રશિયામાં ઘટી રહેલી વસ્તીને લઈને વ્લાદિમીર પુતિન ખૂબ જ ચિંતિત છે. હવે રશિયન રાષ્ટ્રપતિએ આ સમસ્યાનો સામનો કરવા માટે એક નવો ઉપાય વિચાર્યો છે. મીડિયા અહેવાલ અનુસાર પુતિને રશિયન નાગરિકોને લંચ અને કોફી બ્રેક દરમિયાન સેક્સ કરવાની સલાહ આપી છે. પુતિનની આ સૂચના એવા સમયે આવી છે જ્યારે રશિયામાં પ્રજનન દર પ્રતિ મહિલા 1.5 પર આવી ગયો છે. રશિયા માટે પણ આ ચિંતાનો વિષય છે. કારણ કે કોઈ દેશની વસ્તીને સ્થિર રાખવા માટે ત્યાંની મહિલાઓનો પ્રજનન દર ઓછામાં ઓછો 2.1 હોવો જોઈએ.
આરોગ્ય મંત્રીએ પરિવાર વધારવા કરી અપીલ
જ્યારે રશિયાના આરોગ્ય મંત્રી ડો. યેવગેની શેસ્ટોપાલોવે આ વાત પર ભારપૂર્વક જણાવ્યું છે કે, બાળકોને જન્મ આપવામાં કામ અડચણ ન બનવું જોઈએ. તેમણે રશિયાના લોકોને તેમના પરિવાર વધારવા માટે લંચ અને કોફી બ્રેકનો લાભ લેવાની અપીલ કરી છે. તેણે કહ્યું કે, કામમાં ખૂબ વ્યસ્ત રહેવું એ સેક્સ ન કરવા માટે યોગ્ય કારણ નથી. આ એક નકામું બહાનું છે. તમે વિરામ વચ્ચે સેક્સ કરી શકો છો. કારણ કે જીવન ખૂબ જ ઝડપથી પસાર થાય છે.
લોકોને આર્થિક મદદ કરી રહી છે રશિયન સરકાર
રશિયાના આરોગ્ય મંત્રીએ વધુમાં કહ્યું કે, મોસ્કોમાં 18 થી 40 વર્ષની વયની મહિલાઓને તેમના પ્રજનન સ્વાસ્થ્ય અને ક્ષમતાનું મૂલ્યાંકન કરવા માટે રચાયેલ મફત પ્રજનનક્ષમતા સ્ક્રીનીંગમાં ભાગ લેવા માટે પ્રોત્સાહિત કરવામાં આવી રહી છે. એટલું જ નહીં રશિયાના ચેલ્યાબિન્સ્ક વિસ્તારમાં અધિકારીઓએ જન્મ દર વધારવા માટે આર્થિક મદદ પણ શરૂ કરી દીધી છે. અહીં 24 વર્ષથી ઓછી ઉંમરની મહિલાઓને તેમના પ્રથમ બાળકના જન્મ પર 1.02 લાખ રુબલ (રૂ. 9.40 લાખ) ચૂકવવાની ઓફર કરવામાં આવે છે. રશિયામાં ગર્ભપાતની ઍક્સેસ પર પ્રતિબંધ ચાલુ છે, જાહેર વ્યક્તિઓ અને ધાર્મિક નેતાઓ હિમાયત કરે છે કે, સ્ત્રીની પ્રથમ જવાબદારી બાળકોનો જન્મ અને ઉછેર છે.
છૂટાછેડા માટેની ફીમાં વધારો
રશિયામાં છૂટાછેડા માટેની ફીમાં પણ વધારો કરવામાં આવ્યો છે. આ મહિનાની શરૂઆતમાં જાહેર કરાયેલા સત્તાવાર ડેટા અનુસાર રશિયાએ 2024 ના પ્રથમ છ મહિનામાં 25 વર્ષમાં તેનો સૌથી ઓછો જન્મ દર નોંધ્યો છે. ડેટા એ પણ દર્શાવે છે કે, જૂનમાં જન્મ દર પ્રથમ વખત એક લાખથી નીચે ગયો હતો, જે મોટો ઘટાડો દર્શાવે છે.
ગત વર્ષ કરતા 16 હજાર બાળકો ઓછા જન્મ્યા
મીડિયા અહેવાલ અનુસાર ક્રેમલિનના પ્રવક્તા દિમિત્રી પેસ્કોવે જુલાઈમાં કહ્યું હતું કે, રશિયામાં જાન્યુઆરીથી જૂન 2024 વચ્ચે કુલ 5,99,600 બાળકોનો જન્મ થયો છે, જે 2023ના આ સમયગાળાની સરખામણીમાં 16 હજાર ઓછા છે. આ દેશના ભવિષ્ય માટે વિનાશક છે. તે (જન્મ દર) હવે ખૂબ જ નીચા સ્તરે છે. યુક્રેન સાથે ચાલી રહેલા યુદ્ધને કારણે રશિયાની વસ્તીમાં ઘટાડો થયો છે. યુદ્ધ દરમિયાન લગભગ 1 મિલિયન લોકો રશિયામાંથી ભાગી ગયા છે. જેમાં મોટાભાગના યુવાનો પણ છે.
