઈટ હતી. જેથી મિશન માત્ર આઠ દિવસનું હતું. પરંતુ સ્ટારલાઈનરના વિમાનમાં ટેક્નિકલ ક્ષતિને લીધે બંને અવકાશયાત્રીઓનું ધરતી પર પાછું આવવાનું હજી શક્ય નથી બન્યું.
ફેબ્રુઆરી-2025 સુધી મોકૂફ રહી શકે ધરતી પર પાછા ફરવું
નાસાના અધિકારીએ બોવર્સોક્સે કહ્યું છે કે અમે બોઈંગ સાથે ખૂબ સારી વાતચીત કરી છે અને તેમને તેમના સ્ટારલાઇનર એરક્રાફ્ટમાં 100 ટકા વિશ્વાસ છે. નાસા બંને અવકાશયાત્રીઓની સુરક્ષિત વાપસીનો માર્ગ શોધવાનો પ્રયાસ કરી રહ્યું છે, આવી સ્થિતિમાં તે કોઈપણ પ્રકારનું જોખમ લેવા માંગતું નથી. આ જ કારણ છે કે સ્ટારલાઇનર સિવાય આ સ્પેસ એજન્સી સ્પેસએક્સ એરક્રાફ્ટ દ્વારા બંનેને પરત કરવા પર પણ વિચાર કરી રહી છે. જો આવું થાય છે, તો 24 સપ્ટેમ્બરે, ક્રૂ 9 મિશન 4ની જગ્યાએ માત્ર 2 અવકાશયાત્રીઓ સાથે લોન્ચ થઈ શકે છે.
ઓગસ્ટના અંત સુધી નિર્ણય શક્ય
બુધવારે નાસાએ પ્રેસ કોન્ફરન્સ કરી જાણકારી આપી છે કે, તે હજી પણ થ્રસ્ટરના ડાટાનું એનાલિસિસ કરી રહ્યું છે. પરંતુ સુનિતા વિલિયમ્સ અને વિલ્મોરનું ધરતી પર પાછા ફરવા માટે સ્ટારલાઈનરનો ઉપયોગ કરવો કે ફરી બોઈંગના હરિફ સ્પેસએક્સના વિમાનનો આની પર નિર્ણય હજી સુધી નથી લેવાયો. નાસાના અધિકારીએ આપેલી જાણકારી પ્રમાણે ઓગસ્ટના અંત સુધી સ્પેસમાં રહેલા સુનિતા વિલિયમ્સ અને બુચ વિલ્મોરને ધરતી પર પાછા લાવવા અંગેનો નિર્ણય કરી લેવો જોઈએ.સ્પેસએક્સથી પરત ફરવું બોઈંગ માટે આંચકો
વર્ષ-2014માં નાસાની તરફથી સ્પેસએક્સ અને બોઈંગને ઘણા અબજો ડોલરનો કોન્ટ્રાક્ટ આપ્યો હતો. સ્પેસએક્સે વર્ષ-2020માં ક્રૂની સાથે સફળ ટેસ્ટિંગ કર્યું અને ત્યારથી અત્યાર સુધી ડઝન અવકાશયાત્રીઓને લઈ ચુક્યું છે. પરંતુ બોઈંગનું આ સ્ટારલાઈનર વિમાન પોતાની ટેસ્ટિંગ ફલાઈટમાં જ મોટી સમસ્યાઓનો સામનો કરી રહ્યું છે. આવામાં જોવાનું એ છે કે સુનિતા વિલિયમ્સ અને બુચ વિલ્મોરને પરત લાવવા નાસા સ્ટારલાઈનર પર ભરોસો દર્શાવે છે કે ફરી તેને એલન મસ્કની સ્પેસએક્સની તરફ જવું પડશે?
બંને અવકાશયાત્રીઓને જો સ્પેસએક્સની મદદથી પરત ધરતી પર લવાય તો આ બોઈંગ માટે મોટા આંચકા સમાન મનાઈ રહ્યું છે. બોઈંગ અને સ્પેસએખ્સ એકબીજાના કટ્ટર હરિફ છે, આવામાં સ્ટારલાઈનર વિમાન નિષ્ફળ થવી બોઈંગ માટે મોટી શરમમાં મૂકે તેવી બાબત છે.
