ચેમ્પિયન્સ ટ્રોફી 2025માં પાકિસ્તાનને તેની પહેલી જ મેચમાં ન્યૂઝીલેન્ડના હાથે હારનો સામનો કરવો પડ્યો હતો. હવે ટીમ ઈન્ડિયા માટે પાકિસ્તાન પર કોઈપણ ભોગે જીત મેળવવી જરૂરી બની ગઈ છે, જે એટલું સરળ નથી. હવે પાકિસ્તાન પર ચેમ્પિયન્સ ટ્રોફીની સેમીફાઈનલની રેસમાંથી બહાર થઈ જવાનો ખતરો છે. હાલ પાકિસ્તાનની ટીમ ગ્રુપ A ના પોઈન્ટ ટેબલમાં છેલ્લા સ્થાને છે.
શું પાકિસ્તાન સેમીફાઈનલની રેસમાંથી બહાર થઈ જશે?
પાકિસ્તાનની ટીમ ભારત, ન્યુઝીલેન્ડ અને બાંગ્લાદેશની સાથે ગ્રુપ Aમાં છે. દરેક ટીમે તેના ગ્રુપની ટીમો સાથે 1-1 મેચ રમવાની હોય છે. દરેક ટીમ માટે તમામ મેચો ખૂબ જ મહત્વપૂર્ણ છે, એક હાર પણ ટીમને સેમિફાઇનલની રેસમાંથી દૂર લઈ જઈ શકે છે. જો પાકિસ્તાનની ટીમ આજે ભારત સામે હારી જશે તો તે સેમીફાઈનલની રેસમાંથી સંપૂર્ણપણે બહાર થઈ જશે. આ સિવાય જો પાકિસ્તાન જીતશે તો તેની આશા અકબંધ રહેશે. આજે પાકિસ્તાન માટે કરો યા મરોનો મુકાબલો છે.
ટોપ-2 ટીમ સેમિફાઇનલમાં જશે
ચેમ્પિયન્સ ટ્રોફીમાં 8 ટીમો ભાગ લઈ રહી છે. જેને દરેક 4 ના 2 જૂથોમાં વહેંચવામાં આવ્યા છે. ભારત, પાકિસ્તાન, ન્યુઝીલેન્ડ અને બાંગ્લાદેશને ગ્રુપ-એમાં રાખવામાં આવ્યા છે, જ્યારે ઓસ્ટ્રેલિયા, દક્ષિણ આફ્રિકા, ઈંગ્લેન્ડ અને અફઘાનિસ્તાનને ગ્રુપ-બીમાં રાખવામાં આવ્યા છે. ન્યૂઝીલેન્ડની ટીમ ગ્રુપ-એમાં ટોપ પર યથાવત છે. આ સિવાય ભારતીય ટીમ બીજા સ્થાને, બાંગ્લાદેશ ત્રીજા અને પાકિસ્તાન ચોથા સ્થાને યથાવત છે.
ફખર ઝમાન ટૂર્નામેન્ટમાંથી બહાર
ફખર ઝમાનના ટૂર્નામેન્ટમાંથી બહાર થવાના કારણે પાકિસ્તાનની ટીમને મોટો ફટકો પડ્યો છે. ફખર ઝમાનનો ટીમ ઈન્ડિયા સામે ઘણો સારો રેકોર્ડ છે, છેલ્લી વખતે આ ખેલાડીએ ચેમ્પિયન્સ ટ્રોફી 2017ની ફાઇનલમાં ભારત વિરુદ્ધ સદી ફટકારીને જીતમાં મહત્વની ભૂમિકા ભજવી હતી. હવે પાકિસ્તાનની ટીમ નવી પ્લેઈંગ ઈલેવન સાથે ભારત સામે મેદાનમાં ઉતરવા જઈ રહી છે.
