- અમેરિકાના પૂર્વ રાષ્ટ્રપતિ બરાક ઓબામાએ કમલા હેરિસનું આપ્યું સમર્થન
- ડેમોક્રેટિક નેશનલ કન્વેન્શનમાં ઓબામાએ હેરિસ માટે આપ્યો નવો ચૂંટણી નારો
- તમારો મિત્ર હોવું મારો સૌથી શ્રેષ્ઠ નિર્ણય હતો: બરાક ઓબામા
અમેરિકામાં રાષ્ટ્રપતિ ચૂંટણીને લઈ રાજકારણ ગરમાયું છે. ત્યારે ડેમોક્રેટિક નેશનલ કન્વેન્શન (DNC)ના બીજા દિવસે પૂર્વ રાષ્ટ્રપતિ બરાક ઓબામાએ કમલા હેરિસનું ખુલ્લેઆમ સમર્થન કર્યું હતું. તેણે હેરિસને દેશના આગામી રાષ્ટ્રપતિ ગણાવ્યા.
ઓબામાએ કમલા હેરિસનું આપ્યુ સમર્થન
બરાક ઓબામાએ કહ્યું કે, અમારી પાસે એવી વ્યક્તિને ચૂંટવાની તક છે કે જેમણે પોતાનું આખું જીવન લોકોને એ તકો આપવા માટે વિતાવ્યું છે જે તકો અમેરિકાએ તેમને આપી છે. દેશના આગામી રાષ્ટ્રપતિ કમલા હેરિસ છે. રાષ્ટ્રપતિ પદ માટે ડેમોક્રેટિક પાર્ટીના ઉમેગવાર બનવાનું સન્માન મળ્યાને મને 16 વર્ષ થયા છે. આટલા વર્ષો પછી હું કોઈ ખચકાટ વિના કહી શકું છું કે તમારો મિત્ર હોવું મારો સૌથી શ્રેષ્ઠ નિર્ણય હતો.
હેરિસ 5 નવેમ્બરે ઈતિહાસ રચશે
ઓબામાંએ વધુમાં કહ્યું કે, હેરિસ 5 નવેમ્બરે ઈતિહાસ રચવા જઈ રહી છે. તે અશ્વેત અને દક્ષિણ એશિયાઈ મૂળના પ્રથમ અમેરિકન રાષ્ટ્રપતિ બનવા જઈ રહી છે. અમે હેરિસને ટોર્ચ આપી દીધી છે, પરંતુ ડેમોક્રેટ્સનું કામ હજી પૂરું થયું નથી.
Yes She Canનો નારો
ઓબામાએ કહ્યું કે, કમલા હેરિસ અને ટિમ વાલ્ઝ એવા નેતાઓ છે જે લોકોની ભલાઈ સાથે જોડાયેલા કામ માટે સંપૂર્ણપણે પ્રતિબદ્ધ છે. આપણે એવા રાષ્ટ્રપતિની જરૂર છે જે અહીંના લોકોની ચિંતા કરે. જેઓ દરરોજ સવારે આ દેશના લોકોના ભલાઈ માટેના જુસ્સા સાથે જાગે છે. કમલા રાષ્ટ્રપતિ બનશે. હા, તે બની શકે છે. આ નારા સાથે ભીડે પણ યસ, શી કેનનો નારો લગાવવા લાગી હતી.
બાઈડેને કમલા હેરિસને મત આપવા લોકોને કરી અપીલ
આ પહેલા શિકાગોમાં ડેમોક્રેટિક નેશનલ કન્વેન્શનના પહેલા દિવસે રાષ્ટ્રપતિ જો બાઈડેને ટ્રમ્પ પર જોરદાર નિશાન સાધ્યું હતું. બાઈડેને કહ્યું હતું કે, પરિવાર જ સર્વસ્વ છે. હું તમને પ્રેમ કરું છું. હું મારા દેશને ખૂબ જ પ્રેમ કરું છું. હું તમને પૂછવા માંગુ છું, શું તમે લોકો સ્વતંત્રતા, લોકશાહી અને અમેરિકા માટે મત આપવા તૈયાર છો? શું તમે કમલા હેરિસ અને ટિમ વોલ્ઝને મત આપવા તૈયાર છો?
બાઈડેને ટ્રમ્પ પર જોરદાર નિશાન સાધ્યું
બાઈડેને કહ્યું હતું કે, અમેરિકામાં રાજકીય હિંસા માટે કોઈ સ્થાન નથી. જીત્યા પછી તમે એમ ન કહી શકો કે તમે આ દેશને પ્રેમ કરો છો. બાઈડેને ટ્રમ્પ પર પ્રહાર કરતા કહ્યું હતું કે, ડોનાલ્ડ ટ્રમ્પ જ્યારે અમેરિકા વિશે વાત કરે છે કે અમેરિકા એક વિઘટનશીલ દેશ છે, તો તે સંદેશ વિશે વિચારો, જે દુનિયામાં જાય છે. તે કહે છે કે અમે હારી રહ્યા છીએ, વાસ્તવમાં તે (ટ્રમ્પ) હારેલા છે. વિશ્વના એક એવા દેશનું નામ જણાવો જે એવું ન વિચારે કે આપણે વિશ્વમાં સૌથી આગળ છીએ? અમેરિકા જીતી રહ્યું છે. ડોનાલ્ડ ટ્રમ્પના અગાઉના કાર્યકાળ કરતા અમેરિકા હવે વધુ સમૃદ્ધ અને સુરક્ષિત છે. ટ્રમ્પ અમેરિકામાં ગુના અંગે સતત જુઠ્ઠુ બોલે છે. તેમણે (ટ્રમ્પ) દેશના સૈનિકોને હારેલા કહ્યા છે. તેને લાગે છે કે તે કોણ છે? તેઓ પુતિન સમક્ષ નતમસ્તક થયા છે. કમલા હેરિસ અને હું આવું ક્યારેય કરતા નથી.
‘મારું હૃદય અને આત્મા આ દેશને આપ્યો’
રાષ્ટ્રપતિ બાઈડેને કહ્યું હતું કે, તેમણે દેશની સેવા કરવા માટે પોતાનું સર્વશ્રેષ્ઠ આપ્યું છે અને ભવિષ્ય વિશે પણ આશાવાદી છે. વધુમાં કહ્યું કે, મેં મારી કારકિર્દીમાં ઘણી ભૂલો કરી છે, પરંતુ 50 વર્ષ સુધી મેં મારું સર્વશ્રેષ્ઠ આપ્યું છે. મેં આ દેશની મારા તન-મનથી સેવા કરી છે અને તેના બદલામાં મને અમેરિકન લોકો તરફથી પુષ્કળ સમર્થન મળ્યું છે.
