વડાપ્રધાન નરેન્દ્ર મોદીની બહુપ્રતિક્ષિત ફ્રાન્સ અને અમેરિકાની મુલાકાત આજથી શરૂ થઈ રહી છે. પીએમ મોદી સંરક્ષણ સહયોગ અને વેપાર ભાગીદારી વધારવાના ઉદ્દેશ્ય સાથે આ બંને દેશોની મુલાકાતે છે. પીએમ મોદી તેમના બે દેશોના પ્રવાસના પ્રથમ સ્ટોપના ભાગરૂપે આજે ફ્રાન્સમાં હશે. તેઓ 10 ફેબ્રુઆરીથી 12 ફેબ્રુઆરી સુધી પેરિસમાં રહેશે. આ સમય દરમિયાન, તેઓ ફ્રાન્સના રાષ્ટ્રપતિ ઈમેન્યુઅલ મેક્રોન સાથે આર્ટિફિશિયલ ઈન્ટેલિજન્સ (AI) એક્શન સમિટની સહ-અધ્યક્ષતા કરશે.
વડાપ્રધાન મોદી 10 ફેબ્રુઆરીએ પેરિસ પહોંચશે
વડાપ્રધાન મોદી 10 ફેબ્રુઆરીએ પેરિસ પહોંચશે અને સાંજે એલિસ પેલેસમાં રાષ્ટ્રપતિ મેક્રોન સાથે ડિનર કરશે. આ ડિનરમાં ઘણી મોટી ટેક્નોલોજી કંપનીઓના સીઈઓ પણ હાજરી આપશે. PM મોદી બીજા દિવસે એટલે કે 11 ફેબ્રુઆરીએ AI એક્શન સમિટની સહ અધ્યક્ષતા કરશે.
PM મોદીની પેરિસ મુલાકાતને લઈને વિદેશ સચિવ વિક્રમ મિસરીએ ગયા અઠવાડિયે કહ્યું હતું કે અમે આ સમિટમાં ઘણી ઘોષણાઓની અપેક્ષા રાખીએ છીએ. અમને AI એપ્લિકેશન્સમાં રસ છે જે વાપરવા માટે સલામત અને વિશ્વસનીય છે. આ દરમિયાન પીએમ મોદી ઈન્ડિયા-ફ્રાન્સ સીઈઓ ફોરમને પણ સંબોધિત કરશે.
PM મોદીનો અમેરિકા પ્રવાસ 12 ફેબ્રુઆરીથી શરૂ થશે
વડાપ્રધાન નરેન્દ્ર મોદી પેરિસ બાદ સીધા અમેરિકા પહોંચશે. તેમનો અમેરિકન પ્રવાસ બે દિવસનો હશે, જ્યાં તેઓ 12 થી 14 ફેબ્રુઆરી સુધી રોકાશે. આ દરમિયાન તેઓ અમેરિકી રાષ્ટ્રપતિ ડોનાલ્ડ ટ્રમ્પ સાથે દ્વિપક્ષીય વાતચીત કરશે. તેઓ ઘણા બિઝનેસ લીડર્સ અને ભારતીય સમુદાયના સભ્યોને પણ મળશે. વડાપ્રધાન મોદીનો અમેરિકન પ્રવાસ એવા સમયે થઈ રહ્યો છે જ્યારે ટ્રમ્પે હાલમાં જ અમેરિકામાં ગેરકાયદેસર રીતે રહેતા 104 ઈમિગ્રન્ટ્સને ભારત પરત મોકલી દીધા છે.
PM મોદી અને ટ્રમ્પની આ આઠમી મુલાકાત હશે
PM મોદી અને યુએસ પ્રમુખ ડોનાલ્ડ ટ્રમ્પની પ્રથમ મુલાકાત 26 જૂન 2017ના રોજ વોશિંગ્ટનમાં થઈ હતી. બીજી બેઠક 30 નવેમ્બર 2018 ના રોજ બ્યુનોસ એરેસ, આર્જેન્ટિનામાં થઈ હતી. ત્રીજી મીટિંગ ઓસાકા, જાપાનમાં 28 જૂન 2019ના રોજ, ચોથી મીટિંગ 26 ઓગસ્ટ 2019ના રોજ ફ્રાન્સમાં અને પાંચમી મીટિંગ 22 સપ્ટેમ્બર 2019ના રોજ અમેરિકાના હ્યુસ્ટનમાં યોજાઈ હતી. બંને નેતાઓની છઠ્ઠી બેઠક 24 સપ્ટેમ્બર 2019 ના રોજ ન્યુયોર્ક, યુએસએમાં થઈ હતી, જ્યારે સાતમી બેઠક 24-25 ફેબ્રુઆરી 2020 ના રોજ અમદાવાદમાં થઈ હતી.
