ઈઝરાયલે ગુરુવારે રાત્રે ઈરાનના દિલ એટલે કે તેની રાજધાની તેહરાન પર મોટો હુમલો કર્યો છે. આ હુમલામાં ઈઝરાયલી સેનાએ 60 ફાઈટર જેટનો ઉપયોગ કર્યો હતો. ઈઝરાયલી વાયુસેનાના એક્સ અકાઉન્ટ પર કરવામાં આવેલી એક પોસ્ટ મારફતે જણાવવામાં આવ્યું છે કે ઈરાનના પરમાણુ ઠેકાણાઓથી લઈને રક્ષા મંત્રાલય તેમજ ઘણા મહત્વના વિસ્તારોને ધ્વસ્ત કરી દેવાયા છે.
તેહરાન પર નાખ્યા 120 બોમ્બ
ઈઝરાયલી વાયુસેના કહ્યા અનુસાર ગુરુવારે તેહરાનના અનેક સૈન્ય ઠેકાણાઓ પર 60થી વધુ વાયુસેનાના લડાયક વમાનથી હુમલો કર્યો હતો, જેમાં લગભગ 120 મહાવિનાશકારી બોમ્બ ફેંકવામાં આવ્યા. આ દરમિયાન ઈઝરાયલી સેનાએ ઈરાનની મિસાઈલ બનાવવામાં ઉપયોગમાં લેવાતા ઘટકો, એન્જીન, કારખાનાઓ અને કાચામાલના પ્રોડક્શન સ્થળોને નષ્ટ કરી નાખ્યા.
આઈએેફે જણાવ્યું હતું કે સેનાએ ઈરાની રક્ષા મંત્રાલય અને પરમાણુના ઔદ્યોગિક શક્તિ ક્રેન્દ્રના ભાગ પર હુમલો કર્યો હતો. આ સિવાય તેહરાનમાં આવેલા સ્પાંડ મુખ્યાલય ભવન પર પણ હુમલો કર્યો હતો. જેનો ઉપયોગ ઈરાની શાસનની સૈન્ય ક્ષમતાઓ માટેની ઉચ્ચ ટેકનોલોજી અને હથિયારોના વિકાસ માટે કરવામાં આવે છે. આ સિવાય રાત્રી દરમિયાન વાયુ સેનાએ ઈરાનથી છોડવામાં આવેલા ડ્રોનને વચ્ચે જ તોડી પાડ્યા હતા.
ઈઝરાયલી વાયુસેનાએ પોતાના ઘાતક હુમલાથી ઈરાનની રડાર સિસ્ટમને પણ ધ્વસત કરી દીધી હતી. ઈઝરાયલી લડાકુ વિમાને ઈસ્ફહાન અને તેહરાનના ક્ષેત્રોમાં ઈરાની મિસાઈલ અને રડાર સિસ્ટમ પર હુમલો કર્યો હતો.
