ખોડાપીપરમાં સરકારી જમીન પર પાંચ દુકાનો ઊભી કરી દેવાતા લેન્ડ ગ્રેબિંગ હેઠળ કાર્યવાહી

ખોડાપીપરમાં સરકારી જમીન પર પાંચ દુકાનો ઊભી કરી દેવાતા લેન્ડ ગ્રેબિંગ હેઠળ કાર્યવાહી

કલેક્ટરની અધ્યક્ષતાવાળી સમિતિના નિર્ણય બાદ મામલતદાર બન્યા ફરિયાદી; પડધરી પોલીસે ભરત ડાવેરા સામે કાર્યવાહી શરૂ કરી

અગ્ર ગુજરાત, રાજકોટ

પડધરી તાલુકાના ખોડાપીપર ગામમાં સરકારી ખરાબાની જમીન પર ગેરકાયદેસર કબજો કરીને પાંચ દુકાનો બાંધી તેને ભાડે આપીને આવક મેળવવાનો મામલો સામે આવ્યો છે. સમગ્ર ઘટનાની મહેસૂલી તપાસ બાદ જિલ્લા કલેક્ટરની અધ્યક્ષતાવાળી સમિતિએ કડક કાર્યવાહીનો નિર્ણય લેતા મામલતદારે ફરિયાદ નોંધાવી છે. આ ફરિયાદના આધારે પડધરી પોલીસે આરોપી સામે ગુજરાત લેન્ડ ગ્રેબિંગ (પ્રતિબંધ) અધિનિયમ હેઠળ ગુનો નોંધી વધુ તપાસ હાથ ધરી છે.
ફરિયાદ મુજબ, ખોડાપીપર ગામના રહેવાસી ભરત સુરેશભાઈ ડાવેરાએ ગામના સરકારી ખરાબાના સર્વે નં. 137 પૈકી 2ની જમીન પર ગેરકાયદેસર દબાણ કરીને પાંચ પાકી દુકાનો ઊભી કરી હતી. ત્યારબાદ આ દુકાનો ભાડે આપીને આર્થિક લાભ મેળવાતો હોવાનું મહેસૂલી તપાસ દરમિયાન સામે આવ્યું હતું.
નાયબ મામલતદાર, તલાટી અને સર્કલ અધિકારી દ્વારા સ્થળ તપાસ કરીને જરૂરી પુરાવા એકત્ર કરવામાં આવ્યા હતા. ત્યારબાદ સમગ્ર કેસનો અહેવાલ જિલ્લા કલેક્ટરની અધ્યક્ષતામાં કાર્યરત સમિતિ સમક્ષ રજૂ કરવામાં આવ્યો હતો. સમિતિએ તમામ દસ્તાવેજોની સમીક્ષા કર્યા બાદ ગુજરાત જમીન પચાવી પાડવા પર (પ્રતિબંધ) અધિનિયમ-2020 હેઠળ ગુનો નોંધાવવાનો નિર્ણય કર્યો હતો.
સમિતિના નિર્ણયને અનુસરી પડધરીના મામલતદાર કે. જી. સખીયાએ ફરિયાદી બની પડધરી પોલીસ મથકે અરજી નોંધાવી હતી. તેના આધારે પોલીસે ભરત સુરેશભાઈ ડાવેરા સામે લેન્ડ ગ્રેબિંગ એક્ટની વિવિધ કલમો હેઠળ ગુનો દાખલ કરીને આગળની કાયદેસરની કાર્યવાહી શરૂ કરી છે.
પ્રાથમિક તપાસમાં સરકારી મિલકત પર કબજો કરીને તેના વ્યાવસાયિક ઉપયોગ દ્વારા આવક મેળવવાનો મુદ્દો ગંભીર માનવામાં આવી રહ્યો છે. હવે પોલીસ અને મહેસૂલી વિભાગ સંયુક્ત રીતે સમગ્ર પ્રકરણની વધુ તપાસ કરી રહ્યા છે.